ރާއްޖޭގައި ހައްދާ މޭވާއިން ތަފާތު ތައްޔާރީ ބާވަތްތައް އުފެއްދުމަށް ޝައުޤުވެރިވާ ފަރާތްތަކަށް އެފުރުޞަތު ހުޅުވާލައިފި
ރާއްޖޭގައި ހައްދާ މޭވާއިން ތަފާތު ތައްޔާރީ ބާވަތްތައް އުފެއްދުމަށް ޝަޢުގުވެރިވާ ޖަމުޢިއްޔާތަކާއި ކޯޕަރޭޓިވްސް އަދި ކުންފުނިތަކަށް އެކަމަށް އެދި ކުރިމަތިލުމުގެ ފުރުޞަތު މިނިސްޓްރީ އޮފް ފިޝަރީޒް އެންޑް އެގްރިކަލްޗަރއިން ހުޅުވާލައިފިއެވެ.
މިއީ "ވެލިއު އެޑިޝަން އެންޑް އެގްރިކަލްޗަރ ރިސަރޗް އިން ދަ މޯލްޑިވްސް" މަޝްރޫޢުގެ "ވެލިއު އެޑިޝަން އޮފް އެގްރިކަލްޗަރ ޕްރޮޑިއުސް" ކޮމްޕޯނަންޓްގެ ދަށުން ހިންގުމަށް ހަމަޖެހިފައިވާ މަޝްރޫޢުގެ ދަށުން ހުޅުވާލާ ފުރުޞަތެއްކަމަށް ފިޝަރީޒް މިނިސްޓްރީން ބުނެއެވެ. ޗައިނާ ސަރުކާރުގެ އެހީއާއެކު ހިންގާ މި މަޝްރޫޢުގެ ދަށުން ރާއްޖޭގައި ހައްދާ މޭވާއިން ތަފާތު ތައްޔާރީ ބާވަތްތައް އުފެއްދުން ނުވަތަ "ވެލިއު އެޑެޑް ޕްރޮޑަކްޓްސް" އުފެއްދުމަށް ޝަޢުގުވެރިވާ ފަރާތްތަކަށް އެކަމަށް އެދި ކުރިމަތި ލުމުގެ ފުރުޞަތު މިމަހުގެ 15 ވަނަ ދުވަހުގެ ނިޔަލަށް އެ މިނިސްޓްރީން ވަނީ ހުޅުވާލާފައެވެ.
މި މަޝްރޫޢުގެ މައިގަޑު އެއް މަޤްސަދަކީ، ރާއްޖޭގެ ރަށްރަށުގައި ހައްދާ މޭވާ މާކެޓް ނުކުރެވި ހަލާކުވެދިޔަ ނުދިނުމަށްޓަކައި، ތައްޔާރީ ބާވަތްތައް އުފައްދާ އަދި އާމްދަނީ ލިބުމުގެ މަގު ފަހިކޮށްދިނުންކަމަށް ފިޝަރީޒް މިނިސްޓްރީން ބުނެއެވެ. މި މަޝްރޫއު ހިންގުމަށްޓަކައި މިކަމަށް ޝައުޤުވެރިވާ ޖަމުޢިއްޔާތަކާއި ކޯޕަރޭޓިވްސް އަދި ކުންފުނިތަކަށް ކުރިމަތިލުމުގެ ފުރުޞަތު މިހާރު ހުޅުވާލާފައިވާއިރު، މި މަޝްރޫޢު ހިންގުމަށް ޖަމުޢިއްޔާތަކާއި ކޯޕަރޭޓިވްސް އަދި ކުންފުނިތައް ހޮވާއިރު ދަނޑުވެރިކަމަށް ޝައުޤުވެރިވާ ޖަމުޢިއްޔާތަކާއި ކޯޕަރޭޓިވްސް އަދި ކުންފުނިތަކަށް އިސްކަންދެވޭނެ ކަމަށް ފިޝަރީޒް މިނިސްޓްރީ ބުނެއެވެ.