ރާއްޖޭގެ ފުރަތަމަ ރީތީގެ ރާނީ ހއ. ބާރަށު ރަމްލާ އަޙްމަދު ދީދީ ނިޔާވެއްޖެއެވެ.
މަޢުލޫމާތު ލިބިފައިވާގޮތުގައި ރަމްލާ ނިޔާވީ އައިޖީއެމްއެޗް ހޮސްޕިޓަލުން ފަރުވާ ހޯދަމުން ދަނިކޮށް މިއަދު ހެނދުނުގެ ވަގުތެއްގައެވެ. ނިޔާވިއިރު އުމުރަކީ 83 އަހަރެވެ.
ރާއްޖޭގެ ފުރަތަމަ ރީތީގެ ރާނީގެ ލަޤަބު ރަމްލާ ހާޞިލުކުރީ އޭނާގެ އުމުރުން އެންމެ 18 އަހަރުގައެވެ. އެއީ 1953 ވަނަ އަހަރު ދިވެހިރާއްޖޭގެ ފުރަތަމަ ޖުމްހޫރިއްޔާގެ ފުރަތަމަ ރައީސް މުޙައްމަދު އަމީން ދީދީގެ ވެރިކަމުގައި ރާއްޖޭގައި ޤައުމީ ފެންވަރެއްގައި ބޭއްވި ރިތީގެ ރާނީ ހޮވުމުގެ މުބާރާތް ކާމިޔާބުކޮށްގެންނެވެ. 1953 ވަނަ އަހަރުގެ ޖުމްހޫރީ ދުވަހުގެ ހަރަކާތްތަކާއި ގުޅުވައިގެން ބޭއްވި ރީތީގެ ރާނީ މުބާރާތުގައި ފަނޑިޔާރުން އިންސާފުކޮށްފައިވަނީ މިހާރުގެ ފެޝަން ޝޯތަކާއި، ރީތީގެ ރާނީ ހޮވުމަށް ބާއްވާ ތަފާތު މުބާރާތްތަކާއި ޚިލާފަށް، ކުރިމަތީގައި ހިންގުވުމުގެ ބަދަލުގައި، ބައިވެރިންގެ ފޮޓޯއަށް ބަލައިގެންނެވެ. ރާއްޖޭގައި ޤައުމީ ފެންވަރެއްގައި ބޭއްވުނު ހަމައެކަނި ރީތީގެ ރާނީ ހޮވުމުގެ މުބާރާތުގައި ރާއްޖޭގެ އެކި ކަންކޮޅުތަކުން ހޮވާލެވުނު 21 އަންހެން ބޭފުޅުން ބައިވެރިއެވެ.
ހއ. ބާރަށު ނާދިރަމްގެ ރަމްލާއަކީ އެންމެނާވެސް ވަރަށް ގުޅޭ ހިތްހެޔޮ، އަދި ވަރަށް ޚިދުމަތްތެރި ބޭކަނބަލެއްކަމަށާއި، ރަށުގެ އެކިކަންކަމުގައި އަމަލީގޮތުން ބައިވެރިވެލައްވާ ބޭކަނބަލެއްގެ ގޮތުގައި ބާރަށު ކައުންސިލުން ބުނެއެވެ. ރަމްލާ ނިޔާވިއިރު، ހަތް ކުދިން ދުނިޔޭގައި އެބަތިއްބެވެ.
މަރުޙޫމާގެ މައްޗަށް ކަށުނަމާދު ކުރުން އޮންނާނީ މިއަދުގެ މަޣްރިބު ނަމާދަށްފަހު އާސަހަރާ މިސްކިތުގައެވެ.