މެލޭޝިޔާގެ ލިމްކޮކްވިންގ ޔުނިވަރސިޓީގައި ހިންގާ ކޯސްތަކަށް ވަގުތުން ރަޖިސްޓްރީވުމާއި ވިސާ ކަންކަން ހަމަޖައްސާދިނުން މިއަދާއި މާދަމާ ހަމަޖެހިފައިވާކަމަށް އެ ޔުނިވަރސިޓީން ބުނެފިއެވެ.
ލިމްކޮކްވިންގ ޔުނިވަރސިޓީގެ އިންޓަނޭޝަނަލް ޑިވެލޮޕްމަންޓް، ކުމާރ ޝިވަމް ވިދާޅުވީ، ލިމްކޮކްވިންގ ގެ ކޯސްތަކާއި އަދި އެ ޔުނިވަރސިޓީއާއި އެމްއެމްއައި ގުޅިގެން ކުރިއަށްގެންދާ ކޯސްތަކަށް ވަގުތުން ރަޖިސްޓްރީވުމުގެ ފުރުސަތު މިއަދާއި މާދަމާ މާލޭ އިތުރުން އައްޑޫ ސިޓީގައި ކުރިޔަށްދާނެކަމަށެވެ.
ކޯސްތަކަށް ރަޖިސްޓްރީކުރާ ފަރާތްތަކަށް ސްކޮލަރޝިޕުން 50 އިންސައްތައިގެ ޑިސްކައުންޓް ލިބިގެންދާނެކަމަށާއި އަދި އެޕްލިކޭޝަން ފޯމާއިއެކު ޕާސްޕޯޓްގެ ކޮޕީއެއް ގެނައުމުން ވިސާގެ ކަންތައްތައްވެސް ހަމަޖެހިގެންދާނެކަމަށްވެސް ޝިވަމް ވިދާޅުވިއެވެ. އަދި ކޯސްތަކަށް ރަޖިސްޓްރީކުރާ ފަރާތްތަކަށް ޖުލައި އިންޓޭކްގައި ބައިވެރިވުމުގެ ފުރުސަތު ލިބިގެންދާނެކަމަށް ޝިވަމް ވިދާޅުވިއެވެ.
ލިމްކޮކްވިންގ ގެ ރާއްޖޭގެ އޮފިޝަލް ޕާޓްނަރ އެމްއެމްއައި އާއިއެކު އޮގަސްޓް މަހުގެ ތެރޭގައި ޑިޕްލޮމާ ފެންވަރުގެ ކޯސްތަކެއް ފެށުމަށް ވަނީ ހަމަޖެހިފައެވެ. ލިމްކޮކްވިންގއަކީ މެލޭޝިޔާގެ އެންމެ ރަނގަޅު ޔުނިވަރސިޓީތަކުގެ ތެރޭގައި ހިމެނޭ ޔުނިވަރސިޓީއެކެވެ. މިތަނުގައި މިހާރުވެސް 100 އަށްވުރެ ގިނަ ދިވެހި ދަރިވަރުން އަންނަނީ ފައުންޑޭޝަން ލެވެލްއިން ފެށިގެން މާސްޓާރސް ލެވެލްގެ ކޯސްތައް ކިޔަވަމުންނެވެ.
ލިމްކޮކްވިންގ އާއި އެމްއެމްއައި ގުޅިގެން ކުރިޔަށް ގެންދާ އެކަޑަމިކް އެކްސްޕޯ މިއަދާއި މިރޭވެސް ކުރިޔަށް ދާނެއެވެ.