ލޯނު އުސޫލުން ބަޔާން މިއުނިކަށް ކުޅެމުން އަންނަ ކޮލަމްބިއާގެ މިޑްފީލްޑަރު ހާމޭސް ރޮޑްރިގޭޒް އެނބުރި ރެއާލް މެޑްރިޑަށް ގެންދަން އެކުލަބުން މަސައްކަތް ފަށައިފިއެވެ.
ހާމޭސް އަކީ 2014 ވަނަ އަހަރުގެ ވޯލްޑް ކަޕުގެ ރަންބޫޓު ހޯދި ކުޅުންތެރިޔާއެވެ. ރެއާލްއަށް އޭނާ ގެންދިޔައީ އެ މުބާރާތުގައި ދެއްކި މޮޅު ކުޅުމުގެ ސަބަބުންނެވެ. ނަމަވެސް ތަރިން ގިނަ ވުމާއެކު ކޯޗު ޒައިނުއްދީން ޒިދާންގެ ޓީމުގައި އޭނާ އިންނަންޖެހުނީ ބެންޗުގައެވެ.
އަލުން އޭނާ ގެންދިއުމަށް ރެއާލް ބޭނުން ވަނީ ކްރިސްޓިއާނޯ ރޮނާލްޑޯ އިޓަލީގެ ޔުވެންޓަސްއަށް ބަދަލުވުމާއެކު އެ މަޤާމަށް ހެޔޮ އަގެއްގައި މޮޅު ކުޅުންތެރިއަކު ލިބެން ނެތުމުންނެވެ. އަނެއްކޮޅުން ހާމޭސް ވަނީ ޒިދާން ކޯޗުކަން ދޫކޮށްލުމާއެކު އަލުން ރެއާލް މެޑްރިޑުގައި ކުޅެން ޝައުގުވެރިކަން ފާޅުކޮށްފައެވެ.
ރެއާލްއާއެކު ހާމޭސް ހަދާފައިވާ ކޮންޓްރެކްޓް ހަމަވާނީ ކުރިއަށް އޮތް ސީޒަނުގެ ނިޔަލަށެވެ. ނަމަވެސް އޭނާ ލޯނު އުސޫލުން ދެ އަހަރަށް ދޫކޮށްލި އިރު ކޮންޓްރެކްޓްގައި އޭނާ ގަނެވޭނެ އުސޫލެއް ބަޔާންއަށް ދީފައިވެއެވެ. މިހެންވެ ބަޔާން މިހާރު މަސައްކަތް ކުރަނީ ހާމޭސް ގަނެ އެކުލަބުގައި ދާއިމީ ކުރުމަށެވެ. ނަމަވެސް މިފަހަރު ރެއާލް ވެސް އޮތީ ގަދަ ހިފުމަކަށް ދާން ތައްޔާރަށެވެ.