ދުނިޔޭގެ ޝެފުންގެ ޖަމިއްޔާ "ވޯލްޑް އެސޯސިއޭޝަން އޮފް ޝެފްސް ސޮސައިޓީސް" (ވެކްސް) ގެ 38 ވަނަ ކޮންގްރެސްގައި ރާއްޖެއިން ބައިވެރިވެއްޖެއެވެ.
ވޯލްޑް ޝެފްސް ކޮންގްރެސް އެންޑް އެކްސްޕޯ 2018 ކުރިއަށް ދިޔައީ މިމަހުގެ 11 ން 14 އަށް މެލޭސިޔާގެ ކުއާލާލަމްޕޫރު ކޮންވެންޝަން ސެންޓަރުގައެވެ. މިއީ މި ސަރަޙައްދުގެ ޤައުމެއްގައި ޝެފްސް ކޮންގްރެސް ބޭއްވި ފުރަތަމަ ފަހަރެވެ.
ޝެފްސް ކޮންގްރެސް ގައި މުޅި ދުނިޔޭގެ އެކި ކަންކޮޅުތަކުން 4000 އަށްވުރެ ގިނަ ޝެފުން ބައިވެރިވެފައިވާއިރު، ދިވެހިރާއްޖެއިން މި ކޮންގްރެސްގައި ބައިވެރިވި ޓީމުގައި ޖުމްލަ 21 ޝެފުން ވަނީ ބައިވެރިވެފައެވެ. އޭގެތެރޭގައި 16 ޝެފުންނާއި، ކިޔަވަމުންދާ 5 ޝެފުން ހިމެނެއެވެ. މި ކޮންފަރެންސްގައި ރާއްޖޭގެ ޝެފުން ބައިވެރިވެފައިވަނީ ވެކްސްގެ ދިވެހިރާއްޖޭގެ ނޭޝަނަލް މެމްބަރ އެސޯސިއޭޝަންކަމަށްވާ ސެފް ގިލްޑް މޯލްޑިވްސް (ސީޖީއެމް) ގެ ފަރާތުންނެވެ.
ކޮންގްރެސްގައި ދުނިޔޭގެ އެކި ކަންކޮޅުތަކުގެ ޝެފުން އެއްފުރާޅެއްގެ ދަށުން ބައްދަލުވެ، އެކި ޤައުމުތަކުގެ ޝެފުންނާއި ވަރަށް ބޮޑަށް ގުޅުން ބަދަހިވެ، އެފަރާތްތަކުގެ މައުލޫމާތު ބަދަލުކޮށް ޙިއްސާ ކުރެވިގެންދިޔަކަމަށް ސީޖީއެމްއިން ބުނެއެވެ. އަދި މިދާއިރާއަށް އަންނަ އެކިއެކި އިންޤިލާބީ ބަދަލުތަކާއިބެހޭ ގޮތުންވެސް މަޝްވަރާކޮށް، ދުނިޔޭގެ ނަން މަޝްހޫރު އެތައް ޝެފުންނާ ބައްދަލުވެ، އެމީސްމީހުންގެ ތަޖުރިބާތައް ޙިއްސާކޮށްފައިވާކަމަށް އެ އެސޯސިއޭޝަނުން ބުނެއެވެ.
މިވޭތުވެދިޔަ 4 އަހަރު ދިވެހިރާއްޖެއިން ބައިވެރިވި އެކިއެކި މުބާރާތްތަކުން ދިވެހި ޝެފުންވަނީ ރަން ވަނަތަކެއް ހާޞިލުކޮށްފައެވެ. ޚާއްސަ ގޮތެއްގައި، ސްރީލަންކާ، ސިންގަޕޫރު، ހޮންގކޮންގ، ސީޝެލްސް އަދި ދުބާއީ އަދި ޗައިނާ ފަދަ ޤައުމުތަކުގައި ދިވެހި ޝެފުން ވަނީ ވާދަކޮށް ރަން ވަނަތަކެއް ވަނީ ހާސިލުކޮށްފައެވެ.
ކޮންގްރެސްގައި ކުރިއަށް ދިޔަ ޖަޖިންގ ސެމިނަރ ގައި ބައިވެރިވެ، ދިވެހި މަޝްހޫރު ޝެފެއްކަމުގައިވާ އަހުމަދު ފަތީން ވަނީ ބައިނަލްއަޤްވާމީ ޖަޖެއްގެ ގޮތުގައި ސަރޓިފައި ކުރެވިފައެވެ. ޝެފް ފަތީނުގެ އިތުރުން މިހާރު ދިވެހިރާއްޖޭގެ އިންޓަރނޭޝަނަލް ސަރޓިފައި ކުރެވިފައިވާ 3 ޖަޖުން ތިބެއެވެ.