ދިވެހިރާއްޖޭގެ ޤައުމީ ޔުނިވަރސިޓީން އިންތިޒާމްކުރި މިއަހަރުގެ ރިޔާސީ ބަހުސް 2018 ބާއްވައިފިއެވެ.
ރިޔާސީ ބަހުސަކީ ކޮންމެ ރިޔާސީ އިންތިޚާބަކާ ދިމާކޮށް ބާއްވަމުން އަންނަ ޢާންމުންގެ މަޤްބޫލްކަން ވަރަށް ބޮޑަށް ލިބިފައިވާ ހަރަކާތެކެވެ.
ރިޔާސީ ކެންޑިޑޭޓުންގެ ބަހުސްގައި ބައިވެރިވެވަޑައިގަތުމުގެ ދަޢުވަތު، ރިޔާސީ އިންތިޚާބުގައި ވާދަކުރާ ދެކެނޑިޑޭޓުންނަށްވެސް ޤައުމީ ޔުނިވާސިޓީން އެރުވިއެވެ. ނަމަވެސް މި ދައުވަތު ޤަބޫލުފުޅުކުރައްވާ ބަހުސްގައި ބައިވެރިވެވަޑައިގަތީ ޕީޕީއެމްގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އެކަނި. އިދިކޮޅު ކެނޑިޑޭޓް ބަހުސްގައި ބައިވެރިއެއްނުވެއެވެ.
ރިޔާސީ ބަހުސަކީ ޢިލްމީ އަދި ހުރިހާ ގޮތަކުންވެސް ރައްޔިތުން ބަލައިގަންނަ ބަހުސަކަށްވާއިރު، މިބަހުސްގައި ރައީސް ޔާމީން އެމަނިކުފާނު ކުރިއަށް އޮތް ދައުރުގައި ގެންގުޅުއްވާނެ ސިޔާސަތުތައް އަދި ތަސައްވުރުތައް ހާމަކުރައްވާފައެވެ. ޚާއްޞަކޮށް ރާއްޖެއަށް ކުރިއަށް އޮތް ދައުރުގައި ގެންނަވާނެ ތަރައްޤީގެ މަޝްރޫޢުތަކާއި އިޤްތިޞާދީގޮތުން ފުދުންތެރި ޤައުމަކަށް ރާއްޖެ ހެދުމަށް ގެންގުޅުއްވާނޭ ސިޔާސަތުތައް އެމަނިކުފާނު ހާމަކުރެއްވިއެވެ.
މިބަހުސް ބެލި ރައްޔިތުން ވަނީ މި ބަހުސްގައި ރައީސް ޔާމީން ހާމަކުރެއްވި ސިޔާސަތުތަކީ އުއްމީދުން ފުރިގެންވާ އަދި ރައްޔިތުންނަށް އުފާވެރި ދިރުއުޅުމަކަށް މަގުފަހިކުރުވާނެ ސިޔާސަތުތަކެއްކަމަށް ބުނެފައެވެ. އަދި ޤައުމު މުޅިން ތަރައްޤީގެ އައު ޒަމާނަކަށް ގެންދާނެ އުއްމީދީ ވާހަކަތަކެއް ބަހުސުން އިވިގެންދިޔަކަން ބައެއް ފަރާތްތަކުން ފާހަގަކުރިއެވެ.
ރިޔާސީ ބަހުސްގައި ޕީޕީޢެމްގެ ރިޔާސީ ކެނޑިޑޭޓް، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ބައިވެރިވެވަޑައިގެންނެވިއިރު، އިދިކޮޅު ރިޔާސީ ކެނޑިޑޭޓް އިބްރާހީމް މުޙައްމަދު ޞާލިޙު މިފަހަރުގެ ރިޔާސީ ބަހުސްގައި ބައިވެރިވަޑައިގަތުމަށް ނިންމެވުމަށްފަހު، ފަހުން ވަނީ ނިންމެވުން އަނބުރާ ގެންދަވާފައެވެ.
ރިޔާސީ ބަހުސްގައި އިދިކޮޅު ކެނޑިޑޭޓް ބައިވެރިވެވަޑައިނުގަތުމުގެ ސަބަބުން ގިނަ ބައެއްގެ ފާޑުކިއުން އޭނާއަށް އަމާޒުވިއެވެ. ބައެއް ފަރާތްތަކުން ބުނީ އެމްޑީޕީގެ ކެނޑިޑޭޓް ޤައުމާމެދު ޚާއްޞަ ތަސައްވުރެއް ސިޔާސަތެއް ނުގެންގުޅޭކަމަށެވެ. އަދި ބަހުސްގައި ބައިވެރިވެވަޑައިނުގަތީ އެމްޑީޕީން ޤައުމުގައި ހިންގާނެ އައު ތަރައްޤީގެ މަޝްރޫޢުއެއް ނެތުމުންކަމަށްވެސް ބައެއް ފަރާތްތަކުން ބުންޏެވެ.
ބައެއް ފަރާތްތަކުން ވަނީ އިދިކޮޅު ކެނޑިޑޭޓް ބަހުސްގައި ބައިވެރިނުވުމުގެ ސަބަބުން އެމަނިކުފާނުގެ ޢިލްމީ ޤާބިލްކަމާމެދުވެސް ސުވާލު އުފައްދާފައެވެ.
މި ފަހަރުގެ ރިޔާސީ ބަހުސް ކުރިއަށްގެންދިއުމަށް ހަމަޖެހިފައިވަނީ 2 ފިޔަވައްސަކަށް ބަހާލައިގެން، ރިޔާސީ ކެނޑިޑޭޓްގެ ބަހުސް ނިމިގެން ގޮސްފައިވާއިރު، މެނިފެސްޓޯ ބަހުސް މި ހަފުތާގެ ފަހުކޮޅު ބޭއްވުމަށް މަސައްކަތްކުރަމުންގެންދާކަމަށް ދިވެހި ޤައުމީ ޔުނިވަރސިޓީން ބުނެއެވެ.
ދިވެހިރާއްޖޭގެ ޤައުމީ ޔުނިވާސިޓީން އިންތިޒާމްކޮށްގެން ބޭއްވި ރިޔާސީ ބަހުސް 2018 އަށް ރާއްޖޭގެ އެކިކަންކޮޅުތަކުން ވަނީ ޢާއްމުންގެ ވަރަށްބޮޑު ތަރުޙީބެއް ލިބިފައެވެ. ބަހުސް ކުރިއަށް ދިޔަ ވަގުތު ރާއްޖޭގެ އެކިކަންކޮޅުތަކުން އެތައްހާސް ބަޔަކު ވަނީ މި ބަހުސް ވަގުތުން ބަލާފައެވެ.