ޔޫރަޕިއަން ޔޫނިއަން، އީޔޫއާއެކު ސަރުކާރުން ބާއްވާ މަތީ ފެންވަރުގެ މަޝްވަރާތަކުގައި ރާއްޖޭގެ ފަރާތުން ބައިވެރިވެވަޑައިގަންނަވާ އިސް ވަފްދުގެ ބޭފުޅުން ބެލްޖިއަމްގެ ވެރިރަށް ބްރަސަލްސްއަށް ވަޑައިގެންފިއެވެ. ދެ ދުވަހުގެ މުއްދަތަކަށް ކުރިއަށްގެންދިއުމަށް ހަމަޖެހިފައިވާ މި މަތީ ފެންވަރުގެ ބައްދަލުވުން ފެށުމަށް ހަމަޖެހިފައިވަނީ މާދަމާއެވެ.
އީޔޫއާއެކު ބާއްވާ މި މަޝްވަރާތަކުގައި ދިވެހި ސަރުކާރުން ބައިވެރިވެވަޑައިގަންނަވާ ވަފްދުގައި އިސްކޮށް ހުންނަވާނީ ފޮރިން މިނިސްޓަރ ޑރ. މުޙައްމަދު އާސިމެވެ. ފޮރިން މިނިސްޓަރގެ އަރިހުގައި ފިޝަރީޒް މިނިސްޓަރު ޑރ. މުޙައްމަދު ޝައިނީއާއި، ރައީސުލްޖުމްހޫރިއްޔާގެ އޮފީހުގެ ލީގަލް އެފެއާޒް މިނިސްޓަރ އަލްއުސްތާޛާ އާޒިމާ ޝަކޫރާއި، ދިވެހިރާއްޖެއިން އީޔޫއަށް ކަނޑައަޅާފައިވާ ސަފީރު އަހުމަދު ޝިއާންވެސް މި މަޝްވަރާތަކުގައި ބައިވެރިވެވަޑައިގަތުމަށް ވަނީ ހަމަޖެހިފައެވެ.
މި މަޝްވަރާތަކުގައި ޔޫރަޕިއަން އެކްސްޓާނަލް އެކްޝަން ސަރވިސްއާއި، ޔޫރަޕިއަން ޕާލިމެންޓުގެ އިތުރުން، އީޔޫގެ އެހެން މުއައްސަސާތަކާއެކުވެސް މަޝްވަރާ ކުރުމަށް ހަމަޖެހިފައިވެއެވެ. މީގެ އިތުރުން އީޔޫއާއި ރާއްޖެއާ ދެމެދު ގުޅުން އިތުރަށް ބަދަހިކޮށް ގިނަ ދާއިރާތަކަކާގުޅޭ މަޝްވަރާތައް ކުރާނެ ކަމަށްވެސް ފޮރިން މިނިސްޓްރީން ބުނެއެވެ. އެގޮތުން އީޔޫއާއެކު މަޝްވަރާކުރަން ނިންމާފައިވާ ކަންކަމުގެ ތެރޭގައި މޫސުމަށް އަންނަ ބަދަލުތަކާއި، މަސްވެރިކަމާއި، ޝެންގެން ވިސާ، އަދި ރިޔާސީ އިންތިހާބުގެ ކަންކަމުގެ އިތުރުން، ޓެރަރިޒަމާއި ވިޔަފާރީގެ ދާއިރާ ހިމެނެއެވެ.
ދިވެހި ސަރުކާރުގެ އިސް ވަފްދެއް އީޔޫއާއިއެކު މި ހަފްތާގައި ބައްދަލުކޮށް އެކި ދާއިރާތަކުން މަޝްވަރާ ކުރުމަށް ނިންމާފައިވާއިރު، 2015 ވަނަ އަހަރުން ފެށިގެން އީޔޫއާއެކު ސަރުކާރުން ވަނީ މަތީ ފެންވަރުގެ މަޝްވަރާތަކެއް ފަށާފައެވެ.