އިކޮނޮމިކް މިނިސްޓްރީގެ ޚިދުމަތްތައް ފޯރުކޮށްދިނުމަށް ޤާއިމްކޮށްފައިވާ ސަރވިސް ސެންޓަރު ރަސްމީކޮށް ހުޅުވައިފި

އިކޮނޮމިކް މިނިސްޓްރީގެ ޚިދުމަތްތައް ފަސޭޙަކަމާއެކު ފޯރުކޮށްދިނުމަށް ޤާއިމްކޮށްފައިވާ ސަރވިސް ސެންޓަރު ރަސްމީކޮށް ހުޅުވައިފިއެވެ.

ބޮޑުތަކުރުފާނުމަގުގައި ހުންނަ ސަރވިސް ސެންޓަރު ރަސްމީކޮށް ހުޅުވައިދެއްވީ، އެކަމަށްޓަކައި ބޭއްވި ޚާއްސަ ރަސްމިއްޔާތެއްގައި އިކޮނޮމިކް މިނިސްޓަރ މުޙައްމަދު ސަޢީދުއެވެ.

ސަރވިސް ސެންޓަރު ހުޅުވުމަށް ބޭއްވި ރަސްމިއްޔާތުގައި ރަޖިސްޓްރާ އޮފް ކޮންޕެނީސް މަރިޔަމް ވިސާމް ވިދާޅުވީ، މިސެންޓަރު މެދުވެރިކޮށް ވިޔަފާރިއެއް ފަށަން ބޭނުންވާ ފަރާތްތަކަށް ފަސޭހަކަމާއެކު ޚިދުމަތްތައް ލިބިގެންދާނެކަމަށެވެ. އަދި ވިޔަފާރިކުރާ ފަރާތްތަކަށްވެސް ފަސޭޙަކަމާއި އަވަސްކަމާއެކު މިތަނުން ޚިދުމަތް ލިބިގެންދާނެކަމަށެވެ.

"މި ސެންޓަރު މެދުވެރިކޮށް އޮންލައިންކޮށް މިހާރު މިފޯރުކޮށްދެވޭ ޙިދުމަތްތަކާއި، އަދި މުސްތަޤްބަލްގައި ފޯރުކޮށްދެވޭ ޚިދުމަތްތައް މިސެންޓަރުންވެސް ލިބިވަޑައިގަންނަވާނެ، ގޭގަ ތިއްބަވައިގެންވެސް އެޕްލިކޭޝަންތައް ފޮނުއްވޭނެ، ޚިދުމަތައް އެދިވަޑައިގަނެވޭނެ އަދި އޭގެއިތުރުން ކައުންޓަރުތައް މެދުވެރިކޮށްވެސް ޚިދުމަތްތައް ލިބިވަޑައިގަންނަވާނެ." މަރިޔަމް ވިސާމް ވިދާޅުވިއެވެ.

މި ސަރވިސް ސެންޓަރުގައި ސެލްފް ސަރވިސް ނުވަތަ އަމިއްލައަށް ޚިދުމަތް ލިބިގަނެވޭ ކައުންޓަރުތަކާއި އިކޮނޮމިކް މިނިސްޓްރީގެ އެކިއެކި ޚިދުމަތްތައް ފޯރުކޮށްދިނުމަށް ޚާއްސަ ކައުންޓަރުތައް ހުރެއެވެ.

މާލޭގެ އިތުރުން އާބާދީ ބޮޑު ރަށްރަށުގައި އިކޮނޮމިކް މިނިސްޓްރީން ގެންދަނީ ސަރވިސް ސެންޓަރުތައް ޤާއިމްކޮށް، އެމިނިސްޓްރީގެ ޚިދުމަތްތައް ފޯރުކޮށްދެމުންނެވެ.