ދައުލަތަށް ދައްކާ ޓެކްސްއަކީ ޤައުމުގެ ތަރައްޤީއަށްޓަކައިކުރެވޭ އުފެއްދުންތެރި ހޭދައެއްކަމަށް ރައީސުލްޖުމްހޫރިއްޔާގެ ނައިބު ޢަބްދުﷲ ޖިހާދު ވިދާޅުވެއްޖެއެވެ. ނައިބު ރައީސް މިހެން ވިދާޅުވީ، މޯލްޑިވްސް އިންލެންޑް ރެވެނިއު އޮޓޯރިޓީ، މީރާގެ 8 ވަނަ އަހަރީދުވަސް ފާހަގަކުރުމަށް ދަރުބާރުގޭގައި ބޭއްވި ޚާއްޞަ ޖަލްސާ ޝަރަފްވެރިކޮށްދެއްވައި ވާހަކަފުޅުދައްކަވަމުންނެވެ.
މީރާއަށް 8 އަހަރު ފުރުމުގެ ގޮތުން ދަރުބާރުގޭގައި ބޭއްވި ޖަލްސާގައި ރައީސުލްޖުމްހޫރިއްޔާގެ ނައިބު ޢަބްދުﷲ ޖިހާދާއި، ރައްޔިތުންގެ މަޖިލީހުގެ ނައިބު ރައީސް މޫސާ މަނިކާއި ދައުލަތުގެ އިސްވެރިންގެ އިތުރުން މީރާގެ ގިނަ އަދަދެއްގެ މުވައްޒަފުން ބައިވެރިވެފައިވެއެވެ.
މި ޖަލްސާގައި ވާހަކަފުޅުދައްކަވަމުން ނައިބު ރައީސް ޢަބްދުﷲ ޖިހާދު ވިދާޅުވީ، ކުންފުނިތަކުން ދައުލަތަށް ދައްކާ ޓެކްސްއަކީ ޤައުމުގެ ތަރައްޤީއަށްޓަކާ ކުރެވޭ އުފެއްދުންތެރި ހޭދައެއްކަމަށެވެ. އަދި ދައުލަތަށް ދައްކާ ޓެކްސްގެ ފައިދާ ސީދާގޮތުންނާއި ނުސީދާގޮތުން ރައްޔިތުންނަށް ކުރާކަމަށްވެސް ނައިބު ރައީސް ވިދާޅުވިއެވެ.
މި ޖަލްސާގައި ކޮމިޝަނަރ ޖެނެރަލް އޮފް ޓެކްސޭޝަން ޔަޒީދު މުޙައްމަދު ވަނީ ފާއިތުވި 8 އަހަރުދުވަހުގެ ތެރޭގައި މީރާއިން ޙާސިލްކޮށްފައިވާ ކާމިޔާބީތަކަށް އަލިއަޅުއްވާލާ ވާހަކަދައްކަވާފައެވެ. އެގޮތުން މިއަދު މީރާއަކީ ޓެކްސްގެ ނިޒާމުގައި ބައިނަލްއަޤްވާމީ ފެންވަރުގައި ފާހަގަކޮށްލެވޭ އިދާރާއެއްކަން ޔަޒީދު ފާހަގަ ކުރެއްވިއެވެ. އެގޮތުން ފާއިތުވި އަހަރުތަކުގައި ބައިނަލްއަޤްވާމީ ގިނަ އެވޯޑްތަކެއް ޙާސިލްކޮށްފައިވާއިރު، ގިނަ ޤައުމުތަކާއެކު ޑަބަލް ޓެކްސް އެވޮއިޑެންސް އެގްރީމަންޓް ހެދުމުގެ މަސައްކަތްވެސް މީރާއިން ކުރަމުންދާކަމަށް އޭނާ ވިދާޅުވިއެވެ. ޔަޒީދުގެ ވާހަކައިގައި ވަނީ، މީރާއާ ގުޅޭގޮތުން ހަޤީޤަތާ ޚިލާފު ވާހަކަ ފަތުރާ މީރާގެ ނަން ހުތުރު ކުރުމަށް، އަމިއްލަ މަސްލަޙަތު ހިމާޔަތް ކުރަން އުޅޭ މަދުބަޔަކު މަސައްކަތް ކުރަމުންދާކަން ފާހަގަކޮށް އެކަން ކުއްވެރި ކުރައްވާފައެވެ.
މި ޖަލްސާގައި މިދިޔަ އަހަރު މީރާއިން ފާހަގަކޮށްލެވުނު މުވައްޒަފުންނަށްވަނީ އެވޯޑް ދީފައެވެ. އަދި ފާއިތުވި އަހަރު މީރާއަށް އެންމެ ގިނައިން ޓެކްސް ދައްކާފައިވާ ކުންފުނިތަކަށް ރަންލާރި އެވޯޑްވެސް ދީފައިވެއެވެ. އެގޮތުން 11 ގިންތިއަކުން 17 ފަރާތަކަށް ރަންލާރި އެވޯޑް ދީފައިވެއެވެ. މީގެއިތުރުން 2017 ވަނަ އަހަރު މީރާއިން ސުކޫލް ކުދިންނަށް އަމާޒުކޮށްގެން ކުރިއަށްގެންދިޔަ ވާރުފޯރީގެ ނަތީޖާވެސް މިޖަލްސާގައި ވަނީ އިއުލާންކޮށްފައެވެ. މި މުބާރާތުން އެއްވަނަ ހާސިލްކޮށްފަިއވަނީ އަމީނިއްޔާ ސްކޫލެވެ. ދެވަނަ ހާސިލްކޮށްފަިއވަނީ އިސްކަންދަރު ސުކޫލެވެ.