ފާއިތުވި ހަފްތާގައި އަތޮޅުތަކުން މާލޭގެ ބާޒާރަށް އެންމެ ގިނައިން މޭވާއާއި ތަރުކާރީގެ ބާވަތްތައް ގެނެސްފައިވަނީ އއ. އަތޮޅުގެ ރަށްތަކުންކަމަށް މިނިސްޓްރީ އޮފް ފިޝަރީޒް އެންޑް އެގްރިކަލްޗަރގެ ތަފާސް ހިސާބުތަކުން ދައްކައިފިއެވެ.
މިނިސްޓްރީ އޮފް ފިޝަރީޒް އެންޑް އެގްރިކަލްޗަރގެ ތަފާސް ހިސާބުތަކުން ދައްކާގޮތުން ފާއިތުވި ހަފްތާގެ ތެރޭގައި މާލެ ގެނެސްފައިވާ މޭވާއާއި ތަރުކާރީގެ 67 ޕަސަންޓަކީ އއ. އަތޮޅުގެ ރައްތަކުން ގެނެސްފައިވާ ތަކެއްޗެވެ. 27 ޕަސަންޓަކީ ކ. އަތޮޅުގެ ރައްތަކުން ގެނެސްފައިވާ ތަކެއްޗެވެ. އަދި 6 ޕަސަންޓަކީ ތ. އަތޮޅުގެ ރަށްތަކުން ގެނެސްފައިވާ ތަކެއްޗެވެ.
ފާއިތުވި ހަފްތާގެ ތެރޭގައި އަތޮޅުތަކުން މާލެއަށް އެންމެ ގިނައިން ގެނެސްފައިވަނީ ފަޅޮލެވެ. މިމުއްދަތުގެ ތެރޭގައި ދިހަ ހާސް ކިލޯއަށްވުރެ ގިނަ ފަޅޯ ވަނީ މާލެ ގެނެސްފައެވެ. އޭގެ އިތުރުން ދެން އެންމެ ގިނައިން ގެނެސްފައިވަނީ ކިއުކަންބާ، ބަރަބޯ، ފަތްކެޔޮ، ޗައިނީސް ކެބެޖެވެ.