ދައުލަތުގެ ބަޖެޓުގެ ޚަރަދުތައް ކުޑަކުރުމަށް ފިޔަވަޅުތަކެއް އެޅުމަށް ފިނޭންސް މިނިސްޓްރީން ނިންމައިފިއެވެ.
ޙަރަދުތައް ކުޑަކުރުމަށް އަންގާ ފިނޭންސް މިނިސްޓްރީން ނެރެފައިވާ ސާކިއުލާގައި ސަރުކާރު އޮފީސްތަކުގައި އިތުރުގަޑީގެ މަސައްކަތްކުރަން ނުޖެހޭގޮތަށް މަސައްކަތް ރޭވުމަށް ވަނީ އަންގާފައެވެ. އަދި ޑިއުޓީ އުސޫލުން މަސައްކަތްކުރާ އޮފީސްތައް ފިޔަވައި އެހެން އޮފީސްތައް އެންމެ ލަސްވެގެން މެންދުރުފަހު 02:30 ގައި ބަންދުކުރުމަށް ވަނީ އަންގާފައެވެ.
މިކަންކަމުގެ އިތުރުން ފިނޭންސް މިނިސްޓްރީން އަދި ރައީސުލްޖުމްހޫރިއްޔާގެ އޮފީހުން ހުއްދަ ދީފައިވާ މަރާމާތުގެ މަސައްކަތްތަކާއި ކެޕިޓަލް ހަރަދުތައް ފިޔަވައި އެހެން މަރާމާތުގެ އަދި ކެޕިޓަލް ހަރަދުތައް ނުކުރުމަށްވެސް ފިނޭންސް މިނިސްޓްރީން ވަނީ އަންގާފައެވެ. އަދި އަމަލީ މަސައްކަތް ފެށިފައިވާ ޕީ.އެސް.އައި.ޕީގެ މަޝްރޫޢުތައް ފިޔަވައި އެހެން މަޝްރޫޢުއެއް ކުރިއަށް ނުގެންދިއުމަށްވެސް ފިނޭންސް މިނިސްޓްރީގެ ސާކިއުލާގައި ވަނީ އަންގާފައެވެ.
ފިނޭންސް މިނިސްޓްރީގެ ސާކިއުލާގައި ޤައުމީ ފެންވަރުގައި ފާހަގަކުރާ ދުވަސްތައް ފިޔަވައި، ބަޖެޓުން ޚަރަދުކޮށްގެން އެއްވެސް މުނާސަބަތެއް ފާހަގަނުކުރުމަށް އަންގާފައިވާއިރު، ދައުލަތުގެ ހުރިހާ އޮފީސްތަކުން މި ސާކިއުލާއަށް އަމަލުކުރުމަށް ފިނޭންސް މިނިސްޓްރީން ވަނީ އަންގާފައެވެ.