ކެއްކުމުގެ ހުނަރު ދައްކާލުމުގެ ބޮޑު މުބާރާތެއް ވެސް ހިމެނޭ ގޮތަށް ރާއްޖޭގައި ބާއްވާ އެންމެ ބޮޑު ހޮސްޕިޓާލިޓީ މައުރަޒު "ހޮޓެލް އޭޝިއާ އެގްޒިބިޝަން އެންޑް އިންޓަނޭޝަނަލް ކަލިނަރީ ޗެލެންޖް" މިއަހަރުގެ އެޑިޝަން އަންނަ މަހު ދަރުބާރުގޭގައި ފަށާނެއެވެ.
މިއަހަރުގެ ހޮޓެލް އޭޝިޔާ އެގްޒިބިޝަނުގައި 46 ޤައުމަކުން 250 ކުންފުނި ބައިވެރިވެ 2000 ބްރޭންޑް ދައްކާލާނެއެވެ.
ދެހާސްވަނަ އަހަރުން ފެށިގެން ބާއްވަމުންއަންނަ "ހޮޓެލް އޭޝިއާ އެގްޒިބިޝަން އެންޑް އިންޓަނޭޝަނަލް ކަލިނަރީ ޗެލެންޖް" އަކީ ކެއްކުމުގެ ދާއިރާގައި މަސައްކަތްކުރާ ފަރާތްތަކަށް ޚާއްޞަކޮށްގެން ބާއްވަމުން އަންނަ އެންމެ ބޮޑު އެއް ފެއަރއެވެ. މި ފެއަރގެ އެންމެ މުހިންމު އެއް މަޤުޞަދަކީ ހޮސްޕިޓާލިޓީ ދާއިރާގައި ޚިދުމަތްދޭ ފަރާތްތަކާއި، ސަޕްލައިކުރާ ފަރާތްތައް އެއްތަނަކުން ބައްދަލުވެ ބަދަހި ގުޅުމެއް އުފެއްދުމެވެ.
"ހޮޓެލް އޭޝިއާ އެގްޒިބިޝަން އެންޑް އިންޓަނޭޝަނަލް ކަލިނަރީ ޗެލެންޖް" 2018 ކުރިއަށްދާނީ މައުރަޒަކާއި ކެއްކުމުގެ ހުނަރު ދައްކާލުމުގެ މުބާރާތަކާއެކުގައެވެ. އެގޮތުން ސެޕްޓެމްބަރ މަހުގެ 9 އަކުން 12 އަށް ކެއްކުމުގެ ހުނަރު ދައްކާލުމުގެ މުބާރާތް ބާއްވާއިރު މައުރަޒު ކުރިއަށްދާނީ 10 އަކުން 12 އަށެވެ. މިއަހަރުގެ މައުރަޒުގައި 180 ސްޓޯލް ހުންނާނެއެވެ.
މިއަހަރުގެ "ހޮޓެލް އޭޝިއާ އެގްޒިބިޝަން އެންޑް އިންޓަނޭޝަނަލް ކަލިނަރީ ޗެލެންޖް" އިންތިޒާމްކުރަނީ މޯލްޑިވްސް އެގްޒިބިޝަން އެންޑް ކޮންފަރެންސް ސަރވިސްގެ ފަރާތުންނެވެ. ޓޫރިޒަމް މިނިސްޓްރީއާއި، އެކޮނޮމިކް މިނިސްޓްރީއާއި، ދިވެހި ވިޔަފާރިވެރިންގެ ޤައުމީ ޖަމިއްޔާގެ އިތުރުން ބެސްޓްބައި މޯލްޑިވްސްއިން ވަނީ މި އެގްޒިބިޝަން އެންޑޯޒް ކޮށްފައެވެ.