ވޯލްޑް ކަޕުގައި ކުޅެވޭނެ ކަމަށް އަބަދުވެސް އުއްމީދު ކުރި ކަމަށާއި، އަނިޔާގައި ހުރި ދުވަސްތަކުގައި އަމިއްލަ ނަފްސަށް އިތުބާރު ގެއްލުވާނުލާ ކަމަށް ޖަރުމަނުގެ ކެޕްޓަން މެނުއަލް ނޯޔާ ބުނެފިއެވެ.
އޭނާ މިހެން ބުނީ މިދިޔަ ސެޕްޓެމްބަރު މަހުން ފެށީގެން މެޗެއް ނުކުޅެ ހުރެފައި ކުޅުނު ފުރަތަމަ މެޗަށް ފަހު ވޯލްޑް ކަޕް ޓީމުން ޖާގަ ދިނުމުންނެވެ.
"އަހަރެން ހުރިހާ ކުޅުންތެރިންނާއި ކޯޗިން ޓީމަށް ޝުކުރު އަދާކުރަން. އެމީހުން ވަރަށް ހިތްވަރުދިން އަހަންނަށް. އަހަރެން އެއްވެސް އިރަކު އިތުބާރު ގެއްލުވާނުލަން. އަހަރެން މަސައްކަތް ކުރީ ވޯލްޑް ކަޕަށް ފިޓްވާން،" ޖަރުމަނު ޓީމު އިއުލާނުކުރަން ބޭއްވި ޕްރެސް ކޮންފަރެންސްގައި ނޯޔާ ބުންޏެވެ.
އޭނާ ބުނީ އަނިޔާގައި ހުރި ދުވަސްވަރު ޖަރުމަނުގެ ގޯލް ބެލެހެއްޓި ބާސެލޯނާގެ ކީޕަރު މާކް އަންދްރޭ ޓާސްޓެގަން އަކީ މޮޅު ކީޕަރެއް ކަމަށެވެ.
ނަމަވެސް ކޯޗު ޖޯހިމް ލޯ ބުނީ ނޯޔާ ޓީމުގައި ހިމެނިއްޖެނަމަ އެއްވަނަ ކީޕަރަކީ ނޯޔާ ކަމަށާއި، ޓާސްޓެގަން ހުންނާނީ ބަދަލު ކީޕަރަކަށް ކަމަށެވެ.
ނޯޔާ އަކީ އެންމެ ފަހުގެ ވޯލްޑް ކަޕުގެ އެންމެ މޮޅު ކީޕަރެވެ.