ރިއަލް އެސްޓޭޓް ވިޔަފާރީގެ ދާއިރާއާއި، ޢިމާރާތްކުރުމުގެ ދާއިރާއިން ބައިނަލްއަޤްވާމީ ފެންވަރުގައި ދެވޭ އެވޯޑެއްކަމަށްވާ "ސިޓީސްކޭޕް އެވޯޑްސް 2018" ފައިނަލިސްޓުންގެ ތެރޭގައި ހުޅުމާލެ ތަރައްޤީކުރުމުގެ މަޝްރޫޢު ހިމެނިއްޖެއެވެ.
"ސިޓީސްކޭޕް އެވޯޑްސް 2018" އަކީ ރިއަލް އެސްޓޭޓް ވިޔަފާރީގެ ދާއިރާގައި ޙަރަކާތްތެރިވާ ބައިނަލްއަޤްވާމީ ކުންފުނިތަކަށް އަމާޒުކޮށްގެން ބޮޑެތި އެގްޒިބިޝަންތަކާއި، ކޮންފަރެންސްތައް ބޭއްވުމުގައި ދުނިޔޭގެ ފެންވަރުގައި ފާހަގަކޮށްލެވޭ ދުބާއީގެ މަޝްހޫރު ނެޓްވޯކެއްކަމަށްވާ ސިޓީސްކޭޕް ގްލޯބަލްއިން ދެމުން އަންނަ އެވޯޑެކެވެ. ޓްރޭޑް ޝޯވއެއްގޮތަށް ކުރިއަށްގެންދާ މި އެވޯޑަކީ ދުބާއީގެ ރިއަލް އެސްޓޭޓް ކުންފުނިތަކުގެ އިތުރުން ސަރަޙައްދީ، އަދި ބައިނަލްއަޤްވާމީ އިންވެސްޓަރުންނާއި، ޑިވެލޮޕަރުންނާއި، އާކިޓެކްޗަރުންނާއި، ޑިޒައިންނަރުންގެ އިތުރުން ސަރުކާރު ކުންފުނިތަކާއި، އަމިއްލަ ކުންފުނިތަކަށް ހުޅުވާލެވިގެން ދެމުންދާ އެވޯޑެކެވެ.
"ސިޓީސްކޭޕް އެވޯޑްސް 2018" ގެ ފައިނަލިސްޓުންގެ ގޮތުގައި ހުޅުމާލޭ ނޮމިނޭޓްވެފައިވަނީ "މާސްޓަރޕްލޭން ޕްރޮޖެކްޓް އެވޯޑް"ގެ ކެޓަގަރީންނެވެ. މި ކެޓެގަރީއަށް ޖުމްލަ 5 ފަރާތެއް ނޮމިނޭޓްވެފައިވާއިރު، ހުޅުމާލޭގެ އިތުރުން ދެން ނޮމިނޭޓްވެފައިވަނީ ހުސް ޔޫ.އޭ.އީއަށް ނިސްބަތްވާ ކުންފުނިތަކެވެ. ޒުވާނުންގެ ސިޓީގެ ގޮތުގައި ސަރުކާރުން ތަރައްޤީކުރާ ހުޅުމާލެއަކީ ރާއްޖޭގައި ނިސްބަތުން އެންމެ ގިނަ ރިއަލްއެސްޓޭޓް މަޝްރޫޢުތައް މިވަގުތު ކުރިއަށްދާ ސަރަޙައްދެވެ.
އެންމެފަހުގެ ޒަމާނީ ވަސީލަތްތަކާއެކު ސްމާޓް ސިޓީއެއްގެގޮތުގައި ހުޅުމާލެ ތަރައްޤީވަމުންދާއިރު، ހުޅުމާލޭ 2 ވަނަ ފިޔަވަހީގެ ނަމުގައިވެސް ސަރުކާރުން އަންނަނީ މެގަރ ޕްރޮޖެކްޓެއް ހިންގަމުންނެވެ. މި އެވޯޑުގެ ފައިނަލިސްޓުންގެ ތެރޭގައި ހުޅުމާލެ ނޮމިނޭޓްވެފައިވާއިރު، ހުޅުމާލެ ފުރަތަމަ ފިޔަވައްސާއި، ދެވަނަ ފިޔަވަހި ތަރައްޤީކުރުމަށް ސަރުކާރުން އެކުލާވާލާފައިވާ މާސްޓަރޕްލޭނަށް ތަފާތު އިންވެސްޓްމަންޓް ފޯރަމްތަކާއި، ޓްރޭޑް ޝޯވތަކުގައި ބޭރުގެ އިންވެސްޓަރުންގެ ސަމާލުކަން ލިބި، ރާއްޖޭގައި އިންވެސްޓްކުރުމަށް ޝަޢުގުވެރިކަންފާޅުކުރަމުންދެއެވެ.
"ސިޓީސްކޭޕް އެވޯޑްސް 2018" ގެ 15 ވަނަ އެޑިޝަންގެ ނަތިޖާތައް އިޢުލާން ކުރާނީ އަންނަމަހުގެ 2 އިން 4 އަށް ދުބާއީ ވޯލްޑް ޓްރޭޑް ސެންޓަރުގައި ބާއްވާ ޙާއްސަ ރަސްމިއްޔާތެއްގައެވެ. ރިއަލް އެސްޓޭޓް ވިޔަފާރިއާއި ގުޅުންހުރި ތަފާތު 14 ދާއިރާއަކުން މި ފަހަރުގެ އެވޯޑް ދިނުމަށް ވަނީ ހަމަޖެހިފައެވެ.