ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ އަނބިކަނބަލުން ފާޠިމަތު އިބްރާހީމް ސަޢުދިޢަރަބިޔާއަށް ކުރެއްވި ދަތުރުފުޅު ނިންމަވާލެއްވުމަށްފަހު ރާއްޖެ ވަޑައިގެންފިއެވެ. އެކަމަނާ ރާއްޖެ ވަޑައިގެންފައި ވަނީ މިއަދު ހެނދުނުގެ ވަގުތެއްގައެވެ.
ވެލާނާ އިންޓަރނޭޝަނަލް އެއަރޕޯޓްގައި އެކަމަނާގެ އިސްތިޤްބާލުގައި ފިރިކަލުން ރައީސް ޢަބްދުﷲ ޔާމިން ޢަބްދުލްޤައްޔޫމް ހުންނެވިއެވެ. އަދި ޕީޕީއެމްގެ ނާއިބު ރައީސުންނާއި، ބައެއް ވަޒީރުންނާއި ސަރުކާރަށް ތާޢީދުކުރާ މީހުންވެސް ވަނީ އިއްޒުއްދީން ފާލަން ސަރަޙައްދުން އެކަމަނައަށް މަރުހަބާ ދަންނަވާފައެވެ.
މިމަހުގެ ކުރީކޮޅު ރައީސްގެ އަނބިކަނބަލުން ސަޢުދިއަރަބިއްޔާއަށް ވަޑައިގަތުމުން އިދިކޮޅު ފަރާތްތަކުން ވަނީ ރައީސް ޔާމިނަށް ރިޔާސީ އިންތިޚާބުން ލިބިވަޑައިގެންނެވި ނާކަމިޔާބީއާއި ގުޅިގެން އެކަމަނާ ފިއްލެވީކަމަށް ތުހުމަތުކުރައްވާފައެވެ. ނަމަވެސް ޕީޕީއެމުން ބުނެފައި ވަނީ އެކަމަނާ ސަޢުދީއަށް ވަޑައިގަތީ ޢުމްރާއަކަށް ކަމަށާ ރައީސް ޔާމީނުގެ ދެކަނބަލުންނަކީ ޤައުމުދޫކޮށް ފިއްލަވާނެ ބައެއް ނޫންކަމަށެވެ.