އެލައިޑް އިންޝުއަރަންސް ކުންފުނީގެ އިސްލާމިކް ވިންޑޯ "އަޔާދީ ތަކާފުލް" އަށް ދެކުނު އޭޝިޔާ ޞަރަޙައްދުގެ ޝަރަފުވެރި އިފްސާ ގޯލްޑް އެވޯޑް ވިދިވިދިގެން 2 ވަނަ އަހަރު ލިބިއްޖެއެވެ.
މި އެވޯޑް ލިބުނީ އިސްލާމިކް ވިންޑޯ/ ޔުނިޓް އޮފް ދަ އިޔަރ ކެޓަގަރީންނެވެ. އަޔާދީ ތަކާފުލްއަށް މިއެވޯޑު ލިބުނީ ޔޫޓީއޯއިން އިންތިޒާމުކޮށްގެން ސްރީލަންކާގައި ބޭއްވި އިސްލާމިކް ފައިނޭންސް ފޯރަމް އޮފް ސައުތު އޭޝިޔާ (އިފްސާ) ގެ ތިންވަނަ އަހަރީ އިނާމު ދިނުމުގެ ޙަފުލާގެ ތެރެއިންނެވެ. އަޔާދީގެ ފަރާތުން މިއެވޯޑާއި ޙަވާލުވީ ޖެނެރަލް މެނޭޖަރ އިބްރާހިމް ފިރުޝާންއެވެ.
އަޔާދީ ތަކާފުލްގެ ޖެނެރަލް މެނޭޖަރ އިބްރާހިމް ފިރުޝާން ވިދާޅުވީ، އަޔާދީ ތަކަފުލްގެ މަސައްކަތްތަކުގެ އަގުވަޒަންކުރުމުގެ ގޮތުން ވިދި ވިދިގެން ދެވަނަ ފަހަރަށް މިއެވޯޑް ލިބުމަކީ ކުރިޔަށްދިޔުމަށް ލިބުނު އިތުރު ހިތްވަރެއް ކަމަށެވެ. އަދި ރާއްޖޭގައި އިސްލާމިކް ފައިނޭންސިންގގެ ދާއިރާ އިތުރަށް ފުޅާކޮށް ކުރިއެރުވުމަށް ކުރިޔަށް އޮތް ތަނުގައިވެސް ގިނަ މަސައްކަތް ތަކެއް ކުރައްވާނެ ކަމަށް އޭނާ ވިދާޅުވިއެވެ.
2014 ވަނަ އަހަރު ވުޖޫދަށް އައި "އަޔާދީ ތަކާފުލް" އަކީ އިސްލާމީ ޝަރީޢަތްތަކާއި އުސޫލުތަކުގެ މަތިން ފަރުމާކޮށްފައިވާ އިންޝުއަރަންސް ޚިދުމަތްދޭ ކުންފުންޏެކެވެ. އަޔާދީގެ ޚިދުމަތްތަކުގެ ތެރޭގައި ކާރިޘާ ތަކާފުލް، ހޯމް ތަކާފުލް، ޗައިލްޑް އެޑިއުކޭޝަން ތަކާފުލް، ޙައްޖު އަދި ޢުމްރާ ތަކާފުލް ފަދަ އިތުރު ޚިދުމަތްތައް ހިމެނެއެވެ.