އުރީދޫން ކުރިއަށްގެންދާ ނިރު އެކްސެލެރޭޓަރ ޕްރޮގްރާމުގެ ދެވަނަ މަރުޙަލާގެ ޢަމަލީ މަސައްކަތް ފަށައިފިއެވެ.
އުރީދޫ އާއި އައިޑިއާ މާޓް ގުޅިގެން ކުރިއަށްގެންދިޔަ ނިރު ހެކަތަންގައި ވާދަކޮށް ހޮވުނު ހަތަރު ޓީމާއެކު، ބާރަ ހަފުތާގެ އިންޓެންސިވް މެންޓަރޝިޕް ޕްރޮގުރާމެއް އުރީދޫން ވަނީ ފަށާފައެެވެ. މި ތަމްރީނުގެ އިތުރުން، ވިޔަފާރި ބިނާކުރުމަށް ބޭނުންވާނެ އެހީތެރިކަން ފޯރުކޮށްދޭނެކަމަށް އުރީދޫން ބުނެއެވެ. އޭގެތެރޭގައި ސީޑް ފަންޑިންގް، މަސައްކަތް ކުރާނެ ކޯ-ވޯކިން ސްޕޭސް، ވިޔަފާރި ބިނާކުރުމަށް ޑިޖިޓަލް ޓޫލްތައް އަދި ތަޖުރިބާކާރުންގެ ފަންނީ އެހީތެރިކަން ހޯދައިދިނުން ހިމެނެއެވެ.
ނިރު އެކްސެލެރޭޓަރ ޕްރޮގްރާމަކީ ދިވެހި މުޖުތަމަޢަށް މަންފާކުރުވަނިވި ތަފާތު އީޖާދީ އުފެއްދުންތައް ރާއްޖެއާ، ރާއްޖެއިން ބޭރުގެ މާކެޓުގައި ކުރިއެރުވުމުގެ ފުރުސޞަތު ދިވެހި ވިޔަފާރިތަކަށް ހޯދައިދިނުމުގެ މަޤްޞަދުގައި އުރީދޫން ކުރިއަށްގެންދާ ޕްރޮގުރާމެކެވެ.
ޑިޖިޓަލް ދުނިޔޭގައި ބައިވެރިވުން އިތުރުކޮށް، ޑިޖިޓަލް އާލާތްތައް މެދުވެރިކޮށް ކުރިއެރުން ހޯދުމަށް ދިވެހިންނަށް އެއްބާރުލުންދިނުމަށްޓަކައި، ނިރު އެކްސެލެރޭޓަރ، ސްމާޓް ސިޓީސް ޕްރޮޖެކްޓް، މިޔަހެލި ސޯޝަލް އިނޮވޭޝަން ކޭމްޕް، ޑިޖިޓަލް ލިޓްރަސީ ޕްރޮގްރާމް ފަދަ ގިނަ ޙަރަކާތްތަކެއް އުރީދޫ އިން ކުރިއަށްގެންދެއެވެ.