ހިޔާ މަޝްރޫޢުގެ ދަށުން ސްޓެލްކޯއިން ޢިމާރާތްކުރާ 2 ޓަވަރުގެ ފައުންޑޭޝަން މަސައްކަތް ފަށައިފިއެވެ.
މިކަމަށްޓަކައި ހުޅުމާލޭ ދެވަނަ ފިޔަވަހީގައި ބޭއްވި ޙާއްޞަ ރަސްމިއްޔާތެއްގައި، ސްޓެލްކޯގެ 2 ޓަވަރުގެ ފައުންޑޭޝަނަށް ބޭނުންވާ ކޮންކްރީޓް މަސައްކަތްތައް ރަސްމީކޮށް ފައްޓަވައިދެއްވީ އެކުންފުނީގެ ސީއީއޯ އަޙްމަދު ޒުހޫރެވެ. މި މަސައްކަތް ފަށްޓަވައިދެއްވުމަށްފަހު މީޑިއާއާ ވާހަކަދައްކަވަމުން ސްޓެލްކޯގެ ސީއީއޯ އަޙްމަދު ޒުހޫރު ވިދާޅުވީ، "ހިޔާ" މަޝްރޫޢުގެ ދަށުން އެކުންފުނިން ޢިމާރާތްކުރާ ޓަވަރުތަކުގެ ޢަމަލީ މަސައްކަތް ފެށުމާއެކު މި މަޝްރޫޢަށް އެކުންފުނީގެ މުވައްޒަފުންގެ އިތުބާރު މިހާރު ލިބިފައިވާކަމަށެވެ. އަދި އަމާޒަކީ ދޮޅު އަހަރު ތެރޭގައި މި 2 ޓަވަރުގެ ޢަމަލީ މަސައްކަތް އެއްކޮށް ނިންމައި މުވައްޒަފުންނަށް އެޕާޓްމަންޓްތައް ޙަވާލުކުރުން ކަމަށްވެސް ޒުޙޫރު ވިދާޅުވިއެވެ.
ޒުހޫރު ވިދާޅުވީ ހިޔާ މަޝްރޫޢުގެ ދަށުން އެކުންފުނިން ޢިމާރާތްކުރާ ޓަވަރުތަކުގެ މަސައްކަތް ކުރުމަށް އެއްވެސް ބޭންކަކުން ލޯނެއް ނަގާފައި ނުވާނެކަމަށާއި، މި މަޝްރޫޢު ހިންގުމަށް ހަމަޖެހިފައިވަނީ ފްލެޓް ބޭނުންކުރާ ފަރާތުން ފައިނޭންސް ކުރާގޮތަށްކަމަށެވެ. އެގޮތުން މި މަޝްރޫޢުގެ ދަށުން އެޕާޓްމަންޓްތައް ގަންނަން ބޭނުންވާ މުވައްޒަފުންނަށް އެކުންފުނިން ކޯރޕަރޭޓް ގްރެންޓީ ދިނުމުން ބޭންކުން ލޯނު ދޫކުރާނެކަމަށާއި، ފައިސާ އަނބުރާ ދެއްކުމުގައިވެސް ފަސޭހަ އިންތިޒާމްތަކެއް ހަމަޖައްސައިދީފައިވާކަން އޭނާ ފާހަގަކުރެއްވިއެވެ.
ޕީއެސްއެމް ނިއުސްއާ ވާހަކަދެއްކި ސްޓެލްކޯގެ މުވައްޒަފުން ބުނީ ރައީސް ޔާމީންގެ ސަރުކާރުން ނެގި މި އިސްނެގުމަކީ އެކުންފުނީގެ މުވައްޒަފުންނަށް ބޯހިޔާވަހިކަން ކަށަވަރުގެންދާނެ ކަމެއް ކަމަށެވެ.
ބޯހިޔާވަހިކަމުގެ ސިޔާސަތުގެ ދަށުން ސަރުކާރު ޙިއްޞާވާ ކުންފުނިތައް ބައިވެރިކޮށްގެން ފަށާފައިވާ ހިޔާ މަސްރޫޢުގެ ދަށުން ސްޓޭޓް އިލެކްޓިރްކް ކޮންޕެނީ ލިމިޓެޑް، ސްޓެލްކޯއިން ހުޅުމާލޭ 2 ވަނަ ފިޔަވަހީގައި އެޅުމަށް ނިންމާފައިވަނީ 16 ބުރީގެ 2 ޓަވަރެވެ. ގާތްގަނޑަކަށް 400 އެޕާޓްމަންޓް ހިމެނޭ މި 2 ޓަވަރުގެ ޢަމަލީ މަސައްކަތް ކުރުމަށް ސްޓެލްކޯއިން ޙަވާލުކޮށްފައިވަނީ ޗައިނާގެ ކުންފުންޏެއްކަމަށްވާ ރޯޓައިމް އިންޖިނިއަރިންގ ޓެކްނޮލޮޖީ ކޯއާއެވެ.
"ހިޔާ" މަޝްރޫޢުގެ ދަށުން 25 ބުރީގެ 62 ޓަވަރު ހުޅުމާލޭ ދެވަނަ ފިޔަވަހީގައި ތަރައްޤީކުރުމަށް ވަނީ ހަމަޖެހިފައެވެ. މި މަޝްރޫޢުގެ ދަށުން ސަރުކާރުން މިހާރުވެސް ގެންދަނީ 7000 ހައުސިންގ ޔުނިޓް ހިމެނޭ 25 ބުރީގެ 16 ޓަވަރުގެ އެޅުމުގެ މަސައްކަތް އިމާރާތްކުރަމުންނެވެ.