ސްކޫލު ދަރިވަރުންނަށް ރާއްޖޭގެ ފަރުތައް ދައްކާލުމަށް އެޑިއުކޭޝަން މިނިސްޓްރީން ކުރިއަށްގެންދާ "ފަރުކޮއެ" މަޝްރޫއުގެ ދަށުން، ށ. ފޭދޫ ސްކޫލްގެ ދަރިވަރުންނަށް ފަރުތައް ދައްކާލައިފިއެވެ.
"ފަރު ކޮއެ" މަޝްރޫޢަކީ ސްކޫލްތަކުގެ ދަރިވަރުންނަށް ޚާއްޞަކޮށްގެން ފަރުތަކާއި ފަރުތަކުގެ ވަށައިގެންވާ ދިރުންތަކުގެ ރީތިކަމާއި، އެތަންތަނުގެ މުހިންމުކަށް ދަރިވަރުންނަށް އަންގައިދިނުމަށް ކުރިއަށްގެންދާ މަޝްރޫއެކެވެ.
ށ. ފޭދޫ ސުކޫލްގެ ލީޑިންގ ޓީޗަރ ނުޒުހަތު މޫސާ ވިދާޅުވީ، އެ ސުކޫލްގެ އެލްކޭޖީން ފެށިގެން ގުރޭޑް 11 ގެ 188 ދަރިވަރުންނަށް ރަށުގެ އުތުރުފަރާތުގެ ފަރު ދައްކާލާފައިވާކަމަށެވެ. މި ކަމުގައި ސުކޫލްގެ ޓީޗަރުންނާއި، ބެލެނިވެރިންގެ އިތުރުން ރަށުގެ އެކިއެކި މުވައްސަސާތަކާއި ޢާންމުންގެ ފަރާތުންވެސް ބޮޑު ތަރުހީބެއް ލިބިފައިވާކަމަށް އޭނާ ވިދާޅުވިއެވެ. މި ޙަރަކާތް ކުރިއަށްގެންގޮސްފައިވަނީ އެކި ގުރޫޕްތަކަށް ބަހާލައިގެންނެވެ. ފަރު ބަލާލުމުގެ ފުރުސަތު ލިބުމުން ކުދިން ތިބީ ވަރަށް ހިތްހަމަޖެހިފައިކަމަށް ނުޒުހަތު ވިދާޅުވިއެވެ.
އެޑިއުކޭޝަން މިނިސްޓްރީގެ ޢަމާޒަކީ ކޮންމެ ދަރިވަރަކަށްވެސް މަދުވެގެން އަހަރަކު އެއްފަހަރު ފަރުތައް ބަލާލުމުގެ ފުރުޞަތު ފަހިކޮށްދިނުމެވެ. އަދި މި ޕްރޮޖެކްޓްގެ ދަށުން ކޮންމެ ކުއްޖަކީވެސް ރީފް އެމްބެސެޑަރަކަށް ހަދާ، ފަރުތަކާއި މުރަކަތައް އަދި އުކާލެވޭ ޕްލާސްޓިކް މަދުކުރުމުގެ ގޮތުން ދަރިވަރުންނަށް ބާރުއަޅާ ޙަރަކާތްތަކެއް ކުރިއަށްގެންދިޔުމަށް ރާވާފައިވެއެވެ.