ބައްތިރީސް ރަށެއްގައި ސާފު ބޯފެން ރައްކާކޮށް ފޯރުކޮށްދިނުމުގެ ވަސީލަތްތައް ޤާއިމުކުރުމުގެ މަސައްކަތް ބަޔަކާ ހަވާލުކޮށްފިއެވެ.
ޝީ ބިލްޑިންގގައި ބޭއްވި ޚާއްޞަ ރަސްމިއްޔާތެއްގައި ސަރުކާރުގެ ފަރާތުން މި މިކަމުގެ އެއްބަސްވުންތަކުގައި ސޮއިކުރެއްވީ އެންވަޔަރަމަންޓް މިނިސްޓަރ ޠާރިޤް އިބްރާހީމެވެ. އަދި މިމަސައްކަތް ޙަވާލުކުރި، "ވޯޓަރ އިންޖިނިއަރިންގ ސަރވިސަސް އެފް.ޒެޑް.އީ" ގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރ މުޙައްމަދު ޢަބްދުލް ކަރީމް މުޙައްމަދު އަލް ދަޝްތީއެވެ.
މި ރަސްމިއްޔާތުގައި ވާހަކަފުޅުދައްކަވަމުން އެންވަޔަންރަންމަންޓް މިނިސްޓަރ ޠާރިޤް އިބްރާހީ ވިދާޅުވީ، މި މަޝްރޫޢުގެ ދަށުން ފެން ރައްކާކުރާނީ، ޒަމާނީ އަދި ރައްކާތެރި ގޮތަކަށްކަމަށާ، ރަނގަޅު ތާންގީތަކެއްގައި ފެން ރައްކާކުރެވި، ފެން ދޫކުރުމުގެ ކުރިން ފިލްޓަރވެސް ކުރާނެކަމަށް މިނިސްޓަރ ވިދާޅުވިއެވެ.
"އަޅުގަނޑުމެން މިފަހަރު މިކުރެވޭ މަސައްކަތަކީ، އާންމުކޮށް އަތޮޅުތެރޭގައި ކަޅުހަން ބޭނުންކޮށްގެން ފެންރައްކާކުރާ ނިޒާމަށްވުރެ ރަނގަޅަށް ހެދިގެންދާ ސިސްޓަމެއް. އަރު.ޓީ.ޕީ ޓޭންކުގައި ފެން ރައްކާކުރެވިގެންވެސްދާނީ. އެހެންވީމަ މިހާރު މިޒަމާނުގައި ބޮޑަށް ފެންރތައްކާކުރަށް ބޭނުންކުރާ ތާންގީތަކެއް."
މިނިސްޓަރ ޠާރިޤް އިބްރާހީ ވިދާޅުވިއެވެ.
މި މަސައްކަތުގެ ޖުމްލަ އަގު ސަތޭކަ ތިރީސްތިން މިލިއަން ދިވެހިރުފިޔާއަށްވުރެ އިތުރުކަން ފާހަގަކުރެވެއެވެ. މި ބައްތިރީސް ރަށުގެ ތެރެއިން ފަންސަވީސް ރަށެއްގައި ބޯފެނުގެ ވަސީލަތްތައް ޤާއިމްކުރުމަށް ހަމަޖެހިފައިވަނީ ގްރީން ކްލައިމެޓް ފަންޑުގެ ހިލޭ އެހީގެ ދަށުންނެވެ. އަނެއް 7 ރަށުގައި ބޯފެނުގެ ވަސީލަތްތައް ޤާއިމުކުރުމަށް ހަމަޖެހިފައިވަނީ އޯޕެކް ފަންޑް ފޮރ އިންޓަނޭޝަނަލް ޑިވެލޮޕްމަންޓް (އޮފިޑް) ގެ ލޯނު އެހީއާއި، ދިވެހި ސަރުކާރުގެ ބަޖެޓުން ޚަރަދުކޮށްގެންނެވެ.
މިއީ އެންމެނަށް ސާފު ބޯފެން ޔަގީންކޮށްދިނުމަށް 2013 ވަނައަހަރުންފެށިގެން ސަރުކާރުން ކަނޑައަޅާފައިވާ ސިޔާސަތުގެ ދަށުން ކުރިއަށްގެންދާ މަޝްރޫޢުތަކެކެވެ.
ގްރީން ކްލައިމެޓް ފަންޑުގެ ހިލޭ އެހީގެ ދަށުން "ވޯޓަރ އިންޖިނިއަރިންގ ސަރވިސަސް އެފް.ޒެޑް.އީ" އާއި މަސައްކަތް ހަވާލުކުރި 25 ރަށަކީ، އއ.ހިމަންދޫ، އއ.ބޮޑުފޮޅުދޫ، އއ.މަތިވެރި، އދ.ކުނބުރުދޫ، އދ.ދިގުރަށް، ދ.ބަނޑިދޫ، ދ.މީދޫ، ދ.ހުޅުދެލި، ތ.ވަންދޫ، ތ.ގާދިއްފުށު، ތ.އޮމަދޫ، ތ.ކަނޑޫދޫ، ތ.ކިނބިދޫ، ތ.ދިޔަމިގިލި، މ.ރަތްމަންދޫ، މ.ވޭވަށް، މ.ނާލާފުށި، ގއ.ނިލަންދޫ، ގއ.މާމެންދޫ، ގއ.ކޮޑޭ، ގދ.ނަޑެއްލާ، ގދ.ހޯޑެއްދޫ، ގދ.ފިޔޯރީ، ގދ.ރަތަފަންދޫ އަދި ގދ.ފަރެސްމާތޮޑާއެވެ.
މި މަސައްކަތް ހަވާލުކުރެވިފައިވަނީ އެއްބަސްވުމުގައި ސޮއިކުރާތާ 10 މަސްދުވަހުގެ ތެރޭގައި މަސައްކަތް ނިންމާގޮތަށެވެ.
އޮޕެކް ފަންޑް ފޮރ އިންޓަނޭޝަނަލް ޑިވެލޮޕްމަންޓް ލޯން އެހީއާއި ދިވެހި ސަރުކާރުގެ ބަޖެޓުން ޚަރަދުކުރާގޮތަށް "ވޯޓަރ އިންޖިނިއަރިންގ ސަރވިސަސް އެފް.ޒެޑް.އީ" އާއި މަސައްކަތް ހަވާލުކުރެވުނު 7 ރަށަކީ، ހދ.ކުމުންދޫ، ހދ. ވައިކަރަދޫ، ހދ. ނޮޅިވަރަމް، ހދ. މަކުނުދޫ، ނ. ހޮޅުދޫ، ރ.އިނގުރައިދޫ އަދި ރ. މާކުރަތެވެ. މި ރަށްރަށުގައި ބެހެއްޓުމަށް ހަމަޖެހިފައިވަނީ ލޮނުފެން މީރުފެނަށް ހަދާ ޕްލާންޓާއި، ފެން ރައްކާކުރާ ތާނގީއާއި އެއާއި ގުޅުންހުރި ވަސީލަތްތަކެވެ.