މިދިޔަ ރިޔާސީ އިންތިޚާބަކީ ރާއްޖޭގެ ތާރީޚުގައި މިހާތަނަށް ބޭއްވި އެންމެ އޮޅުވާލުން ބޮޑު، ކޮރަޕްޝަން ހިމެނޭ އިންތިޚާބުކަމަށް ފޭދޫ ދާއިރާގެ މެންބަރު އިބްރާހީމް ދީދީ ތުހުމަތުކުރައްވައިފިއެވެ.
ނޫސްވެރިންނާ ބައްދަލުކުރައްވާ ވާހަކަފުޅުދައްކަވަމުން ފޭދޫ ދާއިރާގެ މެންބަރު އިބްރާހީމް ދީދީ ވަނީ ނިމިދިޔަ ރިޔާސީ އިންތިޚާބަކީ ރާއްޖޭގެ ތާރީޚްގައިވެސް އެންމެ ބޮޑެތި އޮޅުވާލުމާއި ކޮރަޕްޝަން ހިމެނޭ އިންތިޚާބުކަމަށް ތުހުމަތު ކުރައްވާފައެވެ. އޭނާ ވިދާޅުވީ، އިންތިޚާބާ މެދު ވަރަށް ގިނަ ރައްޔިތުންގެ ކަންބޮޑުވުންތައް އެބަހުރިކަމަށާއި، އިންތިޚާބުގައި މަކަރު ހަދަފައިވާކަމަށް ޝައްކު ކުރުމުގެ ފުރުސަތު އެބައޮތްކަމަށެވެ.
އިލެކްޝަންސް ކޮމިޝަންގެ ތެރޭގައި ބައިވަރު މައްސަލަތަކެއް ހުރިކަން ފެންނަމުންދާކަމަށް ތުހުމަތުކުރައްވާ އިބްރާހީމް ދީދީ ވިދަޅުވީ، ޤާނޫނީ ގޮތުން ނުކުރެވޭ ކިތަންމެ ކަމެއް އިލެކްޝަނުން ކުރަމުންދާކަމަށެވެ.
"އިންތިޚާބު އިންސާފުވެރިކޮށް ގެންދިއުމަށް މުއައްސަސާތަކަށް ރައްޔިތުންގެ މަޖީލީހުން ކަނޑައެޅި މީހުން މިގޮތަށް ކަންތައްކުރުމުން އަޅުގަނޑުމެން ކަންބޮޑުވޭ. މިނިވަން އިންތިޚާބެއް ގެނައުމަށް ހުވާކޮށްފައި ތިބި ބަޔަކީ އިލެކްޝަންގެ މީހުން. އަޅުގަނޑުމެންނަށް އެކި ގޮތްގޮތުން ލިބިފައިވާ މަޢުލޫމާތުން އެނގެނީ ރާއްޖޭގައި މިހާތަނަށް އެންމެ ބޮޑު އޮޅުވާލުމާ ކޮރަޕްޝަން ހިމެނޭ އިންތިޚާބުކަން ސާބިތުވާވަރަށް އެނގޭ. ވޯޓު ފޮށި ކައިރިތިބި މީހުން އެބަ ބުނޭ އިންތިޚާބު ބާޠިލްކުރާ މިންވަރުގެ މައްސަލަތައް އެބަހުރިކަމަށް. 2013 ގައި އިންތިޚާބު ބާޠިލްކުރީ މިއަށްވުރެ ކުޑަ ކަމެއްގައި. މިފަހަރު މާބޮޑެތި ސާބިތުވާ ވަރުގެ ކަންކަން ސައްހަ ކަންކަން ފެނަން އެބަހުރި" އިބްރާހީމް ދީދީ ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ޕީޕީއެމްގެ ކައުންސިލް މެމްބަރު، އަދި ނިލަންދޫ ދާއިރާގެ މެމްބަރު ޑރ. ޢަބްދުﷲ ޚަލީލް ވަނީ ރިޔާސީ އިންތިޚާބުގައި އިލެކްޝަންސް ކޮމިޝަނުން ބޮޑެތި އޮޅުވާލުންތަކެއް އޮޅުވާލާފައިވާކަމަށާއި އެކަމުގައި ބޭރުގެ ބައެއް ފަރާތްތައްވެސް ޝަމިލުވާކަމަށް ތުހުމަތުކޮށްފައެވެ. އަދި އިންތިޚާބާ ގުޅިގެން އެތައް މައްސަލަތަކެއް، ޤައުމީ ކޮމްޕްލެއިންސް ބިއުރޯއަށް ހުށައަޅާފައިވާކަން ހާމަވެފައިވާކަމަށާއި، ނަމަވެސް އިލެކްޝަންސް ކޮމިޝަނުން އެ މައްސަލަތައް ނުބަލާ، ބިއުރޯ އުވާލުމަށް މަސައްކަތްކުރަމުންދާކަމަށް ޑރ.ޚަލީލް ތުހުމަތުކުރެއްވިއެވެ.
މީގެ އިތުރުން ކޮމްޕްލެއިންސް ބިއުރޯގައި ހިމެނޭ ގިނަ ޢަދަދެއްގެ މުވައްޒަފުން ކުއްލި ގޮތަކަށް ވަޒީފާއިން ވަކިކުރަމުންދާކަމަށާއި މިކަންކަމުން އިންތިޚާބަކީ މިނިވަން އިންސާފްވެރި އިންތިޚާބެއް ނޫންކަން ހާމަވާކަމަށް ޑރ.ޚަލީލް ވިދާޅުވިއެވެ.
"އިއްޔެ އާއި މިއަދު ކޮމްޕްލެއިންސް ބިއުރޯގައި ހިމެނޭ ވަރަށް ގިނަ މުވައްޒަފުން ކަނޑާލަމުންދާކަން ފާހަގަކުރެވޭ. ދާއިމީ ނަތީޖާ އިއުލާންކުރުމުގެ ކުރިން އިލެކްޝަނުން ވަނީ ކޮމްޕްލެއިންސްގައި އެދިފައި އެއްވެސް މައްސަލައެއް ނެތްކަމަށް ލިއުމުން ދޭން. ނަމަވެސް އެފަދަ ލިއުމެއް ދެވެން ނެތްކަމަށް ޤައުމީ ކޮމްޕްލެއިންސް ބިއުރޯއިން ވަނީ ބުނެފައި. މިނޫނަސް އެތައް ސަތޭކަ މައްސަލަތަކެއް އެ ބިއުރޯއަށް ހުށައަޅާފައި އެބަހުރި. އެތަނުން މުވައްޒަފުންނާމެދު ކަންތައްކުރާ ގޮތުން ހައްސާސީ ގިނަ މައްސަލަތަކާއި ވޯޓު އޮޅުވާލުމުގައި ގިނަ ކަންތައް ސާބިތުވާ ހިސާބުގައި ހުރިކަން ޝައްކެއްނެތް މިންވަރަށް މިވަނީ ފާހަގަވެފައި" ޑރ. ޚަލީލް ވިދާޅުވިއެވެ.
އިންތިޚާބުގައި ކަންބޮޑުވާ ކަންތައްތަކެއް ހިނގާފައިވާކަމަށް ޕީޕީއެމުން ތުހުމަތުކުރަމުންދާއިރު، އިލެކްޝަންސް ކޮމިޝަނުން ބުނެފައިވަނީ އިންތިޚާބުގައި ޤާނޫނާއި ޚިލާފު އެއްވެސް ކަމެއް ހިނގާފައިނުވާކަމަށެވެ. އަދި އިންތިޚާބުގެ ނަތީޖާއާ ގުޅޭގޮތުން މިހާތަނަށް އެއްވެސް ފަރާތަކުން ރަސްމީކޮށް މައްސަލައެއް ހުށަހަޅާފައިނުވާކަމަށްވެސް އިލެކްޝަންސް ކޮމިޝަނުން ބުނެއެވެ.