ވޯލްޑް ކަޕުގައި ކުޅޭ އިނގިރޭސި ޤައުމީ ޓީމުގެ އެއް ނަންބަރު ކީޕަރުކަން އެވަޓަންގެ ކީޕަރު ޖޯޑަން ޕިކްފޯޑަށް ދީފިއެވެ.
ފީފާގައި ޓީމުތައް ރަޖިސްޓްރީކުރަންޖެހޭ އެންމެ ފަހު ތާރީޚު އިއްޔެގެ ނިޔަލަށް ހަމަވިއިރު އިނގިރޭސި ޓީމުން ޕިކްފޯޑަށް އެއް ނަންބަރު ދިނުމުން ޓީމުގެ އެއްވަނަ ކީޕަރަކީ އޭނާ ކަމަށް އިނގިރޭސި މީޑިޔާތަކުން ވަނީ ބުނަން ފަށާފައެވެ.
އުމުރުން އެންމެ 24 އަހަރުގެ ޕިކްފޯޑަށް އެއްނަންބަރު ދީފައިވާއިރު ދެންތިބި ދެ ކީޕަރުންގެ ތެރެއިން ޖެކް ބަޓްލޭންޑަށް ދީފައިވަނީ 13 ނަންބަރެވެ. ނިކް ޕޯޕަށް ދިނީ 23 ނަންބަރެވެ.
އިނގިރޭސި ގައުމީ ކޯޗު ގެރެތް ސައުތް ގޭޓް ވަނީ ޓީމުގެ އެއްވަނަ ކީޕަރަކީ ޕިކްފޯޑްކަމުގެ އިޝާރާތެއް ކުރިން ދީފައެވެ.
"ހުރަސްތަކުގައި އޭނާގެ ނިންމުންތައް ވަރަށް ރަނގަޅު. އަދި ޕަންޗް ކުރުމާއި ޑީސްޓްރިބިއުޝަންތަކާއި ޕާސްތައް ވެސް ވަރަށް ރަނގަޅު. އަހަރެން ވަރަށް ހިތްހަމަޖެހޭ އޭނާގެ ކުޅުމާމެދު،" ކޯޗު ބުންޏެވެ.
ނަމަވެސް ޕިކްފޯޑް ބުނީ ޓީމުގެ އެއްވަނަ ކީޕަރަކީ އޭނާކަމަށް ކޯޗު މިހާތަނަށް ބުނެފައިނުވާ ކަމަށެވެ.
"އަހަންނަކަށް ތިކަމެއް އަދި ނޭނގެ. 21 އަހަރުން ދަށުގެ ޤައުމީ ޓީމުގައި ވެސް ސައުތްގޭޓާއެކު އަހަރެން މަސައްކަތް ކުރިން. އެހެންވީމާ އޭނާ ފަހަރުގައި ތިހެން ބުނެފާނެ. އެކަމަކު މިފަހަރު އަދި އަހަރެން ގާތުގައި އެއްވެސް ވާހަކައެއް ނުބުނޭ. އެއްވެސް ކަމެއް އަދި ފައިނަލްނުވޭ. އަހަންނަށް އޮތީ ޓީމުން ޖާގަ ހޯދަން ފަރުވާތެރިކަމާއެކު މަސައްކަތް ކުރުން،" ޤައުމީ ޓީމަށް މިހާތަނަށް ހަތަރު މެޗު ކުޅެދީފައިވާ ކީޕަރު ބުންޏެވެ.
އިނގިރޭސި ޓީމަށް ޕިކްފޯޑް ގެނެސްފައިވާއިރު ޓީމުގައި ނުހިމަނައި ދޫކޮށްލާފައިވަނީ ތަޖުރިބާކާރު ކީޕަރު ޖޯހާޓް އެވެ.