ޕެސިފިކް އޭޝިޔާ ޓްރެވެލް އެސޯސިއޭޝަން (ޕާޓާ) އިން ރާއްޖޭގައި ބާއްވާ 2 ވަނަ "ހިއުމަން ކެޕޭސިޓީ ބިލްޑިންގ ޕްރޮގުރާމް" ބާއްވަން ތައްޔާރުވެއްޖެއެވެ. މި ޕްރޮގުރާމް ބޭއްވުމަށް ނިންމާފައިވަނީ މިމަހުގެ 22 ވަނަ ދުވަހުއެވެ. ޕާޓާ އިން މި ޕްރޮގުރާމް ބާއްވަނީ ރާއްޖޭގެ ފަތުރުވެރިކަމުގައި މަސައްކަތްކުރާ އަމިއްލަ ޖަމިއްޔާއެއްކަމަށްވާ މޯލްޑިވްސް އެސޯސިއޭޝަން އޮފް ޓްރެވެލް އެޖެންޓްސް އެންޑް ޓުއަރ އޮޕަރޭޓާރސް (މަޓާޓޯ) އާއި ގުޅިގެންނެވެ.
މިއަހަރުގެ ޕްރޮގުރާމް މައިގަނޑު ގޮތެއްގައި އަލިއަޅުވާލާނީ އައު ވިޔަފާރިތައް ފަށައި، ވިޔަފާރި ކުރިއަރުވާނެ ގޮތްތަކާއި ގުޅޭގޮތުންކަމަށް ޕާޓާއިން ބުނެއެވެ. މޯލްޑިވްސް ޓްރެވެލް ކޮންފަރެންސްގެ ތެރެއިން ބާއްވާ މި ޕްރޮގުރާމްގައި ދާއިރާގެ ތަޖުރިބާކާރުން ސެޝަންތަކުގައި ބައިވެރިވެ ތަޤްރީރުކުރާނެއެވެ.
ޕާޓާ އެކެޑެމީގެ ޕްރޮގުރާމެއް ރާއްޖޭގައި ފުރަތަމަ ބާއްވާފައިވަނީ 2017 ވަނަ އަހަރުގެ ޖުލައި 12 އަދި 13 ވަނަ ދުވަހު، ދަރުބާރުގޭގައި ބޭއްވި ޓްރެވަލް ޓްރޭޑް މޯލްޑިވްސް ފެއާގައެވެ. އެފަހަރުގެ ޕްރޮގުރާމްގެ މައުޟޫއަކީ "ދަ އާޓް އޮފް ސްޓޯރީ ޓެލިން" އެވެ.
"ޕާޓާ އެކެޑެމީ"ގެ ނަމުގައި، ޕާޓާއިން ކޮންމެ އަހަރަކު ވެސް ދެފަހަރަކު ޚާއްސަ ނެޓްވޯކިންގް ވޯކްޝޮޕްތަކެއް ބާއްވަ އެވެ. ބެންގްކޮކްގައި ހުންނަ ޕާޓާގެ އޮފީހުގައި ބާއްވާ ޕާޓާ އެކެޑެމީގެ ބައްދަލުވުންތަކަށް ގިނަ އަދަދެއްގެ ބަޔަކު ބެންގްކޮކަށް ޒިޔާރަތްކުރެއެވެ.