ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އަރިއަތޮޅު ދެކުނުބުރީ ދަނގެތީ ބަނދަރު ހުޅުއްވާދެއްވާ އެރަށުގެ ފެނުގެ ޚިދުމަތް ރަސްމީކޮށް ފަށްޓަވާދެއްވައިފިއެވެ. އެމަނިކުފާނު މި ދެޚިދުމަތް ފަށްޓަވާދެއްވީ އަރިއަތޮޅު އުތުރުބުރިއާއި ދެކުނުބުރީއަށް ކުރައްވާ ދެދުވަހުގެ ދަތުރުފުޅުގެތެރެއިންނެވެ.
އަރިއަތޮޅު ދެކުނުބުރީ ދަނގެތީގައި ޤާއިމްކޮށްފައިވާ ފެނުގެ ޚިދުމަތް ރަސްމީކޮށް ފަށްޓަވައިދެއްވާ އަދި އެރަށުގައި ސަރުކާރުން ތަރައްޤީކޮށްފައިވާ ބަނދަރު ހުޅުއްވާދެއްވީ، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމެވެ.
ލަކީ އެކްސްޕޯޓް ޕްރައިވެޓް ލިމިޓެޑާ ހަވާލުކޯށްގެން އެންވަޔަރަންމަންޓް މިނިސްޓްރީން ކުރިއަށްގެންދިޔަ ދަނގެތީ ފެނުގެ މަޝްރޫޢުކީ 2016 ވަނަ އަހަރުގެ ފެބުރުއަރީ މަހު ފެށި މަޝްރޫއެކެވެ. ދައުލަތުން 25.8 މިލިއަން ރުފިޔާ ޚަރަދުކޮށްގެން ކުރިއަށްގެންދިޔަ މި މަޝްރޫޢުގެ ދަށުން ދަނގެތީގައި ވަނީ 7 ކިލޯ މީޓަރުގެ ދިގުމިނުގެ ފެނުގެވިއުގައެއް ޤާއިމްކޮށްފައެވެ. އަދި 50 ޓަނުގެ 2 ޑީސެލިނޭޝަން ޕްލާންޓް ބަހައްޓާފައިވާއިރު، ފެން ރައްކާކުރުމަށް 165 ޓަނުގެ ތާނގީއަކާއި 78 ކިއުބިކް މީޓަރ ޓަނުގެ ތާނގީއެއް ބަހައްޓާފައިވެއެވެ. އަދި މިމަޝްރޫޢުގެ ދަށުން ދަނގެތީގެ 180 ގޭބިސީއަކަށް ފެނުގެ ޚިދުމަތް ގުޅާދީފައިވެއެވެ.
ދަނގެތީގައި ތަރައްޤީކޮށްފައިވާ ބަނދަރަކީ 700 ފޫޓު ދިގު 300 ފޫޓް ފުޅާ ބަނދަރެކެވެ. ދައުލަތުން 51.7 މިލިއަން ރުފިޔާ ޚަރަދުކޮށްގެން ތަރައްޤީކުރި ބަނދަރަކީ 2014 ވަނަ އަހަރުގެ އޮގަސްޓަމަހު ޢަމަލީ މަސައްކަތްފަށައި މިއަރުގެ މެއި މަހުގެ ތެރޭގައި ނިންމާފައިވާ މަޝްރޫޢުއެކެވެ.
އެމްޓީސީސީއާއި ހަވާލުކޮށްގެން ތަރައްޤީކުރި ބަނދަރަކީ ޒަމާނީ ފެންވަރަށް ތަރައްޤީކޮށްފައިވާ ބަނދަރެއް.
އާބާދީގައި އެއްހާހެއްހައި ރައްޔިތުން ދިރިއުޅެމުން އަންނަ ދަނގޭތީގެ ރައްޔިތުން ޤަބޫލުކުރާގޮތުގައި އެރަށުގެ ތަރައްޤީގެ ބާނީއަކީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމެވެ. މީގެ ކުރިން އެރަށަށް ނާންނަވަރުގެ ތަރައްޤީއެއް ރައީސް ޔާމީންގެ ޒަޢާމަތުގައި ގެނެސްދެއްވާފައިވާކަމަށް ރައްޔިތުން ބުންޏެވެ.
ބަނދަރާއި، ރައްކާތެރި ބޯފެނުގެ ޚިދުމަތުގެ އިތުރުންވެސް ސަރުކާރުން އަންނަނީ ދަނގެތީގައި ތަރައްޤީގެ ގިނަ މަޝްރޫޢުތަކެއް ހިންގަމުންނެވެ. ރައީސް ޔާމީން ވަނީ ދަނގެއްޗަށް ވަޑައިގެން އެރަށުގެ ރައްޔިތުންނާ ބައްދަލުކުރައްވާފައެވެ. އެރަށުން ވަނީ އެމަނިކުފާނަށް ވަރަށްހޫނު މަރުޙަބާއެއް ދަންނަވާފައެވެ.