ގދ. ތިނަދޫ އިސްލާމީ މަރުކަޒުގައި، ދިވެހިރާއްޖޭގެ އިސްލާމީ ޔުނިވަރސިޓީގެ ލާނިންގ ސެންޓަރެއް ޤާއިމުކޮށް، އަންނަ ޖެނުއަރީމަހު އެތަނުގައި ކިޔަވައިދޭން ފަށާނެކަމަށް އެ ޔުނިވަރސިޓީން ބުނެފިއެވެ.
ތިނަދޫގައި ސަރުކާރުން ބިނާކޮށްފައިވާ އިސްލާމީ މަރުކަޒުގެ މަސައްކަތް ނިންމާ އެތަން ރަސްމީކޮށް ހުޅުވާފައިވަނީ މިދިޔަ ސެޕްޓެންބަރ މަހުގެ 11 ވަނަ ދުވަހުއެވެ. ތިނަދޫ އިސްލާމީ މަރުކަޒު ފަރުމާކޮށްފައިވަނީ 8 ކްލާސްރޫމާއި، ލައިބްރަރީއަކާއި، އެޑްމިނިސްޓްރޭޓިވް އޮފީހެއްގެ އިތުރުން މަލްޓި ޕަރޕަސް ހޯލެއްވެސް ހިމެނޭގޮތަށެވެ.
ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަދައްކަވަމުން ދިވެހިރާއްޖޭގެ އިސްލާމީ ޔުނިވަރސިޓީގެ ވައިސް ޗާންސެލަރ އަލްއުސްތާޒާ އައިޝަތު ޚަލީލާ ޢަބްދުލްސައްތާރު ވިދާޅުވީ، ތިނަދޫ އިސްލާމީ މަރުކަޒުގައި ޤާއިމުކޮށްފައިވާ ކްލާސްރޫމްތަކުގައި އެ ޔުނިވަރސިޓީގެ ޕްރޮގްރާމްތައް ހިންގުމުގެ ހުއްދަ މިހާރު ލިބިފައިވާކަމަށެވެ. އަދި އަންނަ އަހަރުގެ ޖެނުއަރީމަހުގެ ސެމިސްޓަރގެ ކިޔެވުން ފެށުމާއެކު، އިސްލާމީ ޔުނިވަރސިޓީގެ ކޯސްތައް ތިނަދޫގައިވެސް ފެށުމަށްވާންޖެހޭ ތައްޔާރީތައް އެޔުނިވަރސިޓީން މިހާރު ވަމުންދާކަމަށެވެ.
"ގދ. ތިނަދޫގައި ސަރުކާރުން ހުޅުއްވި އިސްލާމީ މަރުކަޒުގެ 8 ކްލާސްރޫމަކީ އިސްލާމީ ޔުނިވަރސިޓީން ހިންގާ ޕްރޮގްރާމްތައް ހިންގުމަށްޓަކާ ސަރުކާރުން އަޅުގަނޑުމެންނަށް ދެއްވާފައިވާ ކްލާސްރޫމްތަކެއް.. އެހެންވީމަ އަޅުގަނޑުމެން އިރާދަކުރެއްވިއްޔާ މިފެށޭ ދިރާސީ އައު އަހަރުގެ ޖެނުއަރީ ސެމިސްޓަރ ފެށޭއިރުގައި އައި.ޔޫ.އެމްގެ ކޯސްތައް ތިނަދޫގައި ފެށުމަށް މަސައްކަތް ކުރަމުން މިދަނީ.. އޭރުން ތިނަދޫއާއި ތިނަދޫ ކައިރި ރަށްރަށުގެ ކުދިންނަށް މާލެ ނައިސް، އެތަނުން އަޅުގަނޑުމެންގެ ކޯސްތަކުގައި ބައިވެރިވުމުގެ ފުރުޞަތު ލިބިގެންދާނެ.." އަލްއުސްތާޒާ އައިޝަތު ޚަލީލާ ވިދާޅުވިއެވެ.
އަލްއުސްތާޒާ އައިޝަތު ޚަލީލާ ޢަބްދުލްސައްތާރު ވިދާޅުވީ، ތިނަދޫގައި އިސްލާމީ ޔުނިވަރސިޓީގެ ކޯސްތަކަށް ޑިމާންޑް އޮތްކަން ފާހަގަކުރެވިފައިވާކަމަށެވެ. އަދި އެ ޔުނިވަރސިޓީން ހިންގާ ތަފާތު ކޯސްތަކާއި ޕްރޮގްރާމްތަކާ ގުޅޭ މަޢުލޫމާތު ދިނުމަށް މިފެށޭ މަހުގެ ތެރޭގައި ތިނަދޫގައި އޯޕަންޑޭއެއް ބޭއްވުމަށްވެސް ނިންމާފައިވާކަމަށެވެ.
ދިވެހިރާއްޖޭގެ އިސްލާމީ ޔުނިވަރސިޓީގެ ޖެނުއަރީ އިންޓޭކަށްވަނުމަށް ބޭނުންވާ ފަރާތްތަކަށް މިމަހުގެ 15 ވަނަ ދުވަހު އެ ފުރުޞަތު ހުޅުވާލާފައިވާއިރު، 14 ދާއިރާއަކުން ޖުމްލަ 54 ޕްރޮގްރާމަކަށް އެންރޯލްވުމުގެ ފުރުޞަތު ހުޅުވާލާފައިވެއެވެ. މީގެ ތެރޭގައި ޝަރީޢާ އެންޑް ލޯ، އިސްލާމިކް ފައިނޭންސް، ޖާރނަލިޒަމް، ލީޑަރޝިޕް އެންޑް އެޑްމިނިސްޓްރޭޝަން، އެޑިއުކޭޝަން، އަދި އިސްލާމިކް ސްޓަޑީޒް ފަދަ ދާއިރާތައް ހިމެނެއެވެ.
ދިވެހިރާއްޖޭގެ އިސްލާމީ ޔުނިވަރސިޓީން މިހާރުވެސް އަންނަނީ ސެޓްފިކެޓް ލެވެލްގެ ކޯސްތަކުން ފެށިގެން މާސްޓަރސް އާއި ޕީ.އެޗް.ޑީ ފެންވަރުގެ ކޯސްތައްވެސް ހިންގަމުންނެވެ.