ކޯލިޝަނެއްގެ ތެރެއިން ވެރިކަމަށް އަންނަ ވެރިޔަކަށް އެއްވެސް ބާރެއް ނޯންނާނެކަމަށް ހައުސިންގ މިނިސްޓަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ހައްދުންމަތީ ބޮޑު މަގު ހުޅުވުމާއި، ފޮނަދޫގައި ޤާއިމްކޮށްފައިވާ ފެނުގެ ނިޒާމުގެ ޚިދުމަތް ރަސްމީކޮށް ފެށުމުގެ ރަސްމިއްޔާތުގައި ވާހަކަފުޅުދައްކަވަމުން ހައުސިން މިނިސްޓަރ ޑރ. މުޙައްމަދު މުޢިއްޒު ވިދާޅުވީ، އިދިކޮޅު ކޯލިޝަނުގައި ތިބީ އެކަކު އަނެކަކަށް ހެޔޮ އެދިގެން އުޅޭ ބައެއް ނޫންކަމަށެވެ. އަދި ކޯލިޝަންގެ ތެރެއިން އަންނަ ރައީސްއަކީ އެއްވެސް ބާރެއް ނެތް ވެރިއެއްކަމަށް މިނިސްޓަރ ވިދާޅުވިއެވެ.
މިނިސްޓަރ ޑރ. މުޙައްމަދު މުޢިއްޒު ވިދާޅުވީ، އެމްޑީޕީން ވެރިކަމާ ހަވާލުވި 3 އަހަރަކީ ރާއްޖޭގެ ތަރައްޤީ ފަހަތަށްދިޔަ ދުވަސްތަކެއްކަމަށެވެ. އަދި މި ސަރުކާރުން ރާއްޖޭގެ އެކި ކަންކޮޅުތަކުގައި ތަރައްޤީގެ ގިނަ މަޝްރޫޢުތަކެއް ކުރިއަންގެންދަމުންދާކަން މިނިސްޓަރ ވަނީ ފާހަގަކުރައްވާފައެވެ.
ހައުސިންގ މިނިސްޓަރގެ ވާހަކަފުޅުގައި ލ. ފޮނަދޫގެ މަގުތަކުގައި ތާރުއެޅުމުގެ މަސައްކަތް ވަރަށް އަވަހަށް ފެށިގެންދާނެކަމަށް ވިދާޅުވިއެވެ. އެގޮތުން އެއްފަހަރާ 2 ސަރަހައްދުގައި ތާރުއެޅުމުގެ މަސައްކަތް ފަށާ ތާރުއަޅަންޖެހޭ ހުރިހާ މަގެއްގައި ވަރަށް އަވަހަށް ތާރުއަޅައި ނިމޭނެކަމުގެ އުފާވެރި ޚަބަރު ހައުސިންގ މިނިސްޓަރ ދެއްވިއެވެ.