ސާފް ސުޒުކީ ކަޕްގެ ޗެމްޕިއަންކަން ހޯދި ރާއްޖޭގެ ޤައުމީ ފުޓުބޯޅަ ޓީމާއެކު ވެލާނާ އިންޓަނޭޝަނަލް އެއަރޕޯޓުގެ އާރަންވޭގައި ފުރަތަމަ ޖައްސާ މަތިންދާބޯޓު ރާއްޖެއައުމަށް ދަތުރުފަށައިފިއެވެ.
މިއީ ދުނިޔޭގައި އުދުހޭ އެންމެ ބޮޑެތި ބޯޓުތަށްކަމަށްވާ އެއާބަސް އޭ380 މަރުކާގެ ބޯޓެކެވެ. ޔޫއޭއީގެ އަބޫ ދާބީން ފުރައިގެން އަންނަ މި ބޯޓު ވެލާނާ އިންޓަނޭޝަނަލް އެއަރޕޯޓްގައި ޖައްސާނެކަމަށް ލަފާކޮށްފައިވަނީ މިއަދު ހަވީރު 4 ޖަހާކާހާއިރުއެވެ.
ސާފްސުޒުކީ ކަޕްގެ ޗެންޕިއަންކަން ހޯދައިގެން ތައްޓާއެކު ދިވެހި ޤައުމީ ޓީމް މި ބޯޓުގައި އަންނައިރު، ޓީމު މިހޯދި ކާމިޔާބީއަށް މަރުޙަބާކިޔުމަށް މުޅިޤައުމު ވަނީ ތައްޔާރުވެފައެވެ. މި ބޯޓު ޖެއްސުމާއެކު، ވެލާނާ އިންޓަނޭޝަނަލް އެއަރޕޯޓްގެ އައުރަންވޭ ހުޅުވުމުގެ ގޮތުން ކުލަގަދަ ރަސްމިއްޔާތެއް އެއަރޕޯޓްގައި ބޭއްވުމަށްވެސް ވަނީ ހަމަޖެހިފައެވެ.
މި ރަންވޭގައި ފުރަތަމަ ޖައްސާނީ އިއްތިހާދު އެއާވޭސްގެ މަތިންދާބޯޓެކެވެ. މި ބޯޓު ދުއްވަމުންދަނީވެސް ދިވެހި ޕައިލެޓެކެވެ. ބޯޓު ހުޅުލެއަށް ޖެއްސުމުގެ ކުރިން 1،000 ފޫޓަށް ތިރިކޮށް، މާލެ ވަށައި ބުރެއް ޖަހާނެކަމަށް އެމްއޭސީއެލްއިން ބުނެއެވެ.
މަތިންދާބޯޓު ޖެއްސުމަށް ފަހު ޕެރަޝޫޓާ އެކު އެއާޕޯޓަށް ދިވެހި ސިފައިން ފުންމާލުމުގެ ހަރަކާތެއްވެސް އޮންނާނެއެވެ. އެ ހަރަކާތަށް ފަހު ހަ ސީޕްލޭން 200 ފޫޓު މަތިން މާލެ ވަށައި ބުރެއް ޖެހުމަށްވެސް ހަމަޖެހިފައިވެއެވެ. މިޙަރަކާތް ކުރިޔަށްދާނީ ސިނަމާލެ ބްރިޖް ކައިރިންނެވެ.
ވެލާނާ އިންތަނޭޝަނަލް އެއަރޕޯޓުގެ އައު ރަންވޭގެ ދިގުމިނުގައި 3400 މީޓަރު އަދި ފުޅާމިނުގައި 60 މީޓަރު ހުރެ އެވެ.