ތ. އަތޮޅު ގުރައިދޫ ނެރުމަށްޗަށް އުރުނު ނިޔާމަ ބޯޓް އަދިވެސް ފުންނުކުރެވޭކަމަށް އެ ބޯޓުގެ ކެޕްޓަން ބުނެފިއެވެ.
ޕީއެސްއެމް ނިވްސްއަށް މަޢުލޫމާތުދެމުން ނިޔާމަބޯޓްގެ ކެޕްޓަން އާދަމް ޝަރީފް ބުނީ ބޯޓް ފުންކުރުމަށް އެމްއެންޑީއެފުން މިހާރުވެސް މަސައްކަތް ކުރަމުންދާކަމަށެވެ. އަދި އެސަރަހައްދުގެ މޫސުން ހުރިގޮތަށް ބަލާއިރު ވަރަށް އަވަހަށް ބޯޓް ފުންކުރެވިދާނެކަމަށް ބެލެވޭކަމަށެވެ.
ކެޕްޓަން ބުނީ އެ ބޯޓް ގުރައިދޫ ނެރަށް އުރެން ދިމާވީ ބޯޓްގެ އިންޖީނަށް ދިމާވި މައްސަލައަކާ ގުޅިގެން ސްޕީޑް ނުނެގިގެން، އުޅެނިކޮށް ކަމަށެވެ. އަދި އެވަގުތު އެސަރަހައްދުގެ ބާނި ބޮޑުވެފައި މޫސުންވެސް އެހާ ރަނގަޅު ނޫންކަމަށްވެސް ކެޕްޓަން ވަނީ ބުނެފައެވެ.
މިހާދިސާގައި ބޯޓުގައި ހުރި މުދާތަކަށް ލޮނުގެ އަސަރުކޮށް އެއްވެސް މުދަލެއް ސަލާމަތް ކުރެވިފައި ނުވާކަމަށްވެސް ބޯޓުގެ ކެޕްޓަން ވަނީ ބުނެފައެވެ. އަދި މި ހާދިސާގައި ލިބުނު ގެއްލުމުގެ އަގު 3 މިލިޔަން ރުފިޔާއަށްވުރެ ބޮޑުވާނެކަމަށްވެސް ނިޔާމަ ބޯޓްގެ ކެޕްޓަން އާދަމް ޝަރީފް ވަނީ ބުނެފައެވެ.
ގދ. ތިނަދުއަށާއި، އައްޑޫއަށާއި ފުވައްމުލަކަށް މުދާ ހިފައިގެން އާންމުކޮށް ދަތުރުކުރާ ނިޔާމަ ބޯޓް ގުރައިދޫ ނެރަށް އުރިފައިވަނީ ބުދަދުވަހުގެ ރޭ ފަތިހުއެވެ. ބޯޓް އުރުނު އިރު ބޯޓްގައި 8 ބިދޭސީންނާއި 3 ދިވެހިން ތިއްބެވެ. މިބޯޓަކީ 33 އަހަރު ވެފައިވާ ބޯޓެކެވެ.