ލިވަބޯޑް އެސޯސިއޭޝަން އޮފް މޯލްޑިވްސްގެ 11 ވަނަ އަހަރީ އާންމު ޖަލްސާ ބާއްވައިފިއެވެ. ޗަންޕާ ސެންޓްރަލް ހޮޓެލްގައި ބޭއްވި މި ޖަލްސާގައި އެ އެސޯސިއޭޝަނުން ނިމިދިޔަ އަހަރު ކުރެވުނު ކަންތައްތައްވަނީ ހިއްސާކޮށްފައެވެ. އެގޮތުން ލިވަބޯޑްގެ ދާއިރާއަށް ގިނަ ގޮންޖެހުންތައް ކުރިމަތިވިނަމަވެސް ނިމިދިޔަ އަހަރަކީ ގިނަ ކަންތައްތަކެއް ކުރެވުނު އަހަރެއްކަމަށް އެ އެސޯސިއޭޝަނުން ބުނެއެވެ.
ލިވަބޯޑް އެސޯސިއޭޝަންގެ ރައީސް އިބްރާހިމް ޝާހިދް ވިދާޅުވީ، ސަފާރީ އޯންރުންނަށް ދިމާވާ ކަންތައްތަކަށް ޙާއްސަކޮށްގެން އިންޝުއަރެންސްގެ ޕެކޭޖެއް ވަރަށް އަވަހަށް އެލައިޑް އިންޝުއަރެންސްއާއި ގުޅިގެން ތައާރަފްވެގެންދާނެކަމަށެވެ. އަދި މޯލްޑިވްސް މެރިން އެކްސްޕޯ މިއަހަރު ނުބޭއްވުނު ނަމަވެސް އަންނަ އަހަރުގެ ކުރީކޮޅު މި އެކްސްޕޯ ބޭއްވި، ލިވަބޯޑްތަކަށް ޙާއްސަކޮށްގެން ނެރޭ މެގަޒިންވެސް އަލުން ނެރެވި ދާއިރާގެ ގިނަ މަސައްކަތްތަކެއް ކުރެވިގެންދާނެކަމަށް އޭނާ ވިދާޅުވިއެވެ.
ލިވަބޯޑް އެސޯސިއޭޝަންގެ 11 ވަނަ އަހަރީ އާންމު ޖަލްސާގައި ކުރިއަތްއޮތް 1 އަހަރުދުވަހަށް ބޯޑް މެންބަރުންވެސް ވަނީ އައްޔަންކޮށްފައެވެ. ބޯޑް މެންބަރުންގެ ގޮތުގައި 9 މެންބަރުން ވަނީ ވޯޓަކާއިނުލައި އިންތިހާބްވެފައެވެ. އޭގެތެރޭގައި ހިމެނެނީ އަޙްމަދު ޒުބެއިރު އާދަމް، މޫސާ ރަޝީދު، މުފީދު އަބްދުއްﷲ، ހަސަން ހަލީމް، އަހްމަދު އިބްރާހީމް، ހައްވާ ނަފީލާ މީގެއިތުރުން އަބްދުއްﷲ ނަޝީދާއި، އަޙްމަދު އިލްޔާސް ގެ އިތުރުން އަޙްމަދު މަންސޫރެވެ.
މިދިޔަ އަހަރަށްވުރެ ކާމިޔާބު އަހަރެއްގެ ގޮތުގައި މި އަހަރު ހެދުމަށް ލިވަބޯޑް އެސޯސިއޭޝަން އިތުރު މަސައްކަތްތަކެއް ކުރާނެކަމަށް އެ އެސޯސިއޭޝަނުން ބުނެއެވެ. 2017 ވަނަ އަހަރު ނިމުނުއިރު ރާއްޖޭގައި 150 އަށްވުރެ ގިނަ ލިވަބޯޑް އަންނަނީ ހިންގަމުންނެވެ.