އިންތިޚާބީ ރައީސް އިބްރާހީމް މުޙައްމަދު ޞާލިޙުގެ ދެކަނބަލުން ސަޢުދީ ޢަރަބިއްޔާއަށް ކުރެއްވި ދަތުރުފުޅު ނިންމަވާލެއްވުމަށްފަހު ރާއްޖެވަޑައިގެންފިއެވެ.
އިންތިޚާބީ ރައީސް ސަޢުދީ ޢަރަބިއްޔާއަށް ކުރެއްވި ދަތުރުފުޅަކީ ޢުމްރާ ދަތުރުފުޅެކެވެ. 3 ދުވަހުގެ މުއްދަތަކަށް ކުރެއްވި މި ދަތުރުފުޅުގައި އިންތިޚާބީ ރައީސް އިބްރާހީމް މުޙައްމަދު ޞާލިހު ވަނީ ސަޢުދީ ސަރުކާރުގެ ބައެއް އިސްފަރާތްތަކާވެސް ބައްދަލުކުރައްވާފައެވެ. އެމަނިކުފާނުގެ އަރިހުގައި ރައްޔިތުންގެ މަޖިލީހުގެ ރައީސް ޤާސިމް އިބްރާހީމާއި، ގުޅިފައިވާ ޕާޓީތަކުގެ އިސްވެރިން ބައިވެރިވެވަޑައިގެންފައިވެއެވެ.
ސެޕްޓެމްބަރ މަހުގެ 23 ވަނަ ދުވަހު ބޭއްވި ރިޔާސީ އިންތިޙާބު އިބްރާހީމް މުޙައްމަދު ޞާލިޙު ކާމިޔާބުކުރެއްވުމާ ގުޅިގެން ސަޢުދީ ރަސްގެފާނު ސަލްމާން ބިން ޢަބްދުލްޢަޒީޒާއި، ވަލީއަހުދު މުޙައްމަދު ބިން ސަލްމާން ވަނީ އެމަނިކުފާނަށް ގުޅުއްވައި މަރުޙަބާ ވިދާޅުވެފައެވެ. އަދި ސަޢުދީ ރަސްގެފާނުގެ ޚާއްޞަ މަންދޫބެއްގެ ޙައިޞިއްޔަތުން ސައުދީ ފަންޑްގެ ވެރިޔާ އަދި ސައުދީ މިލިޓްރީ އިންޑަސްޓްރީއާއި، ސަޢުދީ އެންޓަޓެއިންޓްމަންޓް އޮތޯރިޓީގެ ގަވަރނަރ އަޙްމަދު އަލް ޚަތީބު ވަނީ އިންތިޚާބީ ރައީސާ ބައްދަލުކުރައްވާފައިވައެވެ.