ވެލާނާ އިންޓަރނޭޝަނަލް އެއަރޕޯޓުގެ އައު ރަންވޭ ރަސްމީގޮތުން ހުޅުވުން މިމަހުގެ 18 ވާ އަންގާރ ދުވަހު ބާއްވާގޮތަށް ހަމަޖައްސައި، އާ ރަންވޭގައި ޖައްސާ ފުރަތަމަ ފްލައިޓް އޭ-380 ގެ މަތިންދާ ބޯޓަށް މަރުޙަބާ ކިޔުމުގެ ގޮތުން ޙާއްސަ ޙަރަކާތްތަކަކާއެކު ކުލަ ގަދަ ރަސްމިއްޔާތެއް ބާއްވަން ނިންމައިފިއެވެ.
ރާއްޖޭގެ އިޤްތިޞާދީ މައިދޮރާށިކަމަށްވާ ވެލާނާ އިންޓަރނޭޝަނަލް އެއަރޕޯޓުން ފޯރުކޮށްދޭ ޚިދުމަތްތަކުގެ ފެންވަރު މަތިކުރުމަކީ ސަރުކާރުން ވަރަށް ޚާއްސަ އިސްކަމެއްދީގެން ކުރަމުން އަންނަ މަސައްކަތެކެވެ. އެގޮތުން ރާއްޖޭގެ ތާރީޚުގައި ހިންގާ އެންމެ އަގުބޮޑު އެއް މަޝްރޫޢާއެކު މުޅި އެއަރޕޯޓު މިވަނީ އިންޤިލާބީ ބަދަލަކާ ދިމާއަށް މިސްރާބު ޖަހާފައެވެ.
މި މަޝްރޫޢުގެ ތެރޭގައި ހިމެނޭ އެންމެ މުހިއްމު އެއް މަސައްކަތަކީ އާ ރަންވޭގެ މަސައްކަތެވެ. ދުނިޔޭގައި އޮޕަރޭޓްކުރާ އެންމެ ބޮޑެތި މަތިންދާބޯޓު ކަމުގައިވާ A380 މަރުކާގެ ބޯޓު ފަހަރަށްވެސް ފަސޭހަކަމާއެކު ޖެއްސޭނެހެން ފަރުމާކުރާ މި ރަންވޭއަކީ 3400 މީޓަރު ދިގު އަދި 65 މީޓަރު ފުޅާ ރަންވޭއެކެވެ.
އެއަރޕޯޓް ތަރައްޤީކުރުމަށް ސަރުކާރުން ހިންގާ މަޝްރޫޢުގެ ދަށުން ގާތްގަނޑަކަށް 77 ހެކްޓަރުގެ ބިން ހިއްކާފައިވާއިރު، އާ ރަންވޭއަށް ބޭނުންވާ ސަރަހައްދުގެ ފަސްގަނޑު ލެވެލްކޮށް ނިންމައި ސަބް-ބޭސް އެޅުމުގެ މަސައްކަތް ފަށާފައިވަނީ 2016 ވަނަ އަހަރުގެ ޖޫންމަހުގެ ތެރޭގައެވެ. އަދި ސަބް-ބޭސް އެޅުމުގެ މަސައްކަތް ނިންމާ ތާރުއެޅުމުގެ މަސައްކަތް ފަށާފައިވަނީ މިއަހަރުގެ މާރޗްމަހުގެ ތެރޭގައެވެ. ގާތްގަނޑަކަށް 6 މަސްދުވަހުގެ މަސައްކަތަށްފަހު، މިހާރު އައު ރަންވޭގައި ތާރުއަޅާ ނިންމާލާފައިވާއިރު، މިވަގުތު ކުރަމުންދަނީ އައު ރަންވޭ އޮޕަރޭޝަނަށް ގެނައުމަށްޓަކާ އިދާރީގޮތުން ވާންޖެހޭ ތައްޔާރީތަކެވެ.
