މިމަހުގެ 23 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވޯޓު ދިނުމުގެ ހައްޤުލިބިފައިވާ މީހުންގެ ފައިނަލް ވޯޓަރސް ލިސްޓް އިލެކްޝަންސް ކޮމިޝަނުން އާއްމުކޮށްފިއެވެ.
ރަށްވެހިވެފައިވާ ތަން ނޫން އެހެންތަނެއްގައި ވޯޓުލާން ބޭނުންވާ ފަރާތްތަކަށް ރީ-ރަޖިސްޓްރޭޝަންގެ މަރުހަލާ ނިންމުމަށްފަހު ފައިނަލް ވޯޓަރސް ލިސްޓު އިލެކްޝަންސް ކޮމިޝަނުންގެ ރަސްމީ ވެބްސައިޓަށް މިހާރު ވަނީ އަޕްލޯޑުކޮށްފައެވެ. އަދި VR ޖެހުމަށްފަހު ހުސްތަންކޮޅެއް ދޫކުރައްވާ އައި.ޑީ ކާޑު ނަންބަރު ޖެހުމަށްފަހު 1414 އެސް.އެމް.އެސް ކުރުމުންވެސް އެމީހަކު ވޯޓުލުމަށް ހަމަޖެހިފައިވާ ފޮށީގެ މަޢުލޫމާތު ޗެކްކުރެވޭނެ ކަމަށް އިލެކްޝަންސް ކޮމިޝަނުން ބުނެއެވެ.
މިއަހަރުގެ ރިޔާސީ އިންތިޚާބުގައި ޖުމްލަ ދެލައްކަ ފަސްދޮޅަސް ދެހާސް އެއްސަތޭކަ ތިރީސް ފަސް މީހުންނަށް ވޯޓުލުމުގެ ހައްޤުވަނީ ލިބިފައެވެ. ރީ-ރަޖިސްޓްރޭޝަން މަރުހަލާ ނިންމުމަށްފަހު ވޯޓު ފޮށި ބަހައްޓާނެ ޢަދަދުތަކަށްވެސް އިލެކްޝަންސް ކޮމިޝަނުން މިހާރުވަނީ ބަދަލުގެނެސްފައެވެ.
އެގޮތުން ރިޔާސީ އިންތިޚާބަށް ވޯޓުލުމަށްޓަކައި ބެހެއްޓުމަށް އެކޮމިޝަނުން ނިންމާފައިވަނީ ޖުމްލަ 472 ވޯޓު ފޮއްޓެވެ. މީގެ ތެރޭގައި ހިމެނެނީ މާލޭގައި ބެހެއްޓުމަށް ހަމަޖެހިފައިވާ 122 ފޮށްޓާއި، މާލޭ ސިޓީ ފިޔަވައި އެހެން ސިޓީތަކާއި އަތޮޅުތައް ހިމެނޭހެން 302 ފޮށްޓާއި، ރިސޯޓުތަކުގައި 35 ފޮށްޓާއި، ޖަލުތަކާއި ސިނާޢީ މަސައްކަތް ކުރާ ތަންތަނުގައި ބަހައްޓާ 8 ފޮށްޓެއްގެ އިތުރުން ރާއްޖޭން ބޭރުގައި ބަހައްޓާ 5 ވޯޓުފޮއްޓެވެ.