ދުނިޔޭގެ އެކި ކަންކޮޅުތަކުގައި ހުޅުވާފައިހުރި "ދަ މަންހަޓަން ފިސް މާކެޓް" ގެ އައުޓްލެޓްތަކުގެ ތެރެއިން 2017 ވަނަ އަހަރު އެންމެރަނގަޅު ޢާމްދަނީއެއް ހޯދި އައުޓްލެޓަކަށް ރާއްޖޭގެ އައުޓްލެޓް ހޮވިއްޖެއެވެ.
މިކަންފާހަގަކޮށް ރާއްޖޭގެ އައުޓުލެޓަށް އެވޯޑް ދީފައިވަނީ ކޮންމެ އަހަރަކުވެސް މަންހަޓަންގެ ހުރިހާ އައުޓްލެޓްތަކަށް ޙާއްސަކޮށްގެން ބާއްވަމުންއަންނަ ސަމިޓްގެ ތެރެއިންނެވެ. މިއަހަރުގެ މިސަމިޓް ބާއްވާފައިވަނީ މިމަހުގެ 15 ވަނަ ދުވަހު މެލޭޝިޔާގައެވެ. މަންހަޓަންގެ ރާއްޖޭގެ އައުޓުލެޓަށް ލިބުނު އެވޯޑާ ހަވާލުވީ، "ދަ މަންހަޓަން ފިސް މާކެޓް" ރާއްޖޭގައި ހިންގާ ކުންފުނި ސިލްވަރ ސްޕޫން ޕްރައިވެޓް ލިމިޓެޑްގެ ފަރާތުންނެވެ.
މި އެވޯޑާއި ބެހޭގޮތުން ޕީއެސްއެމް ނިއުސްއަށް މަޢުލޫމާތުދެއްވަމުން އެ ކުންފުނިން ބުނީ ރާއްޖެފަދަ ކުޑަޤައުމަކަށް މިފަދަ އެވޯޑެއް ލިބުމުން އުފާވާކަމަށެވެ. އަދި ހުރިހާ ކަސްޓަމަރުންނަށް ޝުކުރު އަދާކުރާކަމަށްވެސް އޭނާ ބުންޏެވެ. ހުޅުމާލޭގައި ހުންނަ "ދަ މަންހަޓަން ފިސް މާކެޓް" ގެ ރާއްޖޭގެ އައުޓްލެޓްގައި 77 ވައްތަރެއްގެ ކެއުން، ތަފާތު 5 ގޮތަކަށް ކައްކައިގެން ލިބެންހުރެއެވެ. އެވޯޑާއި ގުޅިގެން 2018 ވަނަ އަހަރު މަންހަޓަންގެ ހުރިހާ އައުޓްލެޓް ތަކުގެ ތެރޭގައި ބާއްވާ ސަމިޓް މިހާރު ރާއްޖޭގައި ބޭއްވުމަށް ހަމަޖެހިފައިވާކަމަށް ސިލްވަރ ސްޕޫން ޕްރައިވެޓް ލިމިޑެޓުން ބުނެއެވެ. އަދި ވަރަށް އަވަހަށް މަންހަޓަންގެ އައުޓްލެޓެއް މާލޭގައި ހުޅުވުމަށް ތައްޔާރުވަމުން އަންނަކަމަށްވެސް އެ ކުންފުނިން މައުލޫމާތުދެއެވެ. މަންހަޓަންއަކީ ސީފުޑުގެ ބާވަތްތަކަށް ޚާއްސަ ޕްރެންޗައިޒް ރެސްޓޯރަންޓެކެވެ.
ޖުމުލަ 13 ޤައުމެއްގައި މަންހަޓަންގެ 85 އައުޓްލެޓެއް ހިންގައެވެ. ރާއްޖޭގައި މަންހަޓަންގެ އައުޓްލެޓެއް ހުޅުވާފައިވަނީ 2017 ވަނަ އަހަރުގެ ފެބްރުއަރީ މަހުގެ ތެރޭގައެވެ.