ޤާނޫނުގެ އެންމެ އަކުރަކަށްވެސް ދިވެހި ފުލުހުން އިހުމާލު ނުވާނެކަމުގެ ޔަޤީންކަން ދިވެހި ރައްޔިތުންނަށް ދެއްވާކަމަށް ކޮމިޝަނަރ އޮފް ޕޮލިސް ހަމްދޫން ރަޝީދު ވިދާޅުވެއްޖެއެވެ.
ޖުމްހޫރީ ދުވަހުގެ މުނާސަބަތުގައި ދެއްވި ޙާއްސަ މެސެޖުގައި ކޮމިޝަނަރ އޮފް ޕޮލިސް ހަމްދޫން ރަޝީދު ވިދާޅުވީ، ރައްޔިތުންގެ ޙައްޤުތައް ރައްކާތެރިވެފައި އޮތުމާއި، ޤައުމުގެ އެތެރޭގެ ޞުލްޙަ މަޞްލަޙާތާއި، އަމާންކަން އޭގެ އެންމެ ތަނަވަސް މާނައިގައި ކަށަވަރުވެފައި އޮތުމަކީ ޖުމްހޫރީ ނިޒާމެއްގެ އެންމެ މުހިންމު އެއް އަސާސްކަމަށެވެ. އަދި ދިވެހި ފުލުހުންނަކީ ރައްޔިތުންނަށް ބޭނުންވާ އަމާންކަމާއި، ރައްކާތެރިކަން ހޯދައިދިނުމުގެ ޤައުމީ ވާޖިބު ކޮނޑުއަޅައިގެން ތިބޭ މީހުންކަމަށާއި، ޖުމްހޫރީ ވެރިކަމާއި ފުލުހުންނާ ސީދާ ގޮތެއްގައި ގުޅޭ އެންމެ ޚާއްޞަ އެއް ކަމަކީ އެއީކަމަށްވެސް ކޮމިޝަނަރ ވިދާޅުވިއެވެ.
ޖުމްހޫރީ ދުވަހުގެ ތަޙުނިޔާ ފޮނުވަމުން ކޮމިޝަނަރ އޮފް ޕޮލިސް ހަމްދޫން ރަޝީދު ދެއްވި ޙާއްސަ މެސެޖުގައި ދިވެހިރާއްޖޭގެ އެތެރޭގެ ހަމަޖެހުން ޤާއިމުކުރުމުގައި ދިވެހި ފުލުހުން ރައްޔިތުންގެ އުންމީދުތައް ޙާޞިލުކޮށްދޭނެކަމަށް ވިދާޅުވެފައިވެއެވެ. އަދި ޤާނޫނުގެ އެންމެ އަކުރަކަށް ވެސް ދިވެހި ފުލުހުން އިހުމާލު ނުވާނެކަމަށާއި، މި ލޮބުވެތި ވަޠަން މިނިވަންކަންމަތީ ދެމެހެއްޓުމުގައި އުފުލާ ކޮންމެ ފިޔަވަޅެއްވެސް އަޅާނީ ސާބިތުކަމާއެކު ސީދާ ކުރިޔަށްކަމަށް އެމަނިކުފާނު ވަނީ ވިދާޅުވެފައެވެ.
ކޮމިޝަނަރ އޮފް ޕޮލިސް ހަމްދޫން ވިދާޅުވީ، ޢުމްރާނީ ގޮތުންނާއި ތަރައްޤީގެ ގޮތުން ރާއްޖެއަށް ބޮޑެތި ބަދަލުތަކެއް އައިސްފައިވާކަމަށާއި، ކުށްކުރާ މީހުން ކުށްކުރުމުގެ އުކުޅުތައް ބަދަލުކޮށްފައިވާކަމަށެވެ. އަދި މި ޙަޤީޤަތްތާއެކު ފުލުހުންގެ ޒިންމާއާއި، ފުލުހުންނަށް ބޭނުންވާ ޤާބިލުކަން އެތައް ގުނައަކަށް އިތުރުކުރަން ޖެހިފައިވާކަމަށް ކޮމިޝަނަރ ވިދާޅުވިއެވެ. ހަމައެހެންމެ އަމާން ޞުލްޙަވެރި ތަހުޒީބު ވެށްޓެއް ޤާއިމުކުރުމަށްޓަކައި ދިވެހި ފުލުހުން އަބަދުވެސް އިސްކަންދޭނީ ފުލުހުންގެ ޤާނޫނީ ވާޖިބު އަދާކުރުމަށް ކަމަށްވެސް ހަމްދޫން ވިދާޅުވިއެވެ.