މާލޭގެ މަގުތަކުގައި ފެންބޮޑުވާ މައްސަލަ ޙައްލުކުރުމަށް ޤާއިމުކޮށްފައިވާ ސްޓޯމްވޯޓަރ ސިސްޓަމްގެ ޕަމްޕް ސްޓޭޝަންތަކުގެ ޕެނަލް ބޯޑަށް ގެއްލުންދީ ހަލާކުކޮށްލާފައިވާކަމަށް ހައުސިންގ މިނިސްޓަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ހައުސިންގ މިނިސްޓަރ ޑރ. މުޙައްމަދު މުޢިއްޒު ކުރެއްވި ޓުވީޓެއްގައި ވިދާޅުވެފައިވަނީ، ވިއްސާރަ މޫސުމުގައި މާލޭގައި ފެންބޮޑުވާ މައްސަލަ ހައްލުކުރުމަށް ޤާއިމުކޮށްފައިވާ ސްޓޯމްވޯޓަރ ސިސްޓަމްތަކުގެ ގިނަ ޕަމްޕް ސްޓޭޝަންތަކުގެ ޕެނަލްބޯޑަށް ގެއްލުންދީ ހަލާކުކޮށްލާފައިވާކަމަށެވެ. އަދި ބައެއް ޕަމްޕް ސްޓޭޝަންތަކުގެ ކަރަންޓް ސަޕްލައި ކަނޑާލާފައިވާކަމަށްވެސް މިނިސްޓަރ މުޢިއްޒު ވިދާޅުވިއެވެ.
ހައުސިންގ މިނިސްޓަރ ވިދާޅުވީ ސްޓޯމްވޯޓަރ ސިސްޓަމް ޑިޒައިންކޮށްފައިވަނީ ވާރޭ ހުއްޓާލާތާ 3 ގަޑިއިރު ތެރޭގައި ފެންގަނޑު އެއްކޮށް ހިނދޭގޮތަށްކަމަށެވެ. ނަމަވެސް އެއްވެސް ސަބަބަކާހުރެ ސިސްޓަމަށް ދިމާވާ މައްސަލައަކުން ނުވަތަ ލިބޭ ގެއްލުމަކުން މި ނަތީޖާ ހާސިލުނުވާނެކަމަށް މިނިސްޓަރ ވިދާޅުވިއެވެ.
ވިއްސާރަ މޫސުމުގައި މާލޭގައި ފެންބޮޑުވާ މައްސަލަ ހައްލުކުރުމަށްޓަކައި ސްޓޯމްވޯޓަރ ސިސްޓަމެއް ޤާއިމުކުރުމުގެ މަސައްކަތް ސަރުކާރުން ފަށާފައިވަނީ 2014 ވަނަ އަހަރުގެ ތެރޭގައެވެ. ހައުސިންގ މިނިސްޓްރީން އެމްޑަބްލިޔުއެސްސީއާ ހަވާލުކޮށްގެން ކުރިއަށްގެންދިޔަ މި މަޝްރޫޢުގެ ދަށުން މާލޭގެ ދެކުނު ސަރަހައްދުގައި ފެން ބޭރުކުރުމަށް ޕައިޕްލައިނެއް ވަނީ އަޅާފައެވެ. އަދި ފެން ބޭރުކުރުމަށް އިންސްޕެކްޝަން ޗެމްބަރުތަކެއްވެސް ހަރުކޮށްފައިވާއިރު، މާލޭގެ އެކި ސަރަޙައްދުތަކުގައި ސްޓޯމްވޯޓަރ ޕަމްޕް ސްޓޭޝަންތަކެއް ބަހައްޓާފައިވެއެވެ.