ތިލަކޮށް ވައުދުވުމަކީ ޖަޒީރާ ކޮންސެޕްޓްގައި ހިމެނޭކަމެއްކަމަށް އެންވަޔަރަމަންޓް މިނިސްޓަރ ޠާރިޤް އިބްރާހީމް ވިދާޅުވެއްޖެއެވެ.
ހައްދުންމަތީ ބޮޑު މަގު ހުޅުވުމާއި، ފޮނަދޫގައި ޤާއިމްކޮށްފައިވާ ފެނުގެ ޚިދުމަތް ފެށުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރ ޠާރިޤް އިބްރާހީމް ވިދާޅުވީ، އިދިކޮޅު ރިޔާސީ ކެނޑިޓޭޑް ވައުދުވެވަޑައިގަންނަނީ ވަރަށް ތިލަކޮށްކަމަށާއި، ވިދާޅުވާ އެއްޗެއްގެ އެއްވެސް ތަފްސީލެއް ރައްޔިތުންނަށް ނުދެއްވާކަމަށެވެ. އޭގެ ބޭނުމަކީ ރައްޔިތުންނަށް އޮޅުވާލުންކަމަށް މިނިސްޓަރ ވިދާޅުވިއެވެ.
ރައީސް ޔާމީން ވެވަޑައިގަންނަވާ ކޮންމެ ވައުދަކީވެސް އޭގެ ތަފްސީލް ރައްޔިތުންނަށް ދެއްވާ ވައުދެއްކަމަށް މިނިސްޓަރ ވިދާޅުވިއެވެ.
މި ސަރުކާރުގެ 5 އަހަރުދުވަހުގެ ތެރޭގައި 30 ދާއިރާއަކުން ރާއްޖޭގެ އެކި ކަންކޮޅުތަކުގައި 2824 މަޝްރޫޢު ކުރިއަށްގެންގޮސްފައިވާކަމަށް މިނިސްޓަރ ޠާރިޤް ވިދާޅުވިއެވެ. އަދި ލ. އަތޮޅުގައި އެކަނިވެސް މި ސަރުކާރުން ތަރައްޤީގެ 170 މަޝްރޫޢު ހިންގާފައިކަން މިނިސްޓަރ ފާހަގަކުރެއްވިއެވެ.