ހދ. ކުޅުދުއްފުށީގައި އެއަރޕޯޓް އެޅުމަށް ބޭނުންވާ ސަރަޙައްދުގައި ހުރި ގޯތިތައް ހުސްކުރުމުގެ މަސައްކަތް ފަށައިފިއެވެ.
ކުޅުދުއްފުށީ އެއަރޕޯޓް އެޅުމަށް ބޭނުންވާ ސަރަޙައްދުގައި އާއްމުންގެ 18 ގޯއްޗެއް ހުރިއިރު، މަޢުލޫމާތު ލިބިފައިވާގޮތުން މީގެ ތެރެއިން މިވަގުތު މީހުން ދިރިއުޅެމުންދަނީ 9 ގޯއްޗެއްގައެވެ.
މިކަމާއި ގުޅޭގޮތުން ޕީ.އެސް.އެމް ނިއުސްއަށް މަޢުލޫމާތުދެއްވަމުން ރީޖަނަލް އެއަރޕޯޓްސްގެ ޑިރެކްޓަރ ސާމީ އަޤީލް ވިދާޅުވީ، ކުޅުދުއްފުށީ އެއަރޕޯޓުގެ މަސައްކަތް ބާރު ދުވެލީގައި ކުރިއަށްދާއިރު، އެއަރޕޯޓު އަޅާ ސަރަޙައްދުން ހުސްކުރަން ޖެހޭ ގޯތިތައް ހުސްކުރުމުގެ މަސައްކަތް އެރަށުގެ ރައްޔިތުންނާއި ގުޅިގެން ކުރަމުންދާކަމަށެވެ. އެގޮތުން ގޯތިތައް ހުސްކުރުމާއި، ބަދަލުދިނުމުގެ ކަންކަން ކުރުމަށްޓަކާ ޝަރީޢަތުގެ މަރުޙަލާގައި ނިންމަންޖެހޭ ހުރިހާ ކަމެއް މިހާރު ނިމިފައިވާކަމަށްވެސް އޭނާ ވިދާޅުވިއެވެ.
ސާމީ އަޤީލް ވިދާޅުވީ، އެއަރޕޯޓު އަޅާ ސަރަޙައްދުގައި ހުރި ގެތައް ހުސްކުރުމަކީ ކުއްލިއަކަށް ސަރުކާރުން ނިންމި ނިންމުމެއް ނޫންކަމަށާއި، ގޯތިތައް ހުސްކުރުމަށް އެގޯތިތަކުގެ ވެރިފަރާތާއެކު މަޝްވަރާކުރުމުގެ ކަންކަން ޝަރީޢަތުގެ މަރުޙަލާ ފެށުމުގެ ކުރިން ފަށާފައިވާކަމަށެވެ. އަދި އެއާރޕޯޓު އަޅާ ސަރަޙައްދުން ހުސްކުރުމަށް ހަމަޖެހިފައިވާ 18 ގޯތީގެ ތެރެއިން، މީހުން ދިރިއުޅޭ ގޯތިތަކުގެ ޢާއިލާތަކަށް ބަދަލުގައި ސަރުކާރުން އަޅައިދޭ ގޯތީގެ މަސައްކަތް ނިމި، އެތަނަށް ބަދަލުވެވެންދެން، ތަނެއް ކުއްޔަށް ހިފައިގެން އުޅުމަށްޓަކާ 8 ހާހާއި، 10 ހާހާއި ދެމެދުގެ ޢަދަދެއް ކޮންމެ މަހަކުވެސް ދަޢުލަތުގެ ފަރާތުން އެ އާއިލާތަކަށް ދިނުމަށް ހަމަޖެހިފައިވާކަމަށް ސާމީ އަޤީލް ވިދާޅުވިއެވެ.
ކުޅުދުއްފުށީ އެއަރޕޯޓު އެޅުމަށް ބޭނުންވާ ސަރަޙައްދުގައި ހުރި ގެތައް ހުސްކުރުމުގެ މަސައްކަތް މިހާރު ކުރަމުންދާއިރު، މިވަގުތު އެންމެ ބޮޑު އިސްކަމެއްދީގެން ކުރަމުންދަނީ އެއަރޕޯޓުގެ ރަންވޭ ހިމެނޭ ސަރަޙައްދުގައި ހުރި 3 ގޯއްޗެއް ހުސްކުރުމުގެ މަސައްކަތް ކަމަށާއި، މި މަސައްކަތް ކުރުމުގައި އެގޯތިތަކުގެ ވެރިފަރާތުން ފުރިހަމަ އެއްބާރުލުން ދެމުންދާ ކަމަށް އޭނާ ވިދާޅުވިއެވެ.
އެމް.ޓީ.ސީ.ސީއާއި ހަވާލުކޮށްގެން ކުރިއަށްގެންދާ ކުޅުދުއްފުށީ އެއަރޕޯޓު މަޝްރޫޢުގެ ދަށުން މިވަގުތު އެންމެ ބާރު ދުވެލީގައި ކުރިއަށްދަނީ އެއަރޕޯޓުގެ ރަންވޭގައި ތާރު އެޅުމުގެ މަސައްކަތެވެ. މި މަޝްރޫޢުގެ ދަށުން އެރަށުގައި 1200 މީޓަރު ދިގު އަދި 30 މީޓަރު ފުޅާ ރަންވޭއަކާއި، ޓެކްސީވޭއާއި، އެއަރ ކްރާފްޓްތައް ޕާކު ކުރުމަށްޓަކާ އޭޕްރަނެއް ހެދުމަށް ވަނީ ހަމަޖެހިފައެވެ. މިމަހުގެ ނިޔަލަށް ކުޅުއްދުއްފުށީ އެއަރޕޯޓުގެ ރަންވޭގެ މަސައްކަތް އެއްކޮށް ނިންމާ ޓެސްޓް ފްލައިޓް ޖެއްސުމުގެ އަމާޒުގައި ސަރުކާރުންދަނީ މަސައްކަތް ކުރަމުންނެވެ.