އެއަރޕޯޓުގެ އައު ރަންވޭއަށް ޓެސްޓް ފްލައިޓް ޖެއްސުމަށްޓަކާ ވަމުންދާ އެންމެ ފަހުގެ ތައްޔާރީތަކާ ގުޅޭގޮތުން ނޫސްވެރިންނަށް މަޢުލޫމާތުދެއްވަމުން އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވީ، އެއަރޕޯޓު ތަރައްޤީކުރުމުގެ ބިޔަ މަޝްރޫޢަކީ މުޅި ރާއްޖޭގެ ކުރިމަގާ ގުޅިފައިވާކަމެއް ކަމުން، މި މަޝްރޫޢުގެ ދަށުން ލިބޭ ކޮންމެ ކުރިއެރުމެއްގައިވެސް ދިވެހި ރައްޔިތުން ބައިވެރިކުރުވަން ސަރުކާރުން ބޭނުންވާކަމަށެވެ. އެގޮތުން މިމަހުގެ 18 ވަނަ ދުވަހު އައު ރަންވޭއަށް ފުރަތަމަ ފަހަރަށް A380 ގެ މަތިންދާބޯޓެއް ޖެއްސުމަށް ހަމަޖެހިފައިވާއިރު، އެކަން ވަރަށް ކުލަގަދަކޮށް ފާހަގަކުރުމަށް ސަރުކާރުން ނިންމާފައިވާކަމަށާއި، މިއީ އާއްމުކޮށް ހުޅުވާލެވިގެން ކުރިއަށްދާނެ ހަރަކާތެއްކަމަށް މިނިސްޓަރ ސަޢީދު ވިދާޅުވިއެވެ.
އޭމް.އޭ.ސީ.އެލްގެ ފަރާތުން ވާހަކަދައްކަވަމުން އެކުންފުނީގެ މެނޭޖިންގ ޑިރެކްޓަރ ޢާދިލް މޫސާ ވިދާޅުވީ، އެއަރޕޯޓުގެ އައު ރަންވޭއަށް ޓެސްޓް ފްލައިޓް ޖެއްސޭވަރަށް މިހާރު އެކުންފުނިން ތައްޔާރުވެފައިވާކަމަށެވެ. އަދި ފުރަތަމަ ޓެސްޓް ފްލައިޓަށް މަރުޙަބާ ކިޔުމުގެ ގޮތުން ޚާއްސަ ހަރަކާތްތަކެއް ކުރިއަށްގެންދިއުމަށް ހަމަޖެހިފައިވާއިރު، ތަފާތު ކަންތައްތަކެއް ފެނިގެންދާނެކަން އޭނާ ފާހަގަކުރެއްވިއެވެ.
ވެލާނާ އިންޓަރނޭޝަނަލް އެއަރޕޯޓުގެ އައު ރަންވޭގެ މަސައްކަތް ކުރިއަށް ގެންގޮސްފައިވަނީ ޗައިނާގެ ބެއިޖިންގ އަރބަން ކޮންސްޓްރަކްޝަން ގްރޫޕް، ބީ.ޔޫ.ސީ.ޖީއާއި ހަވާލުކޮށްގެންނެވެ. އެންމެފަހުގެ ޒަމާނީ ވަސީލަތްތަކާއެކު ކޯޑް-އެފްގެ ފެންވަރުގައި ތަރައްޤީކޮށްފައިވާ މި ރަންވޭއަކީ ބައިނަލްއަޤްވާމީ މިންގަނޑުތަކަށް ފެތޭނެހެން ތަރައްޤީކޮށްފައިވާ ރަންވޭއެކެވެ. އަދި މިއީ ރާއްޖޭގެ އިޤްތިޞާދަށާއި، ފަތުރުވެރިކަން ފުޅާކުރުމަށް ހުޅުވިގެންދާ މުހިއްމު ދޮރެއްގެ ގޮތުގައި ދިވެހި ސަރުކާރުން ސިފަކުރެއެވެ.