ކުލަބު ބަދުނާމުކޮށް، އޮޅުވާލާފައިވާތީވެ، ނިއުރޭޑިއަންޓްގެ އަފްޣާނިސްތާން ޑިފެންޑަރު ޒޯހިބް އިސްލާމް އަމީރީއާ ދެކޮޅަށް ފީފާއަށް މައްސަލަ ހުށަހަޅާނެ ކަމަށް ނިއުރޭޑިއަންޓުން ބުނެފިއެވެ.
ޖެނެރަލް ސެކްރެޓަރީ އަހުމަދު ނިޔާޒް (ޓެޑް) ބުނީ ދެމަހާއި ބައިވަންދެން ކުލަބުން މުސާރަނުދީ ހުރި ކަމަށް ބުނެ އަފްޣާނިސްތާނުގެ ކުރީގެ ކެޕްޓަން، ނިއުއާ ދެކޮޅަށް ފީފާ އަށް މައްސަލަ ހުށަޅާން ތައްޔާރުވާއިރު ކުޅުންތެރިޔާ ދައްކަމުންދަނީ ދޮގު ވާހަކަތަކެއް ކަމަށެވެ.
"އެއީ ކަނޑައެޅިގެން ދޮގެއް. މެއި މަހުގެ މުސާރަ ދޭން ޖެހެނީ ޖޫން 10ގެ ކުރިން. މުސާރަ ދިނީމަ ވެސް އޭނާ ނުހިފި. އަސްލު އޭނާ ޑިމާންޑްކުރަނީ ކޮންޓްރެކްޓްގައި ނެތް ކަންތައްތަކަކަށް،" ޓެޑް ބުންޏެވެ.
އަމީރީ ބޭނުންވަނީ ދިރިއުޅުމަށް ވަކިން އެޕާޓްމަންޓެއް ކަމަށާއި، ނަމަވެސް އޭއެފްސީ ކަޕުގެ ދެ ވަނަ ބުރަށް ނުދެވުމުން ނިއުއަށް ކުރިމަތިވި މާލީ ގެއްލުންތަކާހުރެ ވެސް ކުޅުންތެރިން ބައިތިއްބާފައިތިބީ އެންމެ ފެންވަރު ރަނގަޅު ފެސިލިޓީގައި ކަމަށް ޓެޑް ބުންޏެވެ.
"ކޯޗަށް ވަކި އެޕާޓްމަންޓެއް ދީފައި ވަނީ. ދެން ތިބި ތިން ކުޅުންތެރިންނަށް އެންމެ ފެންވަރު ރަނގަޅު އެޕާޓްމަންޓެއް ހަމަޖައްސައިދިނީ ކޮންމެ މީހަކަށް ރޫމެއް ދީފައި. އެގޮތް އަމީރީއަށް ކަމުނުދިޔައީ. ގެއިން ނެރުނު ކަމަށް އޭނާ ބުނާ ވާހަކައަކީ ދޮގެއް. ކުރިން ކުޅުންތެރިންތިބި އެޕާޓްމަންޓް ހުސްކުރާނެކަން ކުޅުންތެރިންނަށް އެންގީ އެއިމާރާތް އެއްކޮށް އެތަނުގެ ވެރިފަރާތުން ބޭނުންވުމުން. ކަންޑޭލާ އާއި ގޮޓޯ (ނިއުގެ ބިދޭސީ ތިން ކުޅުންތެރިންގެ ތެރެއިން ދެ ކުޅުންތެރިން) އަހަރުމެން ބުނި ގޮތަށް ޕެކްކުރި ތަންހުސްކުރަން. އެކަމަކު އަމީރީ ގޮތްދޫނުކޮށް ޕެކްނުކޮށް ހުރީމަ އަހަރުމެން ގޮސް އޭނާ ނެރުނީ. ދެން އޭނާ އަމިއްލައަށް ގޮސް ހޮޓަލެއްގައި ހުރީ،" ޓެޑް ބުންޏެވެ.
އޭނާ ބުނީ ނިއުއިން ބިދޭސީ ކުޅުންތެރިންނާމެދު ކަންތައްކުރަނީ މިހާތަނަށް ދިވެހި ކުލަބަކުން ބިދޭސީ ކުޅުންތެރިންނާމެދު ކަންތައްތައް ކޮށްނުދޭހާ ރަނގަޅަށް ކަމަށާއި، ނަމަވެސް އަމީރީ އިއްޔެރޭ ރާއްޖެއިން ފުރީ ވެސް ކުލަބަށް ނާންގައި ކަމަށެވެ.
"އޭނާއަކީ ނިއުގެ ކުޅުންތެރިއެއް. ކުލަބަށް ނާންގައި އޭނާ ފުރައިގެން އެދިޔައީ. ކޮންޓްރެކްޓެއް އޮއްވައި އެގޮތަށް އެކަން ކުރީމަ އަހަރުމެން ފީފާއަށް މައްސަލަ ހުށަހަޅާނަން،" އިންޑިޔާގެ ގިނަ ކުލަބުތަކަށް ކުޅެފައިވާ ވަރުގަދަ ޑިފެންޑަރާ ބެހޭ ގޮތުން ޓެޑް ބުންޏެވެ.
ނަމަވެސް ނިއުގެ ވާހަކަތައް އަމީރީ ދޮގުކުރެ އެވެ. އޭނާ ބުނީ ނިއުގެ ކުޅުންތެރިންނާއި، ސަޕޯޓަރުން ކިތަންމެހާ ވެސް ރަނގަޅު ކަމަށާއި، ނަމަވެސް މެނޭޖްމަންޓުން އޭނާ މާޔޫސްކޮށްލީ ކަމަށެވެ.
އިތުބާރު ހުރި ގޮތަކަށް އެނގިފައިވާ ގޮތުގައި އަމީރީ ފުރައިގެން ދިޔައީ އިންޑިޔާ އަށެވެ. އޭނާ ވަނީ އޭއެފްސީ ކަޕުން ނިއު ކެޓި މެޗު ކުޅެން އިންޑިޔާގެ ގުވަހަޓީއަށް ކުރި ދަތުރުގައި އިންޑިޔާގެ ބައެއް ކުލަބުތަކާ ވާހަކަ ދައްކައިފައެވެ.
ޓެޑް ބުނީ އަމީރީ ކުޅޭ މަގާމަށް ކުޅޭ ރަނގަޅު ދިވެހި ކުޅުންތެރިން ނިއުގައި ތިބުމުން އޭނާގެ މުހިންމުކަން ކުލަބަށް މިވަގުތަށް ކުޑަވެފައިވާ ކަމަށް ކޯޗު އޮސްކާ ބުރުޒޮން ވެސް ފާހަގަކޮށްފައިވާ ކަމަށެވެ.