މޫޑީސް އިންވެސްޓާރސް ސަރވިސަސްއިން ހެދި ކްރެޑިޓް ރޭޓިންގ ގައި ރާއްޖޭގެ ރޭޓިން ދަށްވެފައިވާކަމަށްބުނެ ބައެއް މީޑިއާތަކުގައި ފަތުރަމުންދާ ވާހަކަތައް ފިނޭންސް މިނިސްޓަރ ދޮގުކުރައްވައިފިއެވެ.
ފިނޭންސް މިނިސްޓަރ އަޙްމަދު މުނައްވަރު ވިދާޅުވީ، މޫޑީސްއިން ހެދި ކްރެޑިޓް ރޭޓިންގައި ރާއްޖޭގެ ރޭޓިންގ ދައްނުވެ އެއްވަރެއްގައި ހިފެހެއްޓިފައިވާކަމަށެވެ. އަދި އޭގެބަދަލުގައި ކްރެޑިޓް ރޭޓްގެ އައުޓުލުކް ނެގެޓިވްކޮށް ކަމަށް ބަޔާންކޮށްފައިވަނީ، ތަފްސީލް ދިނުމުގެ ގޮތުން ކަމަށެވެ.
ނެގެޓިވް އައުޓްލުކްގެ މާނަ އޮޅޭގޮތަށް ބައެއް މީޑިއާ ތަކުގައި މަޢުލޫމާތު ފަތުރަމުންދާތީ މިނިސްޓަރވަނީ އައުޓްލުކްގެ މާނަ ހާމަކޮށްދެއްވާފައެވެ. އެގޮތުން އައުޓްލުކަކީ ދެވޭ އިތުރު ތަފްސީލެއްކަން ފާހަގަކުރައްވާ އޭގެ ބޭނުމަކީ ކަމެއް ދިމާވެދާނެކަމަށް އެކަމަށް ހިރާސްތަކެއް ކުޑަކުރުންކަމަށް މިނިސްޓަރ ވިދާޅުވިއެވެ. މޫޑިސްއިން ރާއްޖެއަށް ދީފައިވަނީ ބީ2 ރޭޓިންއެކެވެ. އެކި ކުންފުނިތަކުން މި ރޭޓިން ހަދާއިރު ތަފާތުތަކެއް ހުންނަކަމަށް ފިނޭންސް މިނިސްޓަރ ވިދާޅުވިއެވެ. އެގޮތުން ފިޗްއިން ހެދި ރޭޓިންގައި ރާއްޖެއަށް ލިބިފައިވަނީ ސްޓޭބަލް އައުޓްލުކެކެވެ.
ސަރުކާރުން ރާއްޖޭގެ ޢުމްރާނީ ވަސީލަތްތައް ތަރައްޤީ ކުރުމަށާއި، އިޤްތިޞާދު ފުޅާކުރުމަށް ކުރިއަށްގެންދާ މަޝްރޫޢުތަކުގެ ސަބަބުން ރާއްޖޭގެ އުފެއްދުންތެރިކަމަށް ކުރިއަށްއޮތްތަނުގައި ކުރިއެރުންތަކެއް އަންނާނެކަމަށް މޫޑީސްގެ ބަޔާނުގައި ވަނީ ފާހަގަކޮށްފައެވެ. އަދި މި މަޝްރޫޢުތަކުގެ ނަތީޖާއެއްގެ ގޮތުން ފަތުރުވެރިކަމުގެ ދާއިރާ އިތުރަށް ކުރިއަރައި، އިޖްތިމާއީ ޚިދުމަތުގެ ފެންވަރު މަތިވެގެންދާނެކަމަށް މޫޑީސްއިން ވަނީ ލަފާކޮށްފައެވެ. ނަމަވެސް އިގްތިސާދީ ދުވެލި ދެމެހެއްޓެނިވި މަގަކަށް ގެންދިއުމަށްޓަކައި އިގްތިސާދު ފުޅާކޮށް ސިނާއަތްތައް އިތުރު ކުރުމުގެ މުހިންމުކަން މޫޑީސްއިން ވަނީ ފާހަގަކޮށްފައެވެ.
ޕީއެސްއެމް ނިއުސްއިން ކުރި ސުވާލަކަށް ޖަވާބުދެއްވަމުން މިނިސްޓަރ މުނައްވަރު ވިދާޅުވީ މޫޑީސްއިން ނެރުނު ބަޔާނާއި ގުޅިގެން ބައިނަލްއަޤްވާމީ އެއްވެސް ބޭންކަކުން ރާއްޖެއަށް ދަރަނި ދެއްކޭނެކަމުގެ ޤާބިލްކަމާއިމެދު ސުވާލުއުފައްދާފައިނުވާކަމަށެވެ.
ދަރަނީގެ ސަބަބުން ރާއްޖޭގެ އިޤްތިޞާދަށް ނުރައްކާވެދާނެކަމަށް މޫޑީސްއިން ބުނެފައިވާއިރު، ސަރުކާރުންވަނީ ދަރަނީގެ ސަބަބުން ދިމާވެދާނެ ހިރާސްތައް ކުޑަކުރުމަށްޓަކައި 2017 ވަނަ އަހަރުން ފެށިގެން ސޮވްރިންގ ޑިވަލޮޕްމެންޓް ފަންޑެއް އެކުލަވާލާފައެވެ. ފިނޭސް މިނިސްޓްރީން ބުނީ، ދަރަނީގެ ސަބަބުން ދިމާވެދާނެ ހިރާސްތައް ކުޑަކުރުމަށް އެކުލަވާލާފައިވާ ފަނޑަށް މިހާރުވެސް ޖީޑީޕީގެ ނިސްބަތުން 1.6 އިންސަތަ ޖަމާކޮށްފައިވާކަމަށެވެ. އަދި 2022 ވަނަ އަހަރުގެ ނިޔަލަށް މި ފަނޑުގައި ޖީޑީޕީގެ ނިސްބަތުން 8 އިންސައްތަ ހުންނާނެކަމަށް ސަރުކާރުން ލަފާކޮށްފައިވެއެވެ. މިއީ 500 މިލިއަން ޑޮލަރަށްވުރެ ބޮޑު ޢަދަދެކެވެ. މީގެ އިތުރުން ސަރުކާރުގެ ޚަރަދުތައް ކުޑަކޮށް، އިޤްތިޞާދީ ދުވެލި އިތުރަށް ހަރުދަނާކުރުމަށްޓަކައި ސަރުކާރުން ވަނީ ރިކަރަންޓް ޚަރަދުތައް ކުޑަކޮށް، ބެޖެޓް ޑެފިސިޓް ޖީޑީޕީގެ ނިސްބަތުން 3.1 އިންސައްތައަށް ކުޑަކޮށްފައެވެ.