"ހިޔާ އެކޮމްޕްލިޝްޑް" މަޝްރޫޢުގެ ދަށުން ފުލެޓާއި ބިން ހޯދަން ބޭނުންވާ ފޯމު ދޫކުރުން މިމަހުގެ 7 ގައި

ބޯހިޔާވަހިކަމުގެ ދާއިރާއިން ސަރުކާރުން އިޢުލާންކޮށްފައިވާ މެގަރ ޕްރޮޖެކްޓް "ހިޔާ އެކޮމްޕްލިޝްޑް" ނުވަތަ "އެންމެނަށް ހިޔާ ކަށަވަރު" މަޝްރޫޢުގެ ދަށުން ތަރައްޤީކުރާ އަށްޑިހަ ދެހާސް ހައުސިންގ ޔުނިޓަށް ކުރިމަތިލުމުގެ ފުރުޞަތު މިމަހުގެ 7 ވަނަ ދުވަހު ހުޅުވާލާނެކަމަށް މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ގާތްގަނޑަކަށް ތިން ލައްކަ ފަންސާސް ހާސް މީހުންގެ އާބާދީއަކަށް އަމާޒުކޮށްގެން ކުރިއަށްގެންދާ މި މަޝްރޫޢުގެ ދަށުން، 1000 ހެކްޓަރުގެ ސަރަޙައްދެއް ހިއްކުމަށް ވަނީ ހަމަޖެހިފައެވެ.

"ހިޔާ އެކޮމްޕްލިޝްޑް" ގެ ނަމުގައި ވިލިމާލެ 2 ތަރައްޤީކުރުމުގެ ބިޔަ މަޝްރޫޢަކީ ރާއްޖޭގެ އާބާދީގެ ބޮޑުބަޔަކަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމުގެ މަޤްޞަދުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ރާއްޖޭގެ 53 ވަނަ މިނިވަން ދުވަހު އިޢުލާން ކުރެއްވި މަޝްރޫޢެކެވެ. މި މަޝްރޫޢާއި ގުޅޭގޮތުން އިތުރު މަޢުލޫމާތު ދެއްވަމުން ހައުސިންގ މިނިސްޓަރ ޑރ. މުޙައްމަދު މުޢިއްޒު ވިދާޅުވީ، މި މަޝްރޫޢުގެ ދަށުން ގުޅީފަޅުން 230 ހެކްޓަރު އަދި މާލޭ ކައިރީގައި އޮންނަ ފުށިދިއްގަރު ފަޅުން 800 ހެކްޓަރު ހިމެނޭހެން ގާތްގަނޑަކަށް 1000 ހެކްޓަރުގެ ބިން ހިއްކުމަށް ހަމަޖެހިފައިވާކަމަށެވެ. އެއީ ގާތްގަނޑަކަށް މާލެ ވަރުގެ 4 ބިމުގެ ޖާގަކަމަށާއި، މި މަޝްރޫޢުގެ ދަށުން ޖުމްލަ 82،000 ހައުސިންގ ޔުނިޓް ތަރައްޤީކުރުމަށް ހަމަޖެހިފައިވާ ކަމަށް ޑރ. މުޢިއްޒު ވިދާޅުވި. އަދި މި މަޝްރޫޢުގެ ދަށުން ގުޅީފަޅާއި، ތިލަފުއްޓާއި، ވިލިމާލެ 2 އާއި، ވިލިމާލެ އަދި މާލެ އެއްގަމު މަގުން ގުޅާލެވިގެންދާނެކަމަށާއި، މި މަޝްރޫޢުގެ މަސައްކަތް ފެށުމަށްޓަކާ ވާންޖެހޭ ތައްޔާރީތައް މިހާރު ވަމުންދާކަމަށް މިނިސްޓަރ މުޢިއްޒު ވިދާޅުވިއެވެ.

"މުޅި ގުޅީފަޅު އެއްކޮށް އެއީ 230 ހެކްޓަރުގެ ފަޅެއް، މާލެއަށްވުރެ ބޮޑު. މުޅި ފަޅުގެ ބޮޑުބައި އެއްކޮށް ހިއްކާފައި، ވިލިމާލެ 2 ގެ ގޮތުގައި ތަރައްޤީކުރާއިރުގައި އެ ބިމުގެ ގާތްގަނޑަކަށް 130 ހެކްޓަރަށްވުރެ ބޮޑުބިން ޙާއްސަ މިކުރަނީ ހަމައެކަނި ފްލެޓް ޢިމާރާތްކުރުމަށް. ފުށިދިއްގަރު ފަޅަކީ މި މަޝްރޫޢުގެ ދަށުން ދެން ހިއްކާ ބިން. އެއީ ގާތްގަނޑަކަށް 800 ހެކްޓަރުގެ ބިން. ދެ ސަރަޙައްދެއްގައި ޖުމްލަ މި ހިއްކެނީ 1000 ހެކްޓަރަށް ވުރެ ބޮޑު ސަރަޙައްދެއްގެ ބިން" މިނިސްޓަރ މުޢިއްޒު ވިދާޅުވިއެވެ.

ހައުސިންގ މިނިސްޓަރ ޑރ. މުޢިއްޒު ވިދާޅުވީ، "ހިޔާ އެކޮމްޕްލިޝްޑް" ގެ ދަށުން ދޫކުރުމަށް ހަމަޖެހިފައިވަނީ ކޮންމެ މީހަކަށްވެސް 1000 އަކަފޫޓުގެ ބިމެއް ނުވަތަ ފްލެޓެއްކަމަށެވެ. އަދި ފްލެޓް ދޫކުރުމަށް ހަމަޖެހިފައިވަނީ ގުޅީފަޅުން ކަމަށާއި، ގޯތި ބޭނުންވާ ފަރާތްތަކަށް ބިން ދޫކުރުމަށް ނިންމާފައިވަނީ ފުށިދިއްގަރު ފަޅުން ހިއްކާ ބިމުގައިކަމަށެވެ. މިނިސްޓަރ ވިދާޅުވީ މި މަޝްރޫޢުގެ ދަށުން ތަރައްޤީކުރުމަށް ނިންމާފައިވަނީ މިކްސްޑް ޔޫސްޑް ޕްލޭނެއްގެ ދަށުން ސޯޝަލް ހައުސިންގ ޔުނިޓްތަކާއި، މިޑް-ރޭންޖް އަދި ހައި-ރޭންޖްގެ ހައުސިންގ ޔުނިޓްތައްވެސް ހިމެނޭހެންކަމަށެވެ. އަދި ހައުސިންގ ޔުނިޓްތަކާއެކު ބޭނުންވާނެ އިތުރު ވަސީލަތްތައްވެސް ތަރައްޤީކުރާނެކަން މިނިސްޓަރ ފާހަގަކުރެއްވިއެވެ.

"1000 އަކަފޫޓުގެ ފްލެޓް ހިމެނޭ އިމާރާތްތަކެއް ހެދިގެންދާނެ. އަދި މިތަނުގައި ޒަމާނީ ސިޓީއެއްގައި ހުންނާނެ ހުރިހާ ވަސީލަތެއް ހިމެނިގެންދާނެ. އޭގެ ތެރޭގައި އޯޕަން ސްޕޭސަސް، ޕާކްތައް، ސްޕޯޓްސް އަދި ރެކްރިއޭޝަނަލް ތަންތަން، ފުޅާ މަގުތައް، ތިމާވެއްޓާއި ރައްޓެހި ގްރީން އޭރިއާތައް، އިންސްޓިޓިއުޝަންތަކާއި އޮފީސްތަކަށް ޙާއްސަ ޒޯން، މިހެންގޮސް ވޯޓަރ ފްރަންޓް ޑިވެލޮޕްމަންޓްތައްވެސް، އަދި އެ ސަރަޙައްދަށް ބޭނުންވާނެ އެކިކަހަލަ ކޮމާޝަލް އަދި މިކްސް ޔޫސްޑް ޑިވެލޮޕްމަންޓްތަކަށް ބޭނުންވާ ޖާގަވެސް މިތަނުގައި ހެދިގެންދާނެ" މިނިސްޓަރ މުޢިއްޒު ވިދާޅުވިއެވެ.

"ހިޔާ އެކޮމްޕްލިޝްޑް" ގެ ދަށުން ފްލެޓާއި ގޯތި ބޭނުންވާ ފަރާތްތަކަށް މިމަހުގެ 7 ވަނަ ދުވަހު ކުރިމަތިލުމުގެ ފުރުޞަތު ހުޅުވާލާއިރު، މިމަހުގެ 15 ވަނަ ދުވަހުން ފެށިގެން ފޯމްތައް ހައުސިންގ މިނިސްޓްރީއަށް ބަލައިގަތުމަށް ހަމަޖެހިފައިވާކަމަށް ހައުސިންގ މިނިސްޓަރ ޑރ. މުޢިއްޒު ވިދާޅުވިއެވެ. އަދި އުމުރުން 18 އަހަރު ފުރިފައިވާ، 1000 އަކަފޫޓު ގޯއްޗެއް ނުވަތަ ބިމެއް އަމިއްލަ ނަމުގައި ނުވަތަ ވާރުތަ މުދަލުގެ ތެރޭގައިވެސް ނުހިމެނޭ ކޮންމެ ދިވެހި ރައްޔިތަކަށްވެސް މި މަޝްރޫޢުގެ ދަށުން ފޯމް ހުށައެޅޭނެކަން އެމަނިކުފާނު ފާހަގަކުރެއްވިއެވެ.

"18 އަހަރުން މަތީ ކޮންމެ މީހަކަށްވެސް، އެއީ ކިތަންމެ އުމުރުން ދޮށީފަރާތަކަށްވިޔަސް މައްސަލައެއް ނެތް، 18 އަހަރުން މަތީ ފަރާތަކަށް ވާންޖެހޭނީ. ދެވަނަ ޝަރުތަކީ އެމީހެއްގެ 1000 އަކަފޫޓުގެ ބިމެއް ނެތް މީހަކަށް އެބަވާންޖެހޭ. އެހެންވީމަ އަމިއްލަ ނަމުގައި، އަމިއްލަ ބިމެއް 1000 އަކަފޫޓުގެ ބިމެއް ލިބިގެންވާ މީހަކަށް އެމީހަކު ވެގެންނުވާނެ. ނޫނީ 1000 އަކަފޫޓުގެ ފްލެޓެއްވިޔަސް ނުވަތަ ދިރިއުޅޭ ތަނެއް ލިބިފައިނެތް މީހަކަށް ވާންޖެހޭނެ" މިނިސްޓަރ މުޢިއްޒު ވިދާޅުވިއެވެ.

ހިޔާ މަޝްރޫޢުގެ ދަށުން ސަރުކާރުން ކުރިއަށް މިގެންދާ ބިޔަ މަޝްރޫޢާއެކު 2030 ވަނަ އަހަރު އަންނައިރު ބޯހިޔާވަހިކަން ކަށަވަރު ނުވާ އެއްވެސް ދިވެހި ރައްޔިތަކު ނުހުންނާނެކަމަށް ސަރުކާރުން ބުނެއެވެ. މި މަޝްރޫޢުގެ ދަށުން 82،000 ހައުސިންގ ޔުނިޓް ތަރައްޤީކުރުމަށް ހަމަޖެހިފައިވާއިރު، ބޭރުގެ ބޭންކްތަކާއި، އެކި ޤައުމުތަކުން ފޯރުކޮށްދޭ ލޯން އެހީތަކާއި، އެހީތަކުގެ ތެރެއިން މި މަޝްރޫޢަށް ބޭނުންވާ ފައިސާ ހަމަޖެއްސުމުގެ ކަންކަން މިހާރު އަންނަނީ ކުރަމުންނެވެ. މި މަޝްރޫޢު ނިމިގެންދާއިރު، މާލޭގެ ތޮއްޖެހުން އެތައް ގުނައެއް ކުޑަވެ، އިޤްތިޞާދީގޮތުންނާއި، ތަރައްޤީގެ ރޮނގުން އިތުރު ކުރިއެރުންތަކެއް ލިބިގެންދާނެއެވެ.