ޒަމާނުއްސުރެން ޗުއްޓީ ހޭދަކުރުމަށް ރާއްޖެއިން ބޭރަށް ދިއުމަކީ ދިވެހިންގެ މެދުގައި އޮތް އާދައެކެވެ. ސުކޫލް ބަންދާއި ޢީދުބަންދާއި އެހެނިހެންވެސް ޒަރޫރީ ބޭނުންތަކަށް ދިވެހިން ގިނަ ޢަދަދަކަށް ރާއްޖެއިން ބޭރަށް ދަތުރުކުރެއެވެ. ނަމަވެސް ދާދިފަހުން މޯލްޑިވްސް މަނިޓަރީ އޮތޯރިޓީން ހެދި ސަރވޭއަކުން ދައްކާގޮތުން ޗުއްޓީ ހޭދަކުރަން ދިވެހިން ރާއްޖެއިން ބޭރަށް ދަތުރުކުރާ މިންވަރު ވަނީ ވަރަށް ބޮޑުތަން ދަށްވެފައެވެ.
އެމްއެމްއޭއިން ވެލާނާ އިންޓަނޭޝަނަލް އެއަރޕޯޓުގެ އެރަވައިލްގައި ކުރިޔަށް ގެންދިޔަ ސާރވޭގެ ނަތީޖާ ދައްކާގޮތުން 2015 ވަނަ އަހަރު ޗުއްޓީ ހޭދަކުރުމަށް ރާއްޖެއިން ބޭރަށް ދަތުރުކޮށްފައިވަނީ 27 އިންސައްތަ މީހުންނެވެ. އެއީ 1،056 މީހުންނެވެ. 2016 ވަނަ އަހަރު މިއަދަދު 1،540 މީހުންނާއެކު 34 އިންސައްތައަށް ވަނީ މަތިވެފައެވެ. އެހެންނަމަވެސް ފާއިތުވި އަހަރު 33 އިންސައްތައަށް ވަނީ ދަށްވެފައެވެ. އެއީ 1،396 މީހުންނެވެ.
ދިވެހިން ޗުއްޓީ ހޭދަކުރަންދާ ޤައުމުތަކުގެ ލިސްޓުގެ އެންމެ ކުރީގައި އުޅެނީ ސްރީލަންކާއެވެ. އެއީ ޖުމްލަ 40 އިންސައްތައެވެ. ނަމަވެސް ފާއިތުވި 3 އަހަރުގެ ތެރޭގައި ސްރީލަންކާއަށް ދަތުރުކުރި ދިވެހިންގެ ނިޞްބަތް ދަށްވެފައިވާކަން ސަރވޭއިން ދައްކައެވެ. އެގޮތުން 2015 ވަނަ އަހަރު ޗުއްޓީ ހޭދަކުރުމަށް ސްރީލަންކާއަށް ދަތުރުކުރި ދިވެހިންގެ ނިޞްބަތަކީ 52 އިންސައްތަ އެވެ. 2016 ވަނަ އަހަރު 43 އިންސައްތައަށް އަދި 2017 ވަނަ އަހަރު 40 އިންސައްތައަށްވަނީ ދަށްވެފައެވެ.
ސްރީލަންކާގެ އިތުރުން ދެން އެންމެ ގިނައިން ދިވެހިން ޗުއްޓީ ހޭދަކޮށްފައިވަނީ މެލޭޝިޔާ، އިންޑިއާ، ސިންގަޕޫރު އަދި ތައިލޭންޑްގައެވެ. ތައިލޭންޑް ފިޔަވައި އެހެން ޤައުމުތަކަށް ދަތުރުކުރާ ދިވެހިންގެ ނިޞްބަތް ދަށްވެފައިވާއިރު ފާއިތުވި 3 އަހަރުވެސް ތައިލޭންޑަށް ދަތުރުކުރި ދިވެހިންގެ ނިސްބަތްވަނީ އިތުރުވެފައެވެ. އެގޮތުން 2015 ވަނަ އަހަރު 8 އިންސައްތަ މީހުން ތައިލޭންޑަށް ދަތުރުކުރިއިރު 2016 ވަނަ އަހަރު މިޢަދަދު 9 އިންސައްތަ އަދި 2017 ވަނަ އަހަރު މި 19 އިންސައްތައަށް ވަނީ އިތުރުވެފައެވެ.
އެވްރެޖްކޮށް އެންމެ ގިނަ ދުވަސް ހޭދަކުރަނީ އިންޑިއާއަށް ޗުއްޓީ ހޭދަކުރަން ދަތުރުކުރާ ދިވެހިންނެވެ. އެއީ އެވްރެޖްކޮށް 13 ނުވަތަ 17 ދުވަހެވެ.
ޗުއްޓީ ހޭދަކުރަން ދަތުރުކުރާ ދިވެހިންގެ ނިޞްބަތުން އެންމެ ބޮޑު ހޭދައެއް ކުރަނީ ސިންގަޕޫރަށް ދަތުރުކުރާ ދިވެހިންނެވެ. 2017 ވަނަ އަހަރު ސިންގަޕޫރަށް ދަތުރުކުރި ދިވެހިން ބޮލަކަށް އެވްރެޖްކޮށް 1،859 ޑޮލަރު ހޭދަކޮށްފައިވެއެވެ. ވަކިވަކި މީހުންގެ ނިޞްބަތުން ހޭދަކުރާ މިންވަރު އެންމެ ދަށީ އިންޑިއާ އަދި ސްރީލަންކާއަށް ދަތުރުކުރާ ދިވެހިންނެވެ.
ރާއްޖެއިން ބޭރަށް ޗުއްޓީއަށް ދަތުރުކުރާ ދިވެހިންގެ ޢަދަދު ދަށްވެފައިވާއިރު ބާރު ސްޕީޑުގައި ރާއްޖޭގައި ލޯކަލް ޓޫރިޒަމް އަންނަނީ ކުރިއަރަމުންނެވެ. ސްކޫލް ބަންދާއި، ޢީދު ބަންދާއި، އަހަރީ ޗުއްޓީއާއި، ޚާއްޞަ މުނާސަބާތަކާ ދިމާކޮށް ރިސޯޓްތަކުން ދިވެހިންނަށް ޚާއްޞަ އަގުހެޔޮ ޕެކޭޖުތައް ތަޢާރަފު ކުރުމާއެކު މިހާރު ދިވެހިން މި ފުރުޞަތުގެ ބޭނުން ހިފާ މިންވަރުވަނީ ވަރަށް ބޮޑުތަން އިތުރުވެފައެވެ. މިއާ އެކު ޗުއްޓީ ހޭދަކުރަން ރާއްޖެއިން ބޭރަށް ދިއުމުގެ ޚިޔާލު ދޫކޮށް ރާއްޖޭގެ ރީތި މަންޒިލްތަކުގައި ޗުއްޓީ ހޭދަކޮށްލަންދާ ދިވެހިންގެ ޢަދަދު ވަނީ ވަރަށް ބޮޑުތަން އިތުރުވެފައެވެ.
އެމްއެމްއޭއިން ކުރި ސަރވޭއިން ރާއްޖެއިން ބޭރަށް ޗުއްޓީ ހޭދަކުރަންދާ ދިވެހިންގެ އިތުރުން، ބޭސްފަރުވާއަށާއި، ތަޢުލީމް އަދި ވިޔަފާރީގެ ބޭނުންތަކަށް ދަތުރުކުރާ ދިވެހިންގެ ނިސްބަތްވެސް ވަނީ ދަށްވެފައެވެ.