ކ. އެނބޫދޫފަޅު ތަރައްޤީކުރުމުގެ މަސައްކަތް ކުރިއަށްދާ ގޮތުގެ ޑޮކިއުމެންޓްރީއެއް ތައްޔާރުކުރުމުގެ މަސައްކަތް ފަށައިފިއެވެ. "މޭކިންގ މެގަ އިން ޕެރަޑައިސް" ގެ ނަމުގައި އުފައްދާ މި ޑޮކިއުމަންޓްރީ އުފައްދަނީ އެނބޫދޫފަޅު ތަރައްގީކުރާ ތައިލެންޑްގެ ސިންގް އެސްޓޭޓުން އޭ ޕްލަސް އީ ނެޓްވޯކްސް އޭޝިއާ އާއި ހިސްޓްރީ އޭޝިއާ ޗެނަލް ގުޅިގެންނެވެ.
ސިންގް އެސްޓޭޓުން ބުނީ އިންޑިއާ ކަނޑުގެ އެންމެ ބޮޑު އިންޓަގްރޭޓަޑް ރިސޯޓް ރާއްޖޭގައި ތަރައްގީކުރާއިރު އެ މަޝްރޫއުގައި ދިމާވާ ލޮޖިސްޓިކަލް އަދި އިންޓެލެކްޗުއަލް ގޮންޖެހުންތައް އެ ސީރީޒްގައި ފެނިގެންދާނެ ކަމަށެވެ. އަދި ހައިރާންކުރުވަނިވި އެތައް ކަމެއް ހިމެނޭ ގޮތަށް، ބައިގަޑިއިރުގެ ހަ އެޕިސޯޑުގެ މައްޗަށް އެކުލެވޭ އެ ޑޮކިއުމެންޓަރީ ސީރީޒް ނެރޭނީ އަންނަ އަހަރުގެ ކުރީކޮޅުކަމަށްވެސް އެ ކުންފުނިން މައުލޫމާތުދެއެވެ.
ސިންގް އެސްޓޭޓުން ބުނީ ކޮންސްޓްރަކްޝަންގެ އެކި ދާއިރާތަކުން މާހިރުންގެ މަލްޓި ޑިސިޕްލިނަރީ ޓީމެއް ހަރަކާތްތެރިވާ ތަން މޭކިން މެގަ އިން ޕެރަޑައިސްގައި ފެނިގެންދާނެ ކަމަށެވެ.
މި ޑޮކިޔުމަންޓްރީގައި އެންމެ ޙާއްސަކަމެއް ދެވޭނީ އެނބޫދޫ ފަޅުގެ ރީތިކަމާއި ހިތްގައިމުކަމަށްކަމަށް ސިންގް އެސްޓޭޓް ކުންފުނިން ބުނެއެވެ. އަދި އެނބޫދޫ ރިސޯޓް މެގަ މަޝްރޫއު ކުރިއަށްދާއިރު މި މަޝްރޫގައި ހަރަކާތްތެރިވާ މާހިރުންގެ ކޮންމެ ނިންމުމެއްގައިވެސް ވަށައިގެންވާ ނާޒުކު މެރައިން އީކޯ ސިސްޓަމް ރައްކާތެރިކުރުމަށް ވިސްނާފައިވާ މިންވަރާއިއެކަމަށް ބޭނުންކުރާ އުކުޅުތައް މި ސީރީޒްގެ ތެރެއިން ފެނިގެންދާނެކަމަށެވެ. އަދި އީކޯ ކޮންޝަސް ޑިވެލޮޕްމަންޓްގައި ކަނޑައަޅާ ލަނުދަނޑިތައް ކާމިޔާބު ކުރުމަށް ކުދިކުދި ތަފްސީލުތަކަށް ދޭން ޖެހޭ ހާއްސަ ސަމާލުކަމާއި އަހައްމިއްޔަތު އެ ސީރީޒްގައި ފެނިގެންދާނެ ކަމަށް ސިންގް އެސްޓޭޓުން ބުންޏެވެ.