17 އަހަރަށް ފަހު ޔުވެންޓަސް ދޫކޮށްލި ކެޕްޓަން އަދި ގޯލްކީޕަރު ޖިއާން ލުއިޖީ ބުފަންގެ މަޤާމު ފުރުމަކީ އާއްމުން ހީކުރާ ވަރަށްވުރެ އުނދަގޫ ކަމެއް ކަމަށް ގޯލްކީޕަރު ޝިޒެސްނީ ބުނެފިއެވެ.
އުމުރުން 28 އަހަރުގެ ކީޕަރަކީ މި ސީޒަނުގައި ޔުވެންޓަސްގެ އެއްވަނަ ކީޕަރެވެ. އޭނާ މިހާތަނަށް ހުރީ ބުފަން ކުޅޭތަން ބަލަން ދެ ވަނަ ކީޕަރެއްގެ ގޮތުގައެވެ. ޔުވެންޓަސް ދޫކޮށް ބުފަން ދިޔައީ ފްރާންސްގެ ޕީއެސްޖީއަށެވެ.
"އަހަންނަށް އެނގޭ އޭނާގެ ޖާޒީގެ ބަރުކަން. އޭނާ އާއި އަހަންނާ ދެމެދު އޮތީ ވަރަށް ގާތް ރަހުމަތްތެރިކަމެއް. އެއީ ވަރަށް ކުޅަދާނެ ލީޑަރެއް. އޭނާގެ މަޤާމު ފުރަންޖެހުމަކީ އަހަންނަށް ލިބޭ އުފަލެއް. އެކަމަކު މިއީ ވަރަށް ބޮޑު ޒިންމާއެއް،" ކުރިން އާސެނަލްއަށް ވެސް ކުޅުނު ކީޕަރު ބުންޏެވެ.
އޭނާ ބުނީ ޔުވެންޓަސް ވަނީ ސީޒަނަށް ވަރަށް ބޮޑެތި ހޭދަތަކެއް ކޮށްފައި ކަމަށާއި، މިހެންވެ މި ސީޒަނުގައި ގިނަ ކާމިޔާބީތަކެއް ހޯދަންޖެހޭ ކަމަށެވެ.
"އަހަރެން ވަރަށް ފިޓްކޮށް އަބަދުވެސް ތައްޔާރަށް ހުންނަންޖެހޭނެކަން އަހަންނަށް އެނގޭ. އަހަރުމެން މަސައްކަތް ކުރަން ޖެހެނީ ކުރިއަށްވުރެ ގިނަ ކާމިޔާބީތަކެއް ހޯދަން،" މިދިޔަ ސީޒަނުގެ އިޓާލިއަން ލީގު ކާމިޔާބު ކުރި ޓީމުގެ ކީޕަރު ބުންޏެވެ.