ދުނިޔޭގެ އެންމެ މޮޅު އެއް ކުޅުންތެރިޔާ ކްރިސްޓިއާނޯ ރޮނާލްޑޯ ރެއާލް މެޑްރިޑް ދޫކޮށްލުމަކީ އެކުލަބަށް ލިބުނު ގެއްލުމެއް ކަމަށް އެ ޓީމުގެ ކުރީގެ ކޯޗު ހޯސޭ މޮރީނިއޯ ބުނެފިއެވެ.
ނަމަވެސް ރޮނާލްޑޯ ފަދައިން ޕޯޗުގަލް އަށް އުފަން މޮރީނިއޯ ބުނީ ރެއާލް މެޑްރިޑާއި އޭނާގެ މިހާރުގެ ކުލަބު މެންޗެސްޓާ ޔުނައިޓެޑަކީ ރޮނާލްޑޯ އަށްވުރެ ބޮޑު ކުލަބުތައް ކަމަށެވެ.
"އެއްވެސް ކުޅުންތެރިއަކު ކުލަބަށްވުރެ ބޮޑެއްނުވާނެ. ރެއާލް މެޑްރިޑަކީ މެންޗެސްޓާ ފަދައިން ބޮޑު ކުލަބެއް. ކުޅުންތެރިޔާ އަށް ކުލަބު ބޮޑުވާނެ. އަހަރެން ދެކޭ ގޮތުގައި ރޮނާލްޑޯ ފަދަ ކުޅުންތެރިން އަބަދުވެސް އައިސް ގޮސް ހަދާނެ. ރޮނާލްޑޯ ދިއުމަކީ މެޑްރިޑަށް ލިބޑޭ ގެއްލުމެއް. އެކަމަކު އެކަން ފޫބައްދާނެ ފެންވަރު ކުލަބުގައި ހުންނާނެ،" މޮރީނިއޯ ބުންޏެވެ.
އޭނާ ބުނީ މެޑްރިޑުގެ އާ ކޯޗު ހޫލިއަން ލެޕޮޓީގު އަށް ކާމިޔާބު ލިބުމަށް އެދޭ ކަމަށެވެ.
"އޭނާ އަކީ ރަނގަޅު ކޯޗެއް. އަހަރެން އޭނާ ދަންނަތާ 20 ނުވަތަ 21 އަހަރު ވެދާނެ. އޭނާ އަށް ކާމިޔާބީއަށް އަހަރެން އެދެން. މެޑްރިޑަކީ އަދިވެސް މޮޅު ކުޅުންތެރިންތަކެއް އޮތް މޮޅު ޓީމެއް،" އިންޓަމިލާނާއި ޕޯޓޯ އަށް ޗެމްޕިއަންސް ލީގު ކާމިޔާބުކޮށްދިން ޗެލްސީގެ ކުރީގެ ކޯޗު ބުންޏެވެ.