ރާއްޖޭގެ ފަތުރުވެރިކަން އިޝްތިހާރުކުރުމަށް މޯލްޑިވްސް އެސޯސިއޭޝަން އޮފް ޓޫރިޒަމް ޕްރޮފެޝަނަލްސްގެ ނަމުގައި އައު ޖަމިއްޔާއެއް އިފްތިތާޙްކޮށްފިއެވެ.
އިނގިރޭސިވިލާތުގެ ލަންޑަންގައި ކުރިއަށްދިޔަ ވޯރޑް ޓެރެވެލް މާރޓްގައި ލޯންޗްކުރި މޯލްޑިވްސް އެސޯސިއޭޝަން އޮފް ޓޫރިޒަމް ޕްރޮފެޝަނަލްސް (އޭޓީޕީ) އަކީ ރާއްޖޭގެ ފަތުރުވެރިކަމުގެ ސިނާޢަތުގައި މަސައްކަތްކުރާ ބައެއް ފަރާތްތައް ގުޅިގެން އުފެއްދި ހިލޭސާބަހަށް މަސައްކަތްކުރާ ޖަމިއްޔާއެކެވެ.
އެ ޖަމިއްޔާގެ މަސައްކަތްތައް ބިނާކުރާނީ ރާއްޖޭގެ ފަތުރުވެރިކަން އިޝްތިހާރުކުމަށާއި، ރާއްޖެ ފަތުރުވެރިކަމުގެ މަންޒިލެއްގެ ގޮތުގައި މުޅި ދުނިޔެއަށް އިޝްތިހާރުކުރުމަށް ދާއިރާގެ މީހުން ތަމްރީނުކުރުމަށް ކަމަށް އެ ޖަމިއްޔާއިން މައުލޫމާތުދެއެވެ. އޭޓީޕީން ބުނީ އެ ޖަމިއްޔާގެ މެންބަރަކަށް ވުމަށް ބޭނުންވާ ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކަށް އެ ފުރުސަތު ހުޅުވާލާފައިވާކަމަށެވެ.
ރާއްޖޭގެ ފަތުރުވެރިކަން އެއްދުވަހުން އަނެއްދުވަހަށް ކުރިއަރަމުންއަންނައިރު، ރާއްޖޭގައި މިހާރު 139 ރިސޯޓް ހިންގަމުންދެއެވެ. އިތުރު ރިސޯޓްތަކެއް ހުޅުވުމަށް މިހާރު ތައްޔާރުވެފައިވާއިރު، 500 ގެސްޓްހައުސްއާއި 12 ހޮޓެލްގެ އިތުރުން ސަފާރީ އުޅަނދުތަކުންވެސް އަންނަނީ ފަރުތުވެރިންނަށް ޚިދުމަތްދެމުންނެވެ.