މިއަހަރުގެ 3 ވަނަ ކުއަރޓަގައި ބޭންކް އޮފް މޯލްޑިވްސް، ބީ.އެމް.އެލްއަށް ފައިދާގެ ގޮތުގައި 365 މިލިއަން ރުފިޔާ ލިބިއްޖެއެވެ.
ބީ.އެމް.އެލްއިން އާއްމުކޮށްފައިވާ އެ ބޭންކުގެ ތިންވަނަ ކުއަރޓަރގެ ތަފާސް ހިސާބުތައް ދައްކާގޮތުން، އެ ބޭންކުން ވަނީ ހަރުދަނާ މާލީ ނަތީޖާތަކެއް ހޯދާފައެވެ.
އެގޮތުން މިއަހަރުގެ ދެވަނަ ކުއާޓަރއާ އަޅާބަލާއިރު، ޓެކުހަށް ކެނޑުމުގެ ކުރިން ލިބުނު ފައިދާ ވަނީ 10 އިންސައްތަ އިތުރުވެ، 365 މިލިއަން ރުފިޔާއަށް އަރާފައެވެ. މިއީ މިދިޔަ އަހަރުގެ ތިންވަނަ ކުއާޓަރއާއި އަޅާބަލާއިރު 11 އިންސައްތައިގެ ކުރިއެރުމެކެވެ. އަދި މިއަހަރުގެ މިހާތަނަށް ޓެކްސްއަށް ކެނޑުމުގެ ކުރިން ލިބުނު ފައިދާ 1053 މިލިއަން ރުފިޔާއަށް އަރާފައިވާއިރު، މިއީ މިދިޔަ އަހަރުގެ މި މުއްދަތާއި އަޅާބަލާއިރު 14 އިންސައްތަ ކުރިއެރުމެކެވެ.
ބީ.އެމް.އެލްއިން ބުނީ އެ ބޭންކުގެ ފަންޑިންގ ކޮސްޓް ބޮޑުވެފައިވީނަމަވެސް، ވިޔަފާރީގެ ހުރިހާ ދާއިރާއަކުން ލިބުނު ކުރިއެރުމާއި، އުފެއްދުންތެރި ނޫން ލޯނުތަކުގެ ސަބަބުން މާލީ ނަތީޖާ ލަފާކުރި މިންވަރަށްވުރެ ރަނގަޅުވެފައިވާކަމަށެވެ. އެގޮތުން މިއަހަރުގެ މިހާތަނަށް ހިންގުމުން ލިބުނު ފައިދާ 2017 ވަނަ އަހަރުގެ މި މުއްދަތާއި އަޅާބަލާއިރު 9 އިންސައްތަ އިތުރުވެފައިވާކަން ބީ.އެމް.އެލްއިން ފާހަގަކުރެއެވެ. އަދި ވޭތުވެދިޔަ އަހަރުތަކުގައި ދޫކުރެވުނު ލޯނުތަކުގެ ފެންވަރު ރަނގަޅުވެފައި، މިންގަނޑާއި އެއްގޮތަށް އުފެއްދުންތެރި ނޫން ލޯނުގެ އަދަދު 40 މިލިއަން ރުފިޔާއަށް ދަށްކުރެވިފައިވާކަމަށްވެސް އެ ބޭންކުން ހާމަކުރެއެވެ.
މީގެ އިތުރުން ބޭންކުގެ ރައުސުލްމާލާއި، ލިކުއިޑިޓީ ރޭޝިއޯ ޤާނޫނުން ލާޒިމްކުރާ މިންވަރަށްވުރެ މަތީގައި ހިފަހައްޓާފައިވާކަމަށްވެސް ބީ.އެމް.އެލުން ބުނެއެވެ.