ކޮރަޕްޝަނަށް މަގުފަހިވެދާނެފަދަ އެއްވެސް މުޢާމަލާތެއް ނުހިންގުމަށް އޭ.ސީ.ސީން އެސް.ޓީ.އޯއަށް އަންގައިފި
ކޮރަޕްޝަނަށް މަގުފަހިވެދާނެފަދަ އެއްވެސް މުޢާމަލާތެއް ނުހިންގުމަށް އެންޓި ކޮރަޕްޝަން ކޮމިޝަނުން، ސްޓޭޓް ޓްރޭޓިންގ އޯގަނައިޒޭޝަން، އެސް.ޓީ.އޯއަށް އަންގައިފިއެވެ.
އޭ.ސީ.ސީން މިގޮތަށް އަންގާފައިވަނީ އެސް.ޓީ.އޯގެ ސަބްސިޑަރީ 2 ކުންފުނިކަމަށްވާ އެސްޓީއޯ މޯލްޑިވްސް ސިންގަޕޯ ޕްރައިވެޓް ލިމިޓެޑާއި، މޯލްޑިވްސް އޮއިލް ކޮމްޕެނީގެ މުވައްޒަފުންގެ މަސްލަޙަތު ހިމެނޭހެން ކޮރަޕްޝަނަށް މަގުފަހިވާފަދަ މުޢާމަލާތްތަކެއް ކުރަމުންދާކަމަށްބުނެ އެކޮމިޝަނަށް ލިބިފައިވާ ޝަކުވާތަކަކާ ގުޅިގެންނެވެ.
އޭ.ސީ.ސީން ބުނީ، މިކަމާ ގުޅޭގޮތުން އެކޮމިޝަނަށް ލިބިފައިވާ ޝަކުވާތައް ބެލުމަށްފަހު، ކޮރަޕްޝަނަށް މަގުފަހިވާފަދަ އެއްވެސް މުޢާމަލާތެއް ނުހިންގުމަށް އެސް.ޓީ.އޯއަށް މިހާރު އަންގާފައިވާނެކަމަށެވެ. ވަކިން ޙާއްސަކޮށް، މިއީ ވެރިކަން ބަދަލުވުމުގެ މަރުހަލާގެ ކަންކަން ކުރިއަށްދާ ދުވަސްވަރުކަމަށްވެފައި، މިފަދަ ދަނޑިވަޅެއްގައި މަޝްރޫޢުތައް އެވޯޑުކުރުމަށް އެއްބަސްވުންތައް ހަދައި، ފައިސާގެ މުޢާމަލާތްތައް ކުރުމަކީ، އާއްމު މަސްލަހަތު ގެއްލި، ކޮރަޕްޝަނަށް މަގުފަހިވެދާނެ ކަމަކަށްވާތީ، އެކަން އެގޮތަށް ނުކުރުމަށް އިލްތިމާސްކޮށްފައިވާނެކަމަށް އޭ.ސީ.ސީން ބުނެއެވެ.
އެހެންނަމަވެސް ސީދާ ވަކި މަޝްރޫޢެއް ހުއްޓާލުމަށް އެކޮމިޝަނުން އެސް.ޓީ.އޯއަށް އަންގާފައިނުވާނެކަމަށްވެސް އެކޮމިޝަނުން ބުނެއެވެ.
މިކަމާގުޅޭގޮތުން އެސް.ޓީ.އޯއިން ބުނީ، ސަރުކާރުގެ އެކި މުޢައްސަސާތަކާއި، މިނިވަން މުޢައްސަސާތަކުން އަންގާ އެގުންތަކަށް އެކުންފުނިން ފުރިހަމަ އެއްބާރުލުން ދޭނެކަމަށެވެ.