މިއަހަރުގެ އުރީދޫ ކަލަރރަންއަށް ރަޖިސްޓްރީ ވުމުގެ ފުރުސަތު ހުޅުވާލައިފިއެވެ. ނޮވެމްބަރ 23 ވަނަ ދުވަހު ބާއްވާ މިރަން މިއަހަރު އިތުރަށް ފޯރިގަދަ ކުރުމަށްޓަކައި، ކައިޓް ފެސްޓިވަލަކާއި ފޯރިގަދަ މިއުޒިކް ޝޯއެއްވެސް ބޭއްވުމަށް ހަމަޖެހިފައިވާކަމަށް އުރީދޫއިން ބުނެއެވެ.
މި ފެސްޓިވަލް ބާއްވަނީ ކަލަރ ރަންގެ ކުރިން އެ ދުވަހުގެ ހެނދުނު ހުޅުމާލޭގައިކަމަށް އުރީދޫން ބުނެއެވެ. އަދި ރަން ނިމުމަށްފަހު، ރޭގަނޑު ރާއްޖޭގެ ކުޅަދާނަ މިއުޒިކް އާޓިސްޓުންހިމެނޭ މިއުޒިކް ޝޯއެއް ބާއްވާން ވަނީ ހަމަޖެހިފައެވެ.
މި އަހަރު ކަލަރރަން ވެގެންދާނީ މުޅި ދުވަހު ކުރިއަށްދާ، އުފާވެރި ފެސްޓިވަލަކަށްކަމަށް އުރީދޫ މޯލްޑިވްސްގެ ޑައިރެކްޓަރ އޮފް ސޭލްސް އެންޑް ބްރޭންޑް، ހުސެން ނިޔާޒް ވިދާޅުވިއެވެ. ކަލަރރަންގައި ބައިވެރިވުމުގެ އެންމެ ފަހުގެ ތާރީހަކީ އޮކްޓޯބަރު މަހުގެ 15 ވަނަ ދުވަހެވެ.
ތަފާތު ހަރަކާތްތަކެއް ހިމެނޭ 5 ކިލޯމީޓަރުގެ މި ކުރުދުވުމަކީ އަލަށް ދުވާ ފަރާތްތަކާއި ޢާއްމުކޮށް ދުވާ ފަރާތްތަކަށްވެސް ބައިވެރިވެވޭގޮތަށް އިންތިޒާމުކޮށްފައިވާ އިވެންޓެއްކަމަށް އުރީދޫއިން ބުނެއެވެ. އުރީދޫ ކަލަރ ރަންގައި ކޮންމެ ކިލޯމީޓަރެއް ނިމުމުން، ބެހެއްޓިފައިވާ ކުލަ ސްޓޭޝަންތަކުން، ކުލަގަދަ ގޮތެއްގައި އެކަން ފާހަގަ ކުރާނެއެވެ. މިއީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ، ހިނގާފައާއި ޖޮގިންގައާއި، ދުވެފައި ނޫނީ ނަށަމުންވެސް މި ދުވުން ނިންމިދާނެއެވެ.
މިއީ ސިއްހަތަށް ފައިދާހުރި އަދި މަޖާ ހަރަކާތެއްގެ ގޮތުގައި ދުވުން ޕްރޮމޯޓުކުރުމަށް އުރީދޫއިން ބާއްވާ ހަރަކާތެކެވެ. މި ދުވުމުގައި ބައިވެރިވާން އެދޭ ފަރާތްތަކުން އެބޭފުޅުން ބޭނުންވާ ކަލަރ ރަން ކިޓެއް ޚިޔާރުކުރެވޭނެއެވެ.