ކުރިއަށް އޮތް ރިޔާސީ އިންތިޚާބުގައި ރައްޔިތުން ނުކުމެ، ލާ ވޯޓަކީ ސިޔާސީ ވިސްނުމެއްގައި ލާ އެއްޗަކަށް ވެގެންނުވާނެކަމަށާއި، އެއީ ޤައުމުގެ ކުރިމަގު ބިނާކޮށް، ތަރައްޤީއަށްޓަކައި ލާ ވޯޓަކަށް ހެދުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ގޮވާލައްވައިފިއެވެ.
އެމަނިކުފާނު މިކަމަށް ގޮވާލެއްވީ ށ.ފުނަދޫ ބިން ހިއްކުމުގެ މަސައްކަތް ނިންމައި، އެއަރޕޯޓުގެ ރަންވޭގެ ޢަމަލީ މަސައްކަތް ފެށުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ށ.ފުނަދޫ ބިން ހިއްކުމުގެ މަސައްކަތް ނިންމައި އެރަށުގެ އެއަރޕޯޓުގެ ރަންވޭގެ ޢަމަލީ މަސައްކަތް ފެށުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވީ، ތަރައްޤީއަކީ ހަމައެކަނި މެނިފެސްޓޯއެއްގައި ލިޔެގެން ގެނެވޭނެ އެއްޗެއް ނޫންކަމަށާ، އެކަންކަން ހަޤީޤަތަކަށް ހެދުމުގެ ވިސްނުމާއި، ޤާބިލުކަން އެ ސަރުކާރެއްގެ ކިބައިގައި ހުންނަންވެސް ޖެހޭނެކަމަށެވެ. އަދި މި ސަރުކާރުން މިއަދު ކުރާ މަސައްކަތަކީ ރާއްޖޭގައި ލިބެންނެތް ފައިސާވެސް ހޯދައިގެން ރައްޔިތުންނަށް ބޭނުންވާ ތަރައްޤީ އޭގެ އެންމެ ފުރިހަމަގޮތުގައި ގެނެސްދިނުމުގެ މަސައްކަތް ކަމަށާއި، އެއާއެކު ރައްޔިތުންގެ ވިސްނުން ދެން ބަހައްޓަންވީ، މި ތަރައްޤީ ދެމެހެއްޓޭނެ ގޮތްތަކާމެދުކަމަށް އެމަނިކުފާނު ވިދާޅުވިއެވެ.
ފާއިތުވި 4 އަހަރާއި ބައިގެ ތެރޭގައި ރާއްޖޭގެ އިޤްތިޞާދީ ޙާލަތު ބަދަލުކޮށް، ރާއްޖޭގެ އެތަންމިތާނގައި ކުރިއަށްދާ ތަރައްޤީގެ ބިޔަ މަޝްރޫޢުތަކާއެކު މި ސަރުކާރުގެ ވިސްނުންހުރީ ކޮން މިސްރާބަކާ ދިމާއަށްކަން ރައްޔިތުންނަށް މިހާރު ސާފުވެފައިވާކަމަށް ރައީސް ޔާމީން ވިދާޅުވިއެވެ. އަދި ރައްޔިތުންގެ މެދުގައި ސިޔާސީގޮތުން ފިކުރު ތަފާތުވިޔަސް، ރަށްރަށުގެ ތަރައްޤީއަށާއި، ޤައުމުގެ ކުރިއެރުމަށް ކަންކަން ނިންމަންވާނީ ސިޔާސީ ފިކުރަކުން ނޫންކަން އެމަނިކުފާނު ވަނީ ފާހަގަކުރައްވާފައެވެ.
އެހެންކަމުން ކުރިއަށް އޮތް ރިޔާސީ އިންތިޚާބުގައި ރައްޔިތުން ނުކުމެ ލާ ވޯޓަކީ ސިޔާސީ ވިސްނުމެއްގައި ލާ ވޯޓަކަށް ވެގެންނުވާނެކަމަށާއި، އެއީ ޤައުމުގެ ކުރިމަގު ބިނާކޮށް، ތަރައްޤީއަށްޓަކައި ލެވޭ ވޯޓަކަށް ހެއްދެވުމަށް ރައީސް ޔާމީންގެ ވާހަކަފުޅުގައި ވަނީ ގޮވާލައްވާފައެވެ.
ރައީސް ޔާމީންގެ ވާހަކަފުޅުގައި ރާއްޖޭގެ އެންމެ އުތުރުން ހއ، ހދ. ، ށ. މިއަތޮޅުތަކަށް ފަތުރުވެރިކަން ފުޅާކުރުމަށް މި ސަރުކާރުން ކުރަމުންދާ މަސައްކަތްތަކުގެ މައްޗަށްވެސް ވަނީ އަލިއަޅުއްވާލައްވާފައެވެ. އެގޮތުން ފަތުވެރިކަމަކީ ހަމައެކަނި މާލޭ ސަރަޙައްދަށް އޮތް އެއްޗެއްގެ ބަދަލުގައި، ފަތުވެރިކަމުން ލިބޭ ނަފާ މުޅި ރާއްޖެއަށް ފުޅާކުރުމަށް ކުރަމުންދާ މަސައްކަތްތައް ރައީސް ޔާމީން ވަނީ ފާހަގަކުރައްވާފައެވެ. އަދި ށ.ފުނަދޫގައި ސަރުކާރުން ތަރައްޤީކުރާ އެއަރޕޯޓު ވެގެންދާނީ އެ ސަރަޙައްދުގެ ދަތުރުފަތުރުގެ ނިޒާމު ހަރުދަނާވުމުގެ އިތުރަށް، އިތުރު ބިޔަ އިންވެސްޓްމަންޓްތައްވެސް އެސަރަޙައްދަށް އައުމަށް ހުޅުވިގެންދާ ދޮރަކަށްކަމަށް ރައީސް ޔާމީން ވިދާޅުވިއެވެ.
ރައީސް ޔާމީންގެ ވާހަކަފުޅުގައި މި ސަރުކާރުން މެނިފެސްޓޯގައި ކަންކަން ލިޔަނީ، ޤައުމުގެ ޙާލަތު ރަނގަޅަށް އެނގިތިބެ، އެ ޙާލަތު ބަދަލުކޮށްދިނުމަށްކަމަށް ވިދާޅުވިއެވެ. އަދި އެކަންކަމަށް ބޭނުންވާ ފައިސާ ހޯދާނެގޮތް މި ސަރުކާރަށް އެނގޭކަމަށާއި، ދަރަނި އަދާކުރުމުގެ ޤާބިލުކަން މި ސަރުކާރުގައި ހުރިކަމަށް ވިދާޅުވާ ވިދާޅުވުން އެމަނިކުފާނު ވަނީ ތަކުރާރުކުރައްވާފައެވެ.