ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމަށް ސަރުކާރުން ހޭދަކުރާ 1 ބިލިއަން ޑޮލަރުގެ ބިޔަ އިންވެސްޓްމަންޓް އަނބުރާ ލިބޭނެކަން ޔަޤީންކަމަށާއި، އެކަމާ އެއްވެސް ސުވާލެއްވެސް ނުއުފެދޭކަމަށް ރާއްޖޭގެ މަޝްހޫރު ވިޔަފާރިވެރިޔާ މުޙައްމަދު ޢުމަރު މަނިކު ވިދާޅުވެއްޖެއެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމަށް ސަރުކާރުން ކުރިއަށްގެންދާ ބިޔަ މަޝްރޫޢާއި ގުޅޭގޮތުން "މައި ނޭޝަން، މައި ފިއުޗަރ"ގެ ނަމުގައި ޕީއެސްއެމްއިން ގެނެސްދިން ޕެނަލް ޑިސްކަޝަނެއްގައި ވާހަކަދައްކަވަމުން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްގެ ޗެއަރމަން މުޙައްމަދު ޢުމަރު މަނިކު ވިދާޅުވީ، ރާއްޖޭގެ އިޤްތިޞާދު ފުޅާކުރެވެން އޮތް ހަމައެކަނި ގޮތަކީ ރާއްޖޭގެ މައިގޭޓު ކަމަށްވާ ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުންކަމަށެވެ. އަދި އެއަރޕޯޓް ތަރައްޤީނުކުރެވި ދިގުލައިގެން ދިއުމުގެ ނަތީޖާއެއްގެ ގޮތުން، މުޅި އެއަރޕޯޓް އަލުން އެއްކޮށް ބަދަލުކުރަންޖެހިފައިވާކަން އޭނާ ފަހަގަކުރެއްވިއެވެ. މުޙައްމަދު ޢުމަރު މަނިކު ވިދާޅުވީ، އެއަރޕޯޓުގައި މިހާރު ބޭނުންކުރާ ރަންވޭ މިއަދާއި ހިސާބަށްވެސް އޮތްކަމީ ނަސީބެއްކަމަށާއި، ހަޤީޤަތަކީ އެ ރަންވޭއަކީ ގެރެންޓީ ހަމަވެފައިވާ ރަންވޭއެއް ކަމަށެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ ބިޔަ މަޝްރޫޢަކީ ސަރުކާރުން ހަމަ ހުރެފައި ހިންގާ މަޝްރޫޢެއް ނޫންކަން ފާހަގަކުރައްވާ، މުޙައްމަދު ޢުމަރު މަނިކު ވިދާޅުވީ، އެއަރޕޯޓު ތަރައްޤީކުރުމުގެ މަޝްރޫޢަކީ ވަރަށް ބޮޑަށް ރޭވިގެން މީގެ 40، ނުވަތަ 50 އަހަރާއި ހަމައަށްވެސް ބޭނުންކުރެވޭހެން ހިންގާ މަޝްރޫޢެއްކަމަށެވެ. އަދި މި މަޝްރޫޢަކީ އޭގެ ޒާތުގައި އަމިއްލައަށްވެސް ފައިސާ ޖަނަރޭޓްކުރާނެ މަޝްރޫޢެއްކަމަށާއި، އެއަރޕޯޓަށް ކުރާ އިންވެސްޓްމަންޓަކީ ވަރަށް ފަސޭހައިން ރިކަވަރކުރެވޭނެ އިންވަސްޓްމަންޓެއްކަމަށް އޭނާ ވިދާޅުވިއެވެ.
"ހުރިހާގޮތަކުން ބެލިކަމުގައި ވިޔަސް، ސަރުކާރުން މި މަޝްރޫޢަށް މި ޙަރަދުކުރަނީ ހަމަ ހައްޤު ފައިސާ.. މިކީ އެއްވެސް ހާލެއްގައި ބޭކާރު ގޮތުގައި ކުރާ އިންވެސްޓްމަންޓެއް ނޫން.. އަނެއްކާ މި ޕްރޮޖެކްޓް ވިލް ޕޭ އިޓްސެލްފް... މިހާރުވެސް އޮޕަރޭޓްކުރަމުންދާ އެއަރޕޯޓެއްގައި، މުޅިން އާ އެއަރޕޯޓެއް އެޅުންފަދަ ކަމެއް މިކުރަނީ..މިއީ އަސްލު ކުޑަކަމެއް ނޫން" މުޙައްމަދު އުމަރު މަނިކު ވިދާޅުވިއެވެ.
މި ޕެނަލް ޑިސްކަޝަންގައި ވާހަކަދައްކަވަމުން އެމްއޭސީއެލްގެ ބޯޑު މެންބަރު އަޙްމަދު ނަޒީރު ވިދާޅުވީ، އެއަރޕޯޓް ތަރައްޤީކުރުމުގެ މަޝްރޫޢުގެ ފީސަބިލިޓީ ސްޓަޑީ ދައްކާގޮތުން، އެ މަޝްރޫޢަށް ޚަރަދުވާ 1 ބިލިއަން ޑޮލަރު 15 އަހަރުގެ ތެރޭގައި އަނބުރާލިބޭނެކަމަށެވެ. އަދި މި މަޝްރޫޢުއަށް ސަރުކާރުން ނަގާފައިވާ ލޯންތައް ދެއްކުމަށް 25 އަހަރުގެ މުއްދަތެއް އެ ފަރާތްތަކުން ސަރުކާރަށްދީފައިވާއިރު، މި އިންވެސްޓްމަންޓަކީ ދިވެހި މާލިއްޔަތުން ޙަރަދުނުކޮށް، ސީދާ އެމްއޭސީއެލަށް ލިބޭ ފައިދާގެ ތެރެއިން ކަވަރކުރެވޭނެ އިންވެސްޓްމަންޓެއްކަމަށްވެސް ނަޒީރު ވިދާޅުވިއެވެ.
"5 އަހަރުގެ ތެރޭގައި އެމް.އޭ.ސީ.އެލްގެ ސާފު ފައިދާ 450 މިލިއަން ޑޮލަރަށް އަރާފައި މިވަނީ.. އެއީ ވަރަށް ބޮޑު ކުރިއެރުމެއް.. ޖީ.އެމް.އާރގެ ސެޓްލްމަންޓުގައި އަޅުގަނޑުމެން ދައްކަންޖެހުނީ 270 މިލިއަން ޑޮލަރު.. މިހާރު އެ 270 މިލިއަން ޑޮލަރަށްވުރެ އިތުރަށް އަޅުގަނޑުމެންނަށް އާމްދަނީގެ ގޮތުގައި މިވަނީ ލިބިފައި.. އެހެންވީމަ މީގެ ޕްރޮފަޓަބިލިޓީއާމެދު އެއްވެސް ބަޔަކު ޝައްކު ކުރާނެކަމެއް ނެތް.. އިރާދަކުރެއްވިއްޔާ މިހާރު މިދާގޮތަށް ދާނަމަ، މި ލޯނަކީ ސަރުކާރުގެ މާލިއްޔަތުން ނަގާފައި ދައްކަންޖެހޭނެ އެއްޗެއް ނޫން.. އަޅުގަނޑުމެންގެ އޮޕަރޭޝަނުން، ކުންފުންޏަށް ހޯދައިގެން ދެއްކޭނެ އެއްޗެއް" އަޙްމަދު ނަޒީރު ވިދާޅުވިއެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ 1 ބިލިއަން ޑޮލަރުގެ ބިޔަ މަޝްރޫޢާއެކު އަހަރެއްގެ މައްޗަށް ރާއްޖެއަށް ޒިޔާރަތްކުރާ ފަތުރުވެރިންގެ އަދަދު 7.5 މިލިއަނަށް އެރުވުމަކީ ސަރުކާރުގެ އަމާޒެކެވެ. މި މަޝްރޫޢުގެ ދަށުން މިވަގުތު އެންމެ ބާރު ދުވެލީގައި ކުރިއަށްދަނީ އައު ރަންވޭ އެޅުމުގެ މަސައްކަތެވެ. މީގެ އިތުރުން އައު ފަސިންޖަރ ޓަރމިނަލަކާއި، ފިއުލް ފަރމެއްގެ އިތުރުން، ކާގޯ ކޮމްޕްލެކްސްއަކާއި، އައު ސީޕްލޭން ޓަރމިނަލެއް ތަރައްޤީކުރުމުގެ މަސައްކަތްވެސް ދަނީ ކުރަމުންނެވެ. މި މަޝްރޫޢު ނިމިގެންދާއިރު، ވެލާނާ އިންޓަރނޭޝަނަލް އެއަރޕޯޓު ވެގެންދާނީ މި ސަރަޙައްދުގައިވެސް އޮޕަރޭޓްކުރާ އެންމެ ފެންވަރު ރަނގަޅު އެއް އެއަރޕޯޓަށްކަމަށް ސަރުކާރުން ބުނެއެވެ